គិតត្រឹមម៉ោង១១ព្រឹកថ្ងៃទី១៥ ខែឧសភា គណបក្សឆ្ពោះទៅមុខ (Move Forward) បាននាំមុខ ទាំងការប្រជែងកៅអីក្នុងមណ្ឌលបោះឆ្នោត និងបញ្ជីគណបក្ស។ គណបក្សភឿថៃ (Pheu Thai) និង គណបក្ស Bhumjaithai Party ស្ថិតក្នុងលំដាប់ទី២ និងទី៣ រៀងគ្នា។
ខណៈការរាប់សន្លឹកឆ្លោតកំពុងតែបន្ត បក្សឆ្ពោះទៅមុខនៅតែស្ថិតនៅលំដាប់ទី១ដែលជាសមិទ្ធផលដ៏វិសេសវិសាលសម្រាប់បក្សដែលធ្លាប់ត្រូវបានរំសាយកន្លងមក។ មេដឹកនាំបក្ស លោក Pita Limjaroenrat នាថ្ងៃទី១៤ ខែឧសភារំពឹងថានឹង បង្កើតរដ្ឋាភិបាលចម្រុះជាមួយគណបក្សភឿថៃ ខណៈសំឡេងឆ្នោតនៃបក្សទាំងពីរអាចមានអាសនៈសភាគ្រប់គ្រាន់ដើម្បីបង្កើតរដ្ឋាភិបាលថ្មី។
គណបក្ស Bhumjaithai Party ក៏ជាជម្រើសមួយទៀតសម្រាប់ការបង្កើតរដ្ឋាភិបាលចម្រុះជាមួយបក្សឆ្ពោះទៅមុខផងដែរ ខណៈលោក Pita បានច្រានចោលលទ្ធភាពនៃការបង្កើតរដ្ឋាភិបាលជាមួយគណបក្សថៃរួបរួមជាតិរបស់នាយករដ្ឋមន្ត្រី ប្រាយុទ្ធ ចន្ទអូចា និងគណបក្ស Palang Pracharath (PPRP) របស់ឧបនាយករដ្ឋមន្ត្រីលោក Prawit Wongsuwon។
បក្សឆ្ពោះទៅមុខជាស្នងតំណែងពីគណបក្សអនាគតទៅមុខដែលជាបក្សវ័យក្មេង និងបានអង្រួនឆាកនយោបាយថៃអំឡុងការបោះឆ្នោតឆ្នាំ២០១៩។ បក្សអនាគតទៅមុខ ត្រូវបានរំលាយនៅឆ្នាំ២០២០ ដោយតុលាការធម្មនុញ្ញ។ យ៉ាងណាក៏ដោយ បក្សអាចរក្សាសមាជិករបស់ខ្លួនបានដោយការក្លាយជាគណបក្សឆ្ពោះទៅមុខវិញ។
បក្សគាំទ្រលទ្ធិប្រជាធិបតេយ្យនេះ មានគោលបំណងកម្ចាត់ឥទ្ធិពលយោធាក្នុងនយោបាយថៃ និងព្រមទាំងធ្វើការកែទម្រង់របបរាជានិយមផងដែរ។ គោលនយោបាយជឿនលឿននេះហើយដែលទាក់ទាញសមានចិត្តរបស់យុវជនថៃដែលធុញថប់អ្នកនយោបាយចាស់វស្សកាច់ចង្កូតប្រទេសរាប់ឆ្នាំមកនេះ។
មេដឹកនាំបក្សឆ្ពោះទៅមុខ វ័យ ៤២ ឆ្នាំ លោក Pita ចូលប្រលូកក្នុងវិស័យនយោបាយតាំងពីឆ្នាំ ២០១៨។ ក្រោយបញ្ចប់ការសិក្សាពីនូវែលសេឡង់ និងសកលវិទ្យាល័យ Harvard ដ៏ល្បីនៅអាម៉េរិក លោកបានគ្រប់គ្រងអាជីវកម្មប្រេងអង្កររបស់គ្រួសារលោក ខណៈឪពុកបានស្លាប់ទៅ ហើយគ្រួសារបានជំពាក់បំណុលយ៉ាងខ្លាំង។
ក្រោយមកលោកបានក្លាយជានាយកប្រតិបត្តិក្រុមហ៊ុន Grab ប្រចាំថៃដែលជាក្រុមហ៊ុនបច្ចេកវិទ្យា ធំមួយនៅអាស៊ីអាគ្នេយ៍។ ក្នុងឆ្នាំ២០១២ លោកបានរៀបការជាមួយតារាសម្តែងទូរទស្សន៍ថៃលោកស្រី Chutima Teepanat ហើយមានកូនស្រីម្នាក់អាយុប្រាំពីរឆ្នាំ។ ប៉ុន្តែអាពាហ៍ពិពាហ៍របស់លោកបានបែកបាក់នៅឆ្នាំ ២០១៩ ។
ក្នុងឆាកនយោបាយ ដំបូងឡើយ Pita បានចូលរួមជាសមាជិកនៃបក្សអនាគតឆ្ពោះទៅមុខហើយតាមការអញ្ជើញរបស់មេដឹកនាំបក្ស លោកបានក្លាយជាបេក្ខជននៅក្នុងការបោះឆ្នោតទូទៅក្នុងឆ្នាំ២០១៩ ហើយបានឈ្នះអាសនៈក្នុងសភាតំណាងរាស្រ្ត។ ពីរសប្តាហ៍បន្ទាប់ពីការរំលាយគណបក្ស លោកត្រូវបានចាត់តាំងជាមេដឹកនាំថ្មីនៃគណបក្សឆ្ពោះទៅមុខ ដែលត្រូវបានចូលរួមដោយសមាជិកសភាចំនួន៥៤នាក់ផ្សេងទៀត។
Pita មានវត្តមានយ៉ាងស្វាហាប់នៅលើផ្លូវនៃយុទ្ធនាការនយោបាយតាមរយៈភាពវ័យក្មេង និងថាមពលរបស់លោកដើម្បីទាក់ទាញចិត្តអ្នកគាំទ្រដែលចង់បានការផ្លាស់ប្តូរបន្ទាប់ពីរយៈពេលប្រាំបីឆ្នាំនៃរដ្ឋាភិបាលដែលគាំទ្រដោយយោធា។ លោកក៏ធ្លាប់បានសន្យាផងដែរថា នឹងរួមគ្នាសរសេរប្រវត្តិសាស្រ្តនយោបាយថៃឡើងវិញក្នុងមុខមាត់ថ្មីប្រកបដោយលទ្ធិប្រជាធិបតេយ្យ។
«ប្រសិនបើមានពូ គឺអត់មានពួកយើងទេ បើមានពួកយើង ក៏គ្មានពូដែរ»។ លោក Limjaroenrat ស្រែកពេញទំហឹងទៅកាន់ហ្វូងអ្នកគាំទ្រកាលយុទ្ធនាការថ្ងៃទី៤ ខែឧសភា។ «ពូ» គឺសំដៅឧត្តមសេនីយ៍៣នាក់ដែលបានឡើងកាន់អំណាចក្នុងរដ្ឋប្រហារឆ្នាំ២០១៤ ហើយបន្ទាប់ពីការបោះឆ្នោតឆ្នាំ ២០១៩ ដែលពួកគេនៅតែបន្តអំណាច។ ឧត្តមសេនីយ៍ទាំង៣ មានលោក ប្រាយុទ្ធ លោក ប្រាវីត វង្សសុវណ្ណ និងលោក អនុពង្ស ផៅចិន្តា៕