មន្រ្តីចិន និងថ្នាក់ដឹកនាំចិន បានធ្វើទស្សនកិច្ចគ្រាក់ៗនៅរុស្ស៊ី មួយរយៈចុងក្រោយនេះ ស្របពេលសេដ្ឋកិច្ចរុស្ស៊ី កាន់តែស្ថិតនៅឯកោពីលោកខាងលិច និងបណ្តាប្រទេសមួយចំនួន។ មន្រ្តីចិនចុងក្រោយ គឺលោក Li Shangfu រដ្ឋមន្រ្តីការពារជាតិចិន បានធ្វើទស្សនកិច្ចនៅក្រុងមូស្គូ ក្នុងថ្ងៃទី១៦ ខែមេសា។ 

 

ក្នុងទស្សនកិច្ចនេះ លោក Li ក៏បានជួបជាមួយលោក វ្ល៉ាឌីមៀ ពូទីន ប្រធានាធិបតីរុស្ស៊ីផងដែរ។ តាមរយៈកិច្ចសន្ទនានោះ លោកពូទីន បានបញ្ជាក់ថា យោធាប្រទេសទាំងពីរ កំពុងធ្វើការជាមួយគ្នាយ៉ាងសកម្ម តាមរយៈការដោះដូរព័ត៌មាន, ធ្វើការជាមួយគ្នាលើកិច្ចសហប្រតិបត្តិការបច្ចេកវិទ្យាយោធា និងធ្វើសមយុទ្ធយោធារួម។ បើតាមលោកពូទីន កន្លងមក យោធាចិន និងរុស្ស៊ី បានធ្វើទាំងសមយុទ្ធទាំងនៅលើដី កងទ័ពអាកាស និងកម្លាំងទ័ពជើងទឹក។ 

 

ក្នុងដំណើរទស្សនកិច្ចជាលើកដំបូងទៅក្រៅបរទេសចាប់តាំងពីកាន់តំណែងជារដ្ឋមន្រ្តីការពារជាតិចិន លោក Li បានលើកឡើងថា ក្នុងរយៈពេលថ្មីៗនេះ កិច្ចសហប្រតិបត្តិការយោធារវាងប្រទេសទាំងពីរ គឺមានការអភិវឌ្ឍយ៉ាងល្អ ដោយកិច្ចសហប្រតិបត្តិការនេះ បានជួយពង្រឹងសន្តិសុខក្នុងតំបន់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

លោក Li រដ្ឋមន្រ្តីចិនមួយរូប ដែលស្ថិតនៅក្រោមទណ្ឌកម្មអាម៉េរិក ចាប់តាំងពីឆ្នាំ២០១៨មក ក្រោមហេតុផលការទូទាត់យន្តហោះចម្បាំង និងសម្ភារយោធាពីក្រុមហ៊ុននាំចេញអាវុធរុស្ស៊ី Rosoboronexport។ 

 

គួររំឭកថា កន្លងមក អាម៉េរិក បានចោទចិនថា ពិចារណាផ្តល់អាវុធឱ្យរុស្ស៊ី សម្រាប់សង្រ្គាមនៅអ៊ុយក្រែន។ យ៉ាងណាមិញ ចិនបានបដិសេធជុំវិញបញ្ហានេះ៕