នាយករដ្ឋមន្រ្តីអង់គ្លេស លោក Rishi Sunak និងសមភាគីហូឡង់ លោក Mark Rutte បានឯកភាពក្នុងការបង្កើតសម្ព័ន្ធមិត្តអន្តរជាតិមួយ ដែលអាចផ្តល់យន្តហោះចម្បាំងទៅអ៊ុយក្រែន តាមការស្នើសុំ។ 

 

«នាយករដ្ឋមន្រ្តីទាំងពីរ បានឯកភាពថា ពួកគេនឹងធ្វើការជាមួយគ្នា ដើម្បីបង្កើតសម្ព័ន្ធមិត្តអន្តរជាតិមួយ ក្នុងការផ្តល់អ៊ុយក្រែនជាមួយសមត្ថភាពប្រយុទ្ធលើអាកាស គាំទ្រលើការហ្វឹកហាត់លើការទទួលបានយន្តហោះចម្បាំង F16»។ អ្នកនាំពាក្យការិយាល័យនាយករដ្ឋមន្រ្តីអង់គ្លេស បានបញ្ជាក់បែបនេះ នៅក្នុងសេចក្តីថ្លែងការណ៍មួយចេញនៅថ្ងៃទី១៦ ខែឧសភា។ 

 

បន្ថែមពីនេះ ប្រមុខរដ្ឋាភិបាលអង់គ្លេស ក៏បានបញ្ជាក់ពីសិទ្ធិរបស់អ៊ុយក្រែនចូលទៅក្នុងសម្ធ័ន្ធយោធាណាតូ រួមទាំងឯកភាពលើការផ្តល់ជំនួយផ្នែកសន្តិសុខ ក្នុងរយៈពេលវែងផង ក្នុងគោលបំណងធានាលើការប្រឆាំងនឹងការវាយប្រហារនៅថ្ងៃអនាគត។ 

 

តាមរយៈសំណេរលើបណ្តាញសង្គម Twitter នៅថ្ងៃទី១៦ ខែឧសភា ប្រមុខរដ្ឋាភិបាលហូឡង់ បានលើកឡើងថា ប្រទេសទាំងពីរនឹងធ្វើការរួមគ្នាក្នុងការគាំទ្រអ៊ុយក្រែន នៅចំពោះមុខការឈ្លានពានរបស់រុស្ស៊ី។ យ៉ាងណាមិញ ក្នុងសំណេរនោះ មេដឹកនាំហូឡង់ មិនបានបញ្ជាក់ពីយន្តហោះចម្បាំងឡើយ។ 

 

គួររំឭកថា កន្លងមក រុស្ស៊ីបានព្រមានបំផ្លាញរាល់យន្តហោះចម្បាំង ដែលប្រទេសលោកខាងលិចផ្តល់អ៊ុយក្រែន។ ការព្រមាននេះ ធ្វើឡើងក្រោយ ប៉ូឡូញ និងស្លូវ៉ាគីសន្យាបញ្ជូនយន្តហោះចម្បាំង MiG-29 ទៅក្រុងកៀវ៕