សេចក្តីថ្លែងការណ៍រួមរបស់មេដឹកនាំ G7 ដែលរៀបចំនៅទីក្រុងហ៊ីរ៉ូស៊ីម៉ាបានលើកឡើងពីស្ថានភា​ព​នៅ​ច្រកសមុទ្រតៃវ៉ាន់ និង​ការ​ចោទប្រកាន់ទាក់ទងនឹងសមុទ្រចិនខាងកើត សមុទ្រ​ចិន​ខាង​ត្បូង បញ្ហាសិទ្ធិមនុស្សនៅហុងកុង តំបន់ស៊ីនជាំង តំបន់ទីបេ និងបញ្ហានុយក្លេអ៊ែររបស់ចិនថែមទៀត។ ចិន​ជំទាស់នឹង សេចក្ដីប្រកាសរបស់ G7 ជាខ្លាំង។

 

ក្នុងសេចក្តីថ្លែងការណ៍របស់ក្រសួងការបរទេសចិនចេញផ្សាយនាល្ងាចថ្ងៃទី២១ ខែឧសភា លោក Sun Weidong បានកោះហៅអគ្គរដ្ឋទូតជប៉ុនប្រចាំចិនដើម្បីដាក់ការតវ៉ា។ លោក Sun ប្រាប់ប្រេសិតជប៉ុនថា​ ទីក្រុងតូក្យូបាន​សហការ​ជាមួយ​ប្រទេស​ផ្សេង​ទៀត​ក្នុង​កិច្ច​ប្រជុំ​កំពូល G7 ក្នុង​សកម្មភាព​​លាបពណ៌ និង​វាយប្រហារ​ចិន ជ្រៀត​ជ្រែក​ចូល​កិច្ចការ​ផ្ទៃដោយ​រំលោភគោលការណ៍មូលដ្ឋាន​នៃ​ច្បាប់​អន្តរជាតិ។ បន្ថែមពីនេះ សកម្មភាពជប៉ុនក៏បំពាន​ស្មារតី​នៃ​ឯកសារនយោបាយ​ទាំង​បួន​រវាងចិននិងជប៉ុនឆ្នាំ ១៩៧២ថែមទៀត។

 

បើតាមក្រសួងការបរទេសចិន លោក Sun បញ្ជាក់ថា បញ្ហានៅហុងកុង ស៊ីនជាំង និងទីបេ ជាកិច្ចការ ផ្ទៃក្នុងរបស់ចិនដែលមិនត្រូវមានការជ្រៀតជ្រែកពីកម្លាំងខាងក្រៅឡើយ។ លោក ក៏បានច្រានចោល​ការចោទប្រកាន់អំពីការបង្ខិតបង្ខំសេដ្ឋកិច្ច និងអន្ទាក់បំណុល។ អ្នកការទូតចិនក៏រិះគន់អាមេរិក​ជា​អ្នក​ផ្តួចផ្តើមគំនិតក្នុងការបំពានសណ្តាប់ធ្នាប់ ច្បាប់អន្តរជាតិ និងរំខានដល់ដំណើរការនៃសេដ្ឋកិច្ច​ពិភពលោក។ អនុរដ្ឋមន្ត្រីការបរទេសរូបនេះបាននិយាយទៀតថា សកម្មភាព​របស់​ជប៉ុន​ធ្វើ​ឱ្យខូ​ច​អធិប តេយ្យភាព សន្តិសុខ និងផលប្រយោជន៍អភិវឌ្ឍន៍របស់ចិន ហើយចិនប្រឆាំងដាច់ខាត។

 

«ជប៉ុនគួរតែកែតម្រូវការយល់ដឹងរបស់ខ្លួនអំពីចិន ចាប់យកស្វ័យភាពជាយុទ្ធសាស្រ្ត ប្រកាន់ខ្ជាប់​គោលការណ៍នៃឯកសារនយោបាយទាំងបួនរវាងចិន និងជប៉ុន ហើយជំរុញឱ្យមានការអភិវឌ្ឍប្រកប​ដោយស្ថិរភាពនៃទំនាក់ទំនងទ្វេភាគីជាមួយនឹងអាកប្បកិរិយាស្ថាបនា»។ លោក Sun ប្រាប់​ភាគី​ជប៉ុនបែបនេះ។

 

មុននេះ ស្ថានទូតចិនប្រចាំនៅអង់គ្លេសបានស្នើឱ្យទីក្រុងឡុងដ៍បញ្ឈប់ការបង្កាច់បង្ខូចកេរ្តិ៍ឈ្មោះចិន ដើម្បីជៀសវាងការខូចខាតបន្ថែមទៀតដល់ទំនាក់ទំនងចិន-អង់គ្លេស​ដែលមិ​ន​សូវល្អ​ស្រាប់​ទៅ​ហើយ​៕