កាលពីថ្ងៃទី១៩ ខែឧសភា លោក កែត ឃី បានសរសេរលិខិតទៅលោក ទាវ វណ្ណុល ប្រធានគណបក្សភ្លើងទៀន ដើម្បីជម្រាបពីការសម្រេចចិត្តរបស់លោក ក្នុងការលាលែងពីតំណែងទាំងអស់ក្នុងគណបក្សភ្លើងទៀន។ កាលនៅក្នុងគណបក្សភ្លើងទៀន លោក កែត ឃី ជាសមាជិកអចិន្ត្រៃយ៍ ដែលជាស្ថាប័នកំពូលរបស់គណបក្ស ជាប្រធានក្រុមប្រឹក្សាវិន័យគណបក្ស និងជាអនុប្រធានក្រុមការងារគណបក្សប្រចាំខេត្តកំពង់ស្ពឺ។ 
 

ក្រោយមក១ថ្ងៃ គឺនៅថ្ងៃទី២០ ខែឧសភា លោកមេធាវីរូបនេះ ក៏បានសរសេរលិខិតជូនសម្តេចនាយករដ្ឋមន្រ្តី ហ៊ុន សែន ដើម្បីសុំចូលរួមជីវភាពនយោបាយជាមួយគណបក្សប្រជាជនកម្ពុជា។ ក្នុងលិខិតដែលជូនទៅសម្តេចប្រធានគណបក្សប្រជាជនកម្ពុជា លោក បានរិះគន់ថា ការដឹកនាំរបស់គណបក្សភ្លើងទៀន មានភាពរញេរញៃ គ្មានសណ្តាប់ធ្នាប់ អសមត្ថភាព និងមិនចុះសម្រុងគ្នា។ 
 

ជាមួយគ្នានេះ លោក កើត ឃី បានសរសើរប្រមុខគណបក្សប្រជាជនកម្ពុជាថា ខិតខំបង្រួបបង្រួមជាតិ នាំសុខសន្តិភាពជូនជាតិ និងអភិវឌ្ឍប្រទេសឲ្យរីកចម្រើន៕