លោក នេត្រ ភក្រ្តា រដ្ឋលេខាធិការក្រសួងបរិស្ថាន បានបញ្ជាក់ថា​ បច្ចុប្បន្ននេះ មានភោជនីយដ្ឋាន ៧៨កន្លែងហើយ ដែលបានសន្យាមិនធ្វើអាហារពីសាច់សត្វព្រៃ បម្រើដល់អតិថិជន។ លោក ភក្ត្រា ជំរុញឱ្យម្ចាស់ភោជនីយដ្ឋានទាំងអស់ ចូលរួមផ្សព្វផ្សាយដល់អតិថជន អំពីផលប៉ះពាល់អវិជ្ជមានលើការបរិភោគសាច់សត្វព្រៃ ការបាត់បង់ធនធានធម្មជាតិ និងហានិភ័យលើសុខភាពសាធារណៈជាដើម។

 

រដ្ឋលេខាធិការក្រសួងបរិស្ថាន និងជាប្រធានយុទ្ធនាការអន្ទាក់សូន្យ បានលើកឡើងថា៖«ខេត្តកំពង់ស្ពឺគឺជាតំបន់ហានិភ័យមួយ ទាក់ទងនឹងសាច់សត្វព្រៃ ដែលក្នុងនោះយើងឃើញមានការលក់សាច់សត្វព្រៃនៅតាមភោជនីយដ្ឋាន លើដងផ្លូវ និងអាហារនានានៅតាមតំបន់ទេសចរណ៍។ ទោះបីមុខម្ហូបពីសាច់សត្វព្រៃ មិនត្រូវបានដាក់បញ្ចូលក្នុងបញ្ជីរាយមុខម្ហូបក៏ពិតមែន ប៉ុន្តែយើងនៅតែឃើញមានការណែនាំអំពីម្ហូបពីសាច់សត្វព្រៃដូចជាជ្រូកព្រៃ ឬឈ្លូសជាដើម ទៅកាន់អតិថិជនជារឿយៗដោយផ្ទាល់មាត់ដដែល»។
 

ជាមួយគ្នានេះលោក សង្ឃឹមថា ការចូលរួមសហការពីម្ចាស់ភោជនីយដ្ឋាន និងការផ្សព្វផ្សាយសារនានា អំពីហានិភ័យនៃការបរិភោគសត្វព្រៃ នឹងអាចផ្លាស់ប្តូរឥរិយាបថអ្នកនិយមបរិភោគ ឱ្យគិតពីផលប្រយោជន៍រួមវិញ៕