អន្តរជាតិ
លោក ស៊ី ប្រាប់លោក ហ្សេលេនស្គី ថា ការចរចាជាច្រកចេញតែមួយគត់
× ប្រធានាធិបតីចិន ស៊ី ជីនភីង ជជែកជាមួយសមភាគីអ៊ុយក្រែន វ៉ូឡូឌីមៀ ហ្សេលេនស្គី ជាលើកដំបូងតាំងពីរុស្ស៊ីបានចាប់ផ្ដើមការឈ្លានពានអ៊ុយក្រែនកាលពីឆ្នាំមុន។ នាជំនួបនេះ លោក ស៊ី លើកឡើងថា ការចរចាជាច្រកចេញតែមួយគត់ ហើយក្រុងប៉េកាំងនឹងចាត់តាំងប្រេសិតម្នាក់ដើម្បីដើរតួនាទីជាអ្នកសម្រុះសម្រួល និងបន្តដំណោះស្រាយនយោបាយ។
កិច្ចសន្ទនាតាមទូរស័ព្ទរវាងមេដឹកនាំចិន និងអ៊ុយក្រែនបានធ្វើឡើងនាថ្ងៃទី២៦ ខែមេសាក្នុងរយៈពេលជិតមួយម៉ោង ហើយភាគីទាំងពីរសម្រេចបានការជជែកប្រកបដោយអត្ថន័យផងដែរ។ នេះបើតាមការលើកឡើងរបស់ប្រធានាធិបតីអ៊ុយក្រែន។
ចំណែកឯសេចក្តីថ្លែងការណ៍របស់ក្រសួងការបរទេសចិនបានប្រកាសថា គោលជំហរស្នូលរបស់ទីក្រុងប៉េកាំងគឺជួយសម្រួលដល់កិច្ចចរចាដើម្បីសន្តិភាព ហើយបេសកជនដែលជាអតីតអគ្គរដ្ឋទូតចិនប្រចាំរុស្ស៊ី នឹងធ្វើដំណើរទស្សនកិច្ចទៅអ៊ុយក្រែនដើម្បីស្វែងរកដំណោះស្រាយនយោបាយ។ បើតាមទូរទស្សន៍រដ្ឋចិន CCTV លោក ស៊ី ជិនភីង ប្រាប់សមភាគីអ៊ុយក្រែនថា ការពិភាក្សា និងការចរចាជាដំណោះស្រាយតែមួយគត់ក្នុងការដោះស្រាយវិបត្តិនេះ។
«លើជម្លោះអ៊ុយក្រែន ចិនតែងឈរខាងសន្តិភាព។» ទូរទស្សន៍ CCTV ស្រង់សម្ដីលោក ស៊ី បែបនេះ មុនបញ្ជាក់ជំហរចិនទៀតថា ចិនមិនបន្ថែមសាំងលើភ្លើង ឬកេងចំណេញពីជម្លោះនេះឡើយ។ មេដឹកនាំចិន ក៏បញ្ជាក់ជាថ្មីពីហានិភ័យលើការប្រើអាវុធនុយក្លេអ៊ែរ ដែលការណ៍នេះតម្រូវឱ្យភាគីទាំងអស់រក្សាការអត់ធ្មត់ ហើយគិតគូរប្រទេសអនាគតខ្លួនឯង និងប្រទេសផ្សេងទៀត។
ជុំវិញកិច្ចសន្ទនានេះ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានសរសើរការខិតខំរបស់ចិន ប៉ុន្តែបានថ្កោលទោសជំហររបស់អ៊ុយក្រែនដដែល។ ចំណែកឯសេតវិមានក៏បានស្វាគមន៍ជំនួបតាមទូរស័ព្ទរវាងមេដឹកនាំទាំងពីរ។ ប៉ុន្តែអ្នកនាំពាក្យសន្តិសុខជាតិអាមេរិក លោក John Kirby អះអាងថា ពេលនេះគឺឆាប់ពេកក្នុងការបញ្ជាក់ថា ជំនួបនេះអាចនឹងពាំនាំភាគីទាំងពីរទៅរកកិច្ចព្រមព្រៀងសន្តិភាពដែរឬយ៉ាងណា៕
© រក្សាសិទ្ធិដោយ thmeythmey.com