អន្តរជាតិ
អ្នកជំនាញ UN៖ រុស្ស៊ី និងចិនបានបញ្ជូនជំនួយយោធាឱ្យមីយ៉ាន់ម៉ា
× អ្នកជំនាញរបស់អង្គការសហប្រជាជាតិ (UN) អះអាងថា ចាប់តាំងពីរដ្ឋប្រហារខែកុម្ភៈ ឆ្នាំ២០២១ យោធាមីយ៉ាន់ម៉ាបាននាំចូលសម្ភារៈយោធាយ៉ាងហោចណាស់១ពាន់លានដុល្លារក្នុងនោះក៏រួមមានការចូលរួមផ្គត់ផ្គង់ពីរុស្ស៊ី និងចិនសម្រាប់យុទ្ធនាការកម្ទេចក្រុមប្រឆាំង។
ឧទ្ធម្ភាគចក្រ Mi-35 ផលិតដោយរុស្ស៊ី យន្តហោះចម្បាំង MiG-29 និងយន្តហោះធុនស្រាល Yak-130 ហើយយន្តហោះ K-8 របស់ចិន ត្រូវបានរបបយោធាមីយ៉ាន់ម៉ាប្រើញឹកញាប់បំផុត ដើម្បីវាយប្រហារតាមអាកាសលើសាលារៀន ទីតាំងសុខាភិបាល ផ្ទះសម្បែង និងកន្លែងជនស៊ីវិលដទៃទៀត។ នេះបើតាមការលើកឡើងរបស់អ្នករាយការណ៍ពិសេសរបស់ UN ទទួលបន្ទុកសិទ្ធិមនុស្សនៅមីយ៉ាន់ម៉ា Tom Andrews។
យោងតាមរបាយការណ៍របស់លោក Andrews នៅក្នុងការវាយប្រហារលើភូមិនៅតំបន់ Sagaing កាលពីថ្ងៃទី១១ ខែមេសា គ្រាប់បែកពីរគ្រាប់ដែលបានទម្លាក់ពី Yak-130 បានសម្លាប់មនុស្សយ៉ាងហោចណាស់១៦០នាក់ ដែលក្នុងនោះមានកុមារជិត៤០នាក់។ យ៉ាងណាមិញ យោធាមីយ៉ាន់ម៉ាអះអាងថា ខ្លួនកំណត់គោលដៅលើក្រុមបះបោរប៉ុណ្ណោះ។
«ដំណឹងល្អគឺឥឡូវនេះយើងដឹងថាអ្នកណាជាអ្នកផ្គត់ផ្គង់អាវុធទាំងនេះ និងយុត្តាធិការដែលពួកគេធ្វើប្រតិបត្តិការ»។ លោក Andrews បាននិយាយនៅក្នុងសេចក្តីថ្លែងការណ៍មួយជាមួយនឹងការអំពាវនាវឱ្យសមាជិក UN បញ្ឈប់លំហូរអាវុធ និងការហាមឃាត់ទាំងស្រុងលើការផ្ទេរអាវុធទៅឱ្យយោធាមីយ៉ាន់ម៉ា អនុវត្តការហាមឃាត់ដែលមានស្រាប់ និងការសម្របសម្រួលទណ្ឌកម្ម។
អ្នកជំនាញរបស់ UN រូបនេះ បានប្រើប្រាស់ទិន្នន័យពាណិជ្ជកម្មដើម្បីលម្អិតអំពីការផ្ទេរអាវុធ និងទំនិញផ្សេងទៀត រួមទាំងវត្ថុធាតុដើមសម្រាប់ផលិតអាវុធក្នុងស្រុករបស់មីយ៉ាន់ម៉ាទៅឱ្យយោធាចាប់តាំងពីរដ្ឋប្រហារក្នុងតម្លៃ៤០៦លានដុល្លារពីរុស្ស៊ី និង២៦៧លានដុល្លារពីចិន។
ក្រៅពីចិន និងរុស្ស៊ី អង្គភាពគ្រប់គ្រងដោយរដ្ឋនៅឥណ្ឌា និងក្រុមហ៊ុននៅសិង្ហបុរី និងថៃក៏បានរកស៊ីជាមួយរបបយោធាដែរ
ឯកសារខាងលើបន្តថា ក្រុមហ៊ុន Rosoboronexport ដែលជាក្រុមហ៊ុននាំចេញអាវុធរដ្ឋរបស់រុស្ស៊ី បានប្រគល់យន្តហោះចម្បាំង SU-30 ហើយផ្គត់ផ្គង់យន្តហោះចម្បាំង MiG-29 ក៏ដូចជាប្រព័ន្ធបាញ់រ៉ុក្កែតទៅមីយ៉ាន់ម៉ា។ ក្រុមហ៊ុនរុស្ស៊ីផ្សេងទៀត ក៏បានផ្តល់ឧបករណ៍ និងគ្រឿងបន្លាស់ជាច្រើនមុខដល់មីយ៉ាន់ម៉ា ហើយអាវុធទាំងនោះ ត្រូវបានប្រើដើម្បីប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលអាចកើតមាននៅមីយ៉ាន់ម៉ា។
នៅក្នុងសន្និសីទសារព័ត៌មាននៅទីក្រុងញូវយ៉ក លោក Andrews បាននិយាយថា ចិន និងរុស្ស៊ីបានប្រតិកម្មនឹងរបាយការណ៍របស់លោកផងដែរ៕
Tag:
ចិន
រុស្ស៊ី
មីយ៉ាន់ម៉ា
© រក្សាសិទ្ធិដោយ thmeythmey.com