ដោយ៖ គិត បុប្ផា
ភ្នំពេញ៖ ទីភ្នាក់ងារកិច្ចសហប្រតិបត្តិការអន្តរជាតិ ប្រទេសថៃ ផ្ដល់អាហាររូបករណ៍ថ្នាក់បរិញ្ញាបត្រជាន់ខ្ពស់ដល់បេក្ខជនមកពីបណ្ដាប្រទេសមួយចំនួន រួមទាំងកម្ពុជាផងដែរ សម្រាប់ឆ្នាំ២០២៣ ក្រោមកម្មវិធី (TIPP)។ កាលបរិច្ឆេទផុតកំណត់ថ្ងៃទី២០ ខែកក្កដា ឆ្នាំ២០២៣ វេលាម៉ោង ១៦:០០នាទី។
យោងតាមសេចក្ដីជូនដំណឹងរបស់ក្រសួងអប់រំ ទីភ្នាក់ងារកិច្ចសហប្រតិបត្តិការអន្តរជាតិ សហការជាមួយគ្រឹះស្ថាន និងសកលវិទ្យាល័យនានាក្នុងប្រទេសថៃ នឹងផ្ដល់អាហាររូបករណ៍ថ្នាក់បរិញ្ញាបត្រជាន់ខ្ពស់ (Master) ដល់បេក្ខជនបណ្តាប្រទេសផ្សេងៗ ក្នុងនោះក៏មានកម្ពុជាផងដែរ ក្រោមកម្មវិធី Thailand International Postgraduate Program (TIPP) សម្រាប់ឆ្នាំ២០២៣។
ក្នុងអាហាររូបករណ៍នេះទទួលបានការរ៉ាប់រងថ្លៃសិក្សា ប្រាក់ប្រចាំខែសម្រាប់ផ្គត់ផ្គង់ការរស់នៅ កន្លែងស្នាក់នៅ រ៉ាប់រងសេវាសុខភាព និងសំបុត្រយន្ដហោះទៅមក ។ល។ ចំពោះមុខជំនាញសិក្សារួមមាន Sufficiency Economy Philosophy (SEP), Climate Change and Environmental Issues , Agriculture and Food Security, Public Health, Bio-Circular-Green Economy Model (BCG) and other topics related to Sustainable Development Goals ( or SDGS)។
លក្ខខណ្ឌដាក់ពាក្យ បេក្ខជនត្រូវមានសញ្ជាតិខ្មែរ, អាយុមិនលើសពី ៤៥ឆ្នាំ, ជាមន្រ្ដីរាជការ, មានសុខភាពល្អទាំងកាយសម្បទា និងសតិបញ្ញា។ លើសពីនេះបេក្ខភាពត្រូវមានសញ្ញាបត្រ បរិញ្ញាបត្រដែលទាក់ទងនឹងជំនាញខាងលើ។ ចំពោះឯកសារដែលបំពេញ និងជូនភ្ជាប់ត្រូវមាន ពាក្យស្នើសុំអាហារូបករណ៍០៣ច្បាប់ ,លិខិតបញ្ជាក់កម្រិតចំណេះដឹងភាសាអង់គ្លេស (TOEFL, IELTS), ព្រឹត្តិបត្រពិន្ទុ, សញ្ញាបត្របរិញ្ញាបត្រ, លិខិតគាំទ្រ ,គម្រោងស្រាវជ្រាវ និងសំបុត្រពេទ្យ។
សម្រាប់ការដាក់ពាក្យមាន០២ដំណាក់កាល គឺត្រូវដាក់ពាក្យតាម Online បន្ទាប់មកគឺត្រូវផ្ញើពាក្យអាហាររូបករណ៍ និងឯកសារផ្សេងៗ ជា Hard copy ចំនួន ០៣ ច្បាប់មកកាន់ការិយាល័យអាហាររូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហាររូបករណ៍ ឲ្យបានមុនថ្ងៃទី២០ ខែកក្កដា ឆ្នាំ២០២៣ វេលាម៉ោង ១៦:០០នាទី៕