ដោយសារមូលហេតុខាងលើនេះ រដ្ឋាភិបាលកម្ពុជា ដែលមានក្រសួងមហាផ្ទៃ ជាសេធនាធិការនាំមុខ ត្រូវធ្វើវិសោធនកម្មច្បាប់ស្តីពីអង្គការក្រៅរដ្ឋាភិបាល ដោយក្នុងខ្លឹមសារនោះ ត្រូវដាក់កំហិតឲ្យអង្គការសង្គមស៊ីវិលនៅកម្ពុជា ធ្វើរបាយការណ៍អំពីហិរញ្ញវត្ថុរបស់ខ្លួន ដាក់ជូនទៅក្រសួងមហាផ្ទៃ ឲ្យបានទៀងទាត់។ សម្តេចនាយករដ្ឋមន្រ្តី ហ៊ុន សែន លើកឡើងថា បានពិភាក្សាជាមួយសម្តេច ស ខេង ឧបនាយករដ្ឋមន្រ្តី-រដ្ឋក្រសួងមហាផ្ទៃរួចហើយ ពីការកំណត់វិធានការនេះ ទៅក្នុងច្បាប់ស្តីពីអង្គការក្រៅរដ្ឋាភិបាល។
 

ក្នុងពិធីសំណេះសំណាលជាមួយកម្មករ-កម្មការិនី នៅខេត្តកណ្តាល នាព្រឹកថ្ងៃទី៣ ខែមិថុនា ឆ្នាំ២០២៣ សម្តេចប្រមុខរដ្ឋាភិបាល ប្រកាសថា អង្គការសង្គមស៊ីវិលណា មិនព្រមធ្វើរបាយការណ៍បង្ហាញពីប្រភពហិរញ្ញវត្ថុដែលខ្លួនទទួលបាន ដាក់ជូនទៅក្រសួងមហាផ្ទៃ តាមការកំណត់ អង្គការសង្គមស៊ីវិលនោះ «នឹងត្រូវរំលាយចោល» តែម្តង។ សម្តេច បន្តថា អង្គការក្រៅរដ្ឋាភិបាល ឬបរទេសខ្លះ ចូលចិត្តនិយាយពីតម្លាភាពជាមួយរដ្ឋាភិបាលកម្ពុជា តែខ្លួនឯង បែរជាមិនបានអនុវត្តនូវតម្លាភាព (តាមរយៈការបង្ហាញប្រភពហិរញ្ញវត្ថុនេះ)។ 
 

មេដឹកនាំកម្ពុជា ថ្លែងដូច្នេះថា៖«អ្នកឯង លាក់លៀម យកលុយទៅជួយអ្នកនេះ យកលុយទៅជួយអ្នកនោះ។ យើង នឹងពិនិត្យឡើងវិញទាំងអស់នូវអង្គការណា ទទួលលុយពីអ្នកណា។ ត្រូវនិយាយគ្នាឲ្យច្បាស់ បើមិនអ៊ីចឹង អ្នកឯង បញ្ជូនលុយមកធ្វើភេរវកម្ម ធ្វើម៉េចខ្ញុំជឿ។ អ្នកឯង បញ្ជូនលុយមក ជូនកាលក្រោមហេតុផលណាមួយ [តែ] អ្នកឯង អាចជាបណ្តាញភេរវកម្ម ក៏អាចថាបាន ដើម្បីបំផ្លាញប្រទេសរបស់ខ្ញុំ។ ឥឡូវស្ថានភាពភូមិសាស្រ្តនយោបាយ កាន់តែតម្រូវឲ្យយើងកាន់តែប្រយ័ត្ន»។ 
  

សម្តេចនាយករដ្ឋមន្រ្តី លើកយកករណីណាហ្កាវើលដ៍មកធ្វើអំណះអំណាង។ សម្តេច អះអាងថា មានបរទេសផ្តល់ប្រាក់ដល់អតីតបុគ្គលិកណាហ្កាវើលដ៍ ទើបពួកគេ អាចមានលទ្ធភាពបន្តធ្វើបាតុកម្មរហូតដល់ទៅប្រមាណ២ឆ្នាំ។ សម្តេច ស្នើឲ្យបរទេសទាំងនោះ ដកខ្លួនចេញការផ្តល់ប្រាក់នេះ។
 

សម្តេច ថែមទាំងទម្លាយថា បានដឹងពីកន្លែងដែលបើកប្រាក់ឲ្យអតីតបុគ្គលិកណាហ្កាវើលដ៍ទាំងនោះទៀតផង ដោយគ្រាន់តែសម្តេច មិនទាន់បញ្ជាឲ្យចាប់ប៉ុណ្ណោះ។ សម្តេច ព្រមានថា សម្តេច ក៏អាចរំលាយអង្គការសង្គមស៊ីវិល ដែលពាក់ព័ន្ធក្នុងរឿងនេះផងដែរ៕