តាមរយៈព្រះរាជសារ នៅថ្ងៃទី៦ ខែឧសភា ឆ្នាំ២០២៣ ព្រះករុណាជាម្ចាស់ជីវិតលើត្បូង ទ្រង់មានព្រះបន្ទូលទៅកាន់សម្តេចនាយករដ្ឋមន្រ្តីថា ព្រះអង្គ មានព្រះហឫទ័យសោមនស្សរីករាយយ៉ាងក្រៃលែង ដែលកម្ពុជាក្នុងនាមជាម្ចាស់ផ្ទះ បានរៀបចំពិធីប្រកួតកីឡាស៊ីហ្គេមបានយ៉ាងល្អត្រចះត្រចង់ «មិនធ្លាប់មានពីមុនមក»។ ព្រះអង្គ ចាត់ទុកព្រឹត្តិការណ៍ ថាជាការបើកទំព័រប្រវត្តិសាស្រ្តថ្មីរបស់កម្ពុជា។ 
 

«ខ្ញុំ សូមកោតសរសើរដ៏កក់ក្តៅជាទីបំផុតចំពោះសម្តេចអគ្គមហាសេនាបតីតេជោ ដែលជាមេដឹកនាំទទួលខុសត្រូខ្ពស់លើជោគវាសនាជាតិ និងមានគុណបំណាច់ធ៏ធំធេងប្រកបដោយវីរភាពដ៏ខ្ពង់ខ្ពស់»។ នេះជាព្រះរាជឱង្ការរបស់ព្រះចៅក្រុងកម្ពុជាធិបតី ទៅកាន់ប្រមុខរដ្ឋាភិបាល។ 
 

សូមបញ្ជាក់ថា ពិធីបើកព្រឹត្តិការណ៍ស៊ីហ្គេម បានប្រព្រឹត្តទៅនៅពហុកីឡដ្ឋានជាតិមរតកតេជោ កាលពីយប់ថ្ងៃទី៥ ខែឧសភា ដោយទទួលបានការស្ញប់ស្ញែង និងការកោតសរសើរពីមហាជនថា ការរៀបចំពិធីបើកព្រឹត្តិការណ៍ស៊ីហ្គេមនេះ មានភាពអស្ចារ្យខ្លាំង៕