អន្តរជាតិ
ទីក្រុងមូស្គូ៖ ការរិះគន់របស់ G7 ទាក់ទងនឹងនុយក្លេអ៊ែរ មានបំណងដាក់សម្ពាធលើរុស្ស៊ីនិងចិន
× ក្រសួងការបរទេសរុស្ស៊ី បានរិះគន់របស់ក្រុមសេដ្ឋកិច្ចរីកចម្រើនទាំង ៧ (G7) ជុំវិញការលើកឡើងពីនុយក្លេអ៊ែររបស់ខ្លួន និងចិន។ ទីក្រុងមូស្គូចាត់ទុកសេចក្ដីថ្លែងការណ៍របស់ G7 ជាបំណងដាក់សម្ពាធយោធា និងនយោបាយលើខ្លួននិងទីក្រុងប៉េកាំង។
នៅក្នុងសេចក្តីថ្លែងការណ៍ដែលលើកឡើងពីការរំសាយអាវុធនុយក្លេអ៊ែរក្រោយកិច្ចប្រជុំកំពូលនៅជប៉ុន មេដឹកនាំប្រទេស G7 បានអំពាវនាវឱ្យរុស្ស៊ី និងចិនបង្ហាញតម្លាភាពកាន់តែច្រើនឡើងអំពីឃ្លាំងអាវុធនុយក្លេអ៊ែររបស់ពួកគេដូចដែលអាមេរិក អង់គ្លេស និងបារាំងបានធ្វើដែរ។ យ៉ាងណាមិញ រុស្ស៊ីចេញមុខប្រឆាំង។
អនុរដ្ឋមន្ត្រីការបរទេសរុស្ស៊ី Sergei Ryabkov ដែលទទួលបន្ទុកកិច្ចការគ្រប់គ្រងអាវុធរបស់ក្រសួងការបរទេសរុស្ស៊ី បាននិយាយថា សេចក្តីថ្លែងការណ៍របស់ G7 ឆ្លុះបញ្ចាំងពីសំឡេងប្រឆាំងរុស្ស៊ី និងចិន។
«ពួកយើងទទួលបានអារម្មណ៍ថាការលើកឡើងរបស់លោកខាងលិចលើប្រធានបទជុំវិញទំហំឃ្លាំងអាវុធនុយក្លេអ៊ែរ មានគោលដៅតែមួយគឺដើម្បីដាក់សម្ពាធផ្លូវចិត្ត នយោបាយ និងយោធាលើរុស្ស៊ី និងចិន»។ លោក Ryabkov បាននិយាយនៅក្នុងសេចក្តីអត្ថាធិប្បាយដែលចេញផ្សាយនៅលើគេហទំព័ររបស់ក្រសួង រួចបន្តថា នៅពីក្រោយការលើក ឡើងនេះច្បាស់ណាស់ថា មានបំណងមិនសមហេតុផលដើម្បីបង្ខូចឈ្មោះប្រទេសទាំងពីរ។
ទីក្រុងមូស្គូ ថែមទាំងហៅកិច្ចប្រជុំកំពូល G7 នៅទីក្រុងហ៊ីរ៉ូស៊ីម៉ាថាជាកន្លែងបង្កើតការប្រឆាំងរុស្ស៊ី និងចិនថែមទៀត៕
© រក្សាសិទ្ធិដោយ thmeythmey.com