ភ្នំពេញ៖ ពិព័រណ៍រូបថត៩ផ្ទាំង ឆ្លុះបញ្ចាំងពីបទពិសោធ អ្នកស្រឡាញ់ភេទដូចគ្នាចំនួន៩រូប នៅក្នុងខេត្តបាត់ដំបង ដែលព្យាយាមបង្ហាញអត្តសញ្ញាណរបស់ខ្លួនជាសាធារណៈ។ រូបថតទាំងនោះ ក៏បានឆ្លុះបញ្ចាំងពីការបាត់បង់ និងការជម្នះឧបសគ្គក្នុងជីវិតរបស់ពួកគេដែរ។
ក្នុងចំណោមរូបថតដែលដាក់តាំងពិព័រណ៍ទាំងនោះ រូបខ្លះបង្ហាញពីការទាញហែកថង់ប្លាស្ទិក ឱ្យរហែកចេញពីមុខដោយដៃខ្លួនឯង។ មនុស្សខ្លះដេកក្នុងទឹក ឃើញតែប្រឡុងមុខបន្តិច ផុសចេញពីទឹក ហើយខ្លះទៀតមុខត្រូវបានផាត់ពណ៌ជាច្រើន។ ទាំងនោះបង្ហាញអំពីសម្ពាធផ្លូវចិត្ត របស់ក្រុមមនុស្សស្រឡាញ់ភេទដូចគ្នា ដែលតែងតែរងប្រតិកម្មពីគ្រួសារ សង្គម កន្លែងការងារ និងសាលារៀនជាដើម។
ក្រុមអ្នកស្រឡាញ់ភេទដូចគ្នាបានត្អូញត្អែរថា សូម្បីតែសិទ្ធិសេរីភាពក្នុងការ ស្លៀកសម្លៀកបំពាក់ដែលខ្លួនស្រឡាញ់ ក៏ពួកគេត្រូវបានរឹតត្បិតពីមជ្ឈដ្ឋានជុំវិញដែរ។ ការទទួលបានឱកាសការងារ ការទទួលស្គាល់ពីសង្គម និងសូម្បីតែរបៀបរបបរស់នៅ ក៏ពួកគេមិនទទួលបានការលើកទឹកចិត្ត ពីសង្គមពេញលេញដែរ។
លោក ហួរ ពៅ ដែលមានពណ៌ផាត់លើដងខ្លួន
ក្នុងកម្មវិធីតាំងពិព័រណ៍រូបថត ស្ដីពីអ្នកស្រឡាញ់ភេទដូចគ្នា នៅ[ផ្ទះមេត្តា] កាលពីពេលកន្លងទៅ មានភ្ញៀវជាតិនិងអន្តរជាតិ ចូលរួមប្រមាណជាង៦០នាក់។ រូបថតតាំងពិព័រណ៍ភាគច្រើន បានផ្សារភ្ជាប់ជាមួយទឹក ពណ៌ផាត់ ផ្កា និងរុក្ខជាតិបៃតង។ គ្រប់រូបភាពគេរំលេចរង្វង់មុខបន្តិច ផុសចេញពីទឹក។ ផ្កា សម្បកពោត និងរុក្ខជាតិបៃតងផ្សេងៗ ត្រូវបានរាយពាសពេញទឹក ព័ទ្ធជុំវិញផ្ទៃមុខតួ។
ខណៈពេលសាលពិព័រណ៍ កំពុងអ៊ូអរដោយភ្ញៀវជាតិនិងអន្តរជាតិ ជជែកគ្នាអំពីអត្ថន័យរូបថត ដែលពួកគេបានឃើញលោក ហួរ ពៅ ដែលមានសក់ស្លូតវែងស្ទើរត្រឹមចង្កេះ ជាតួសម្ដែងនិងដើរបង្ហាញម៉ូតមួយរូបក្នុងកម្មវិធីនេះ កំពុងសំងំតុបតែងខ្លួន នៅក្នុងបន្ទប់ខាងក្រោយយ៉ាងស្ងប់ស្ងាត់។ ជាសកម្មជនតស៊ូមតិ សម្រាប់ក្រុមអ្នកស្រឡាញ់ភេទដូចគ្នា ក្នុងខេត្តបាត់ដំបងលោក ពៅ ត្រូវបានអ្នកសម្អាងផាត់ពណ៌ចម្រុះ លើដងខ្លួន និងលើអាវយឺតសបែបចោមពុង រហូតដល់ត្រឹមក។ មន្ត្រីរាជការនៃមន្ទីរវប្បធម៌ និងវិចិត្រសិល្បៈខេត្តបាត់ដំបងរូបនេះ ថាពណ៌ដែលផាត់លើដងខ្លួនអ្នកនាងនោះ គឺជាពណ៌ទង់ជ័យ៧ពណ៌ តំណាងឱ្យក្ដីស្រឡាញ់ របស់ក្រុមអ្នកស្រឡាញ់ភេទដូចគ្នា។
លោក ឡឹក រ៉ាពេជ្រ
«ពណ៌ដែលផាត់លើខ្លួនខ្ញុំនេះ តំណាងឱ្យក្ដីស្រឡាញ់ របស់ក្រុមអ្នកស្រឡាញ់ភេទដូចគ្នា។ ពណ៌ច្រើនមានន័យថា ក្ដីស្រឡាញ់របស់យើងមានច្រើន ហើយយើងស្រឡាញ់មនុស្សគ្រប់គ្នា យើងមិនប្រកាន់ថាគេនោះភេទអ្វី សាសន៍អ្វី ឬពណ៌សម្បុរអ្វីឡើយ។ ខ្ញុំចង់បានន័យថា ក្ដីស្រឡាញ់របស់យើង មិនមានការរើសអើងទេ»។ នេះជាការបញ្ជាក់របស់លោក ពៅ។
បុរសដែលមានសម្រស់និងរូបរាង ស្ទើរតែដូចស្រីទាំងស្រុងទៅហើយនោះ ថាបើទោះបីជាក្រុមអ្នកស្រឡាញ់ភេទដូចគ្នា ព្យាយាមបង្ហាញក្ដីស្រឡាញ់របស់ពួកគេ ទៅគ្រប់វិធីយ៉ាងណាក្ដីប៉ុន្តែពួកគេនៅតែពិបាកទទួលបានក្ដីស្រឡាញ់ និងការផ្ដល់សិទ្ធិពេញលេញត្រឡប់មកវិញ។ បុរសភេទទី៣រូបនេះ អះអាងបន្ថែមថា សូម្បីតែការស្វែងរកការងារធ្វើ ក៏ក្រុមអ្នកស្រឡាញ់ភេទដូចគ្នា ពិបាកទទួលបានដែរ។
ងាកចេញពីអ្នកនាងពៅ យើងទៅជួបជាមួយអ្នកសម្ដែង និងបង្ហាញម៉ូតមួយរូបទៀត ដែលកំពុងឈរឱ្យអ្នកសម្អាងជាបុរសផាត់ពណ៌លើដងខ្លួនឱ្យ នោះគឺលោក ឡឹក រ៉ាពេជ្រ។ ត្រៀមខ្លួនដើម្បីដើរចេញទៅបង្ហាញម៉ូតជូនភ្ញៀវជាតិ និងអន្តរជាតិទស្សនា រ៉ាពេជ្រ ត្រូវបានអ្នកសម្អាង យកក្រដាសពណ៌សមួយផ្ទាំងធំ មករុំព័ទ្ធជុំវិញខ្លួនត្រឹមក ធ្វើដូចជាអាវដូច្នោះដែរ។ ពេជ្រ ថាការតុបតែងកាយបែបនេះ គឺប្រៀបទៅនឹងការបិទបាំងអត្តចរិតពិត ដូចដែលខ្លួនធ្លាប់ធ្វើកន្លងមក។ ក្នុងដំណើរបង្ហាញម៉ូត ដែលពោរពេញដោយភាពជឿជាក់ បុរសរាងខ្ពស់ស្រឡះរូបនេះ បានទាញក្រដាសសចេញពីដងខ្លួន ក្រោយដើរបង្ហាញម៉ូដបានប៉ុន្មានជុំ។ ភ្ញៀវទាំងអស់ក្នុងសាល បានទះដៃលើកទឹកចិត្តនាង។
រូបថតអនុស្សាវរីយ៍ អ្នកចូលរួម
«ទឹកដែលយើងថតភ្ជាប់ជាមួយរូបសិល្បៈ យើងចង់បង្ហាញពីការលាងសម្អាត ភាពមិនមែនជាខ្លួនយើង។ ក្រដាសប្រៀបបាននឹងសង្គមមួយ ដែលរើសអើងសូម្បីតែការស្លៀកពាក់ រូបរាង និងពណ៌សម្បុរ។ ក្រដាសដែលដាក់ត្រឹមករ បង្ហាញថាពួកយើងថប់បារម្ភ និងមិនហ៊ានធ្វើអ្វីដែលខ្លួនចង់ធ្វើ ព្រោះតែសម្ពាធពីមនុស្សខាងក្រៅ»។ នេះជាការពន្យល់របស់ រ៉ាពេជ្រ។
អ្នកនាង ឈួន ធីតា ជាសហស្ថាបនិករបស់ទីសុវត្ថិភាពបាត់ដំបង បានប្រាប់សារព័ត៌មានថ្មីៗថា គោលបំណងនៃការរៀបចំពិព័រណ៍ថ្ងៃនេះ គឺចង់បន្លឺសំឡេងក្រុមអ្នកស្រឡាញ់ភេទដូចគ្នា ឱ្យមានឱកាសជួបមនុស្សគ្រប់មជ្ឈដ្ឋាន បង្ហាញពីទេពកោសល្យ និងសមត្ថភាព។ បញ្ឈប់ការតូចចិត្ត បង្អាប់ខ្លួនឯង បាក់ទឹកចិត្ត និងគិតថាខ្លួនឯងធ្វើមិនបាន។ ការតាំងពិព័រណ៍មួយនេះ បង្ហាញថាពួកគេអាចធ្វើបាន គ្រាន់តែថាតើសង្គមមួយ ផ្ដល់ឱកាសឱ្យពួកគេកម្រិតណា? នារីសម្បុរស្រអែមរូបនេះ ថាការតាំងពិព័រណ៍នេះ គឺជាមធ្យោបាយបង្កើតសន្តិភាពផ្លូវចិត្ត។
សហស្ថាបនិក “ទីសុវត្ថិភាពបាត់ដំបង”រូបនេះ ថាការតាំងពិព័រណ៍រូបថត ស្ដីពីអ្នកស្រឡាញ់ភេទដូចគ្នានេះ គឺជាគម្រោងមួយបង្ហាញពីផលប៉ះពាល់ ទាំងផ្លូវចិត្តនិងផ្លូវកាយ របស់អ្នកស្រឡាញ់ភេទដូចគ្នា ដែលទទួលរងពីសង្គម និងគ្រួសារ។ អ្នកខេត្តបាត់ដំបង វ័យ៣៥ឆ្នាំរូបនេះ ថាខ្លួនចង់ឱ្យមានទីកន្លែងសុវត្ថិភាពមួយ សម្រាប់អ្នកស្រឡាញ់ភេទដូចគ្នា អាចបញ្ចេញអារម្មណ៍ និងបង្ហាញការគិតរបស់ខ្លួន ទៅកាន់អ្នកណាដែលពួកគេទុកចិត្តបាន ទើបបានជាអ្នកនាង បង្កើត”ទីសុវត្ថិភាពបាត់ដំបង” ឡើង។
លោក ហួរ ពៅ ដើរបង្ហាញម៉ូត ក្នុងកម្មវិធីតាំងពិព័រណ៍
អ្នកនាង ធីតា ពន្យល់៖«យើងចង់បង្ហាញអ្វីដែលជាខ្លួនយើង។ នៅភូមិស្រុករបស់យើង នៅជិតក្រុមគ្រួសារ និងអ្នកដែលយើងស្រឡាញ់ ដូច្នេះហើយទើបយើងនឹកឃើញបង្កើត”ទីសុវត្ថិភាពបាត់ដំបង” ក្នុងខេត្តបាត់ដំបងឡើង តាំងពីឆ្នាំ២០១៩។ អ្នកខ្លះមានជំនាញខាងរចនាម៉ូត អ្នកខ្លះមានជាថវិកា ហើយយើងកៀរគរសហគមន៍ ដើម្បីឱ្យបានជួបជជែកគ្នា ពីរឿងក្នុងចិត្ត ដើម្បីឱ្យអាចជួយដោះស្រាយ លើកទឹកចិត្តគ្នាទៅវិញទៅមក។
ម្ចាស់ស្នាដៃទាញហែកថង់ប្លាស្ទិក ឱ្យរហែកចេញពីមុខដោយដៃខ្លួនឯង ធីតា ថារូបរបស់អ្នកនាង ចង់បង្ហាញពី ការជំនះសម្ពាធផ្លូវអារម្មណ៍។ តាមរយៈរូបរបស់ខ្លួន នាងក៏ចង់បង្ហាញថា បើទោះបីជាសង្គម និងគ្រួសារដាក់សម្ពាធយ៉ាងណា ក៏នាងនៅតែឈរ នៅតែរឹងមាំ ហើយហែករនាំងទាំងអស់នោះ ដើម្បីបញ្ជាក់ថា នាងមានសិទ្ធិរស់នៅជាខ្លួននាង។
«ខ្ញុំតែងសួរថា សិទ្ធិរបស់ខ្ញុំនៅទីណា? សំឡេងរបស់ខ្ញុំម្ដេចក៏គេមិនឮសោះ? អ្វីដែលខ្ញុំចង់សំដៅ គឺក្រុមមួយដែលតូច សង្គមតែងតែគិតថា គាត់មិនមែនជាផ្នែកមួយរបស់សង្គមទេ។ ខ្ញុំធ្លាប់និយាយទៅកាន់គ្រួសារខ្ញុំ ប៉ុន្តែគ្រួសារខ្ញុំគិតថាមិនសំខាន់ទេ។ ប៉ុន្តែពាក្យដដែលនេះ ចេញពីមាត់មនុស្សមាន(ភេទ) ដែលក្រុមគ្រួសារខ្ញុំទទួលយក បែរជាសម្ដីនោះត្រូវបានឱ្យតម្លៃ ហើយគិតថានោះគឺជាគំនិតល្អ»។ នេះជាការត្អូញត្អែររបស់ នារីស្រឡាញ់ភេទដូចគ្នា ធីតា។
វិលទៅលោក ពៅ វិញ លោកបានបង្ហាញថាខ្លួនជាមនុស្សភេទទី៣ ទៅកាន់គ្រួសារ តាំងពីអាយុ១៧ឆ្នាំ។ បុរសសប្បុរស ពៅ ថាកាលនោះគ្រួសាររបស់លោក ពិតជាពិបាកទទួលយកការពិតនេះណាស់។ បុគ្គលិកអង្គការក្រៅរដ្ឋាភិបាលរូបនេះបន្ថែមថា តាំងពីដើមរៀងមក អ្នកស្រឡាញ់ភេទដូចគ្នា ទទួលបានការរើសអើងច្រើនពីក្នុងគ្រួសារ សង្គមខាងក្រៅ និងកន្លែងការងារជាដើម។
បុរសរូបនេះ កំពុងគូររូបបង្ហាញពីអារម្មណ៍របស់ខ្លួន នៅចំពោះមុខរូបថតរបស់លោក
«ពេលពួកយើងទៅដាក់ពាក្យធ្វើការ ត្រូវបានគេបដិសេធ ដោយសារតែគេមើលតែសម្បកក្រៅ។ បើទោះបីជាការរើសអើង បានកាត់បន្ថយខ្លះក្ដី ប៉ុន្តែវានៅតែមាន។ ខ្ញុំចង់ឱ្យមានការលុបបំបាត់ ការរើសអើង។ ខ្ញុំក៏ធ្លាប់មិនទទួលបាន ការគាំទ្រពីគ្រួសារដែរ។ ខ្ញុំបានប្រាប់គ្រួសារថា កុំបង្ខំខ្ញុំអី នេះគឺជាក្ដីស្រឡាញ់របស់ខ្ញុំ នេះគឺជាខ្លួនរបស់ខ្ញុំ។ ខ្ញុំមិនអាចធ្វើខ្លួនជាមនុស្សប្រុសបានទេ។ ខ្ញុំក៏ចង់បានសិទ្ធិ រស់នៅក្នុងសង្គមដូចគេដែរ»។ នេះជាការត្អូញត្អែររបស់អ្នកនាងពៅ។
រ៉ាពេជ្រ ដែលមានអាយុ ២១ឆ្នាំ បានប្រាប់ពីអត្តចរិតរបស់ខ្លួន ទៅគ្រួសារពិសេសម្ដាយឪពុក កាលពីគេអាយុប្រហែល១៧ឆ្នាំ។ ជាកូនពៅក្នុងចំណោមបងប្អូនប្រុស៥នាក់ ពេជ្រ ថាដើមឡើយគ្រួសាររបស់លោក មិនសូវគាំទ្រខ្លួនឡើង ដ្បិតអីពួកគេគិតថា ពេជ្រ នៅក្មេងគិតមិនបានវែងឆ្ងាយ។ បន្ថែមពីនោះ គ្រួសាររបស់បុរសភេទទី៣រូបនេះ ក៏ព្រួយបារម្ភអំពីជីវភាពទៅថ្ងៃមុខរបស់គេដែរ។
និយាយបណ្ដើរញញឹមបណ្ដើរ រ៉ាពេជ្រ ថាពេលនេះគ្រួសាររបស់លោក បានគាំទ្រលោកហើយ។ គាំទ្រដោយសាគ្រួសារទុកចិត្ត ព្រោះឃើញ ពេជ្រ មានចំណេះនិងជំនាញអាចរកប្រាក់ចិញ្ចឹមខ្លួនបាន ក្នុងនាមជាមនុស្សភេទទី៣។ បុរសមកពីខេត្តបាត់ដំបងរូបនេះ បានចូលរៀនជំនាញរបាំប្រពៃណី របាំសហសម័យ និងរបាំប្រជាប្រិយ នៅអង្គការហ្វារពន្លឺសិល្បៈ ខេត្តបាត់ដំបង កាលពីឆ្នាំ២០១៧។ ពេលនេះបុរសសម្បុរស្រអែមស្រស់រូបនេះ អាចយកជំនាញទាំងនោះ រកប្រាក់ចិញ្ចឹមខ្លួនបាន។ បើទោះបីជាឆ្លងផុតដំណាក់កាលគ្រួសារក៏ពិតមែន ប៉ុន្តែការរើសអើងក្នុងសង្គមទូទៅ នៅតែជាឧបសគ្គសម្រាប់គេដដែល។
អ្នកចូលរួមដើរទស្សនាគំនូរ
«តាំងពីដើមដល់បច្ចុប្បន្ន នៅតែមានគេរើសអើង ប៉ុន្តែពេលនេះវាក្លាយជារឿងធម្មតាវិញ។ ពេលខ្ញុំស្លៀកពាក់ដូចស្រី ផាត់មុខដូចស្រី គេថាធ្វើបែបនោះធ្វើអី គេហាមមិនឱ្យខ្ញុំធ្វើអ្វីដែលខ្ញុំពេញចិត្ត។ ចំពោះខ្ញុំពាក្យសម្ដីប៉ះពាល់អារម្មណ៍ខ្លាំង។ ខ្ញុំមិនចង់ឱ្យគេហៅខ្ញុំថាជាខ្ទើយ បងស្រី ឬអ្នកនាងទេ ប៉ុន្តែខ្ញុំចង់ឱ្យហៅឈ្មោះខ្ញុំល្អជាង»។ នេះជាការបញ្ជាក់បន្ថែមរបស់លោក ឡឹក រ៉ាពេជ្រ។
អ្នកនាង ធីតា ថាឆ្លងកាត់ពេលវេលាដែលនាង រស់នៅក្នុងប្រអប់ មិនមែនជាខ្លួនឯង នាងមានភាពតានតឹង មានសម្ពាធផ្លូវចិត្ត។ ប៉ុន្តែនៅពេលនាងចាប់ផ្ដើមរស់ជាខ្លួនឯង នាងអាចរកឃើញមិត្តភ័ក្ដិពិតប្រាកដ ក្រុមគ្រួសារពិតប្រាកដ អ្នកគាំទ្រនាងពិតប្រាកដ ហើយនាងរស់នៅដោយភាពជឿជាក់ មានសុភមង្គល និងស្រាលខ្លួន។
ក្នុងទឹកមុខស្មើហាក់បង្កប់ទុក្ខកង្វល់ លោក ពៅ ដែលមានវ័យជាង៥០ឆ្នាំ ចង់ឱ្យរាជរដ្ឋាភិបាល ផ្ដល់សិទ្ធិឱ្យអ្នកស្រឡាញ់ភេទដូចគ្នា ទទួលបានច្បាប់រៀបអាពាហ៍ពិពាហ៍ ដូចមនុស្សទូទៅ ដ្បិតអីការទាមទារនេះ ធ្វើឡើងតាំងពីឆ្នាំ១៩៩២ ប៉ុន្តែរហូតមកដល់បច្ចុប្បន្ន នៅមិនទាន់ទទួលបានចម្លើយ។
«សុំសិទ្ធិរៀបអាពាហ៍ពិពាហ៍ពេញច្បាប់។ សុំសិទ្ធិប្ដូរអត្តសញ្ញាណបណ្ណ បញ្ជាក់ពីយេនដ័រ។ និងសុំច្បាប់ស្មុំកូន»។ នេះជាការស្នើរសុំរបស់អ្នកនាង ហួរ ពៅ។
អ្នកនាង ធីតា បានបញ្ជាក់ថា កន្លងទៅក្រុមរបស់អ្នកនាង បានធ្វើវេទិកាសិល្បៈផ្សេងៗ ដើម្បីបន្លឺសំឡេងក្រុមអ្នកស្រឡាញ់ភេទដូចគ្នា ដើម្បីបញ្ឈប់ការរើសអើង ពីសង្គម ពីកន្លែងធ្វើការ សាលារៀន និងក្រុមគ្រួសារ។ មធ្យោបាយនោះ ត្រូវបាននារីរាងតូចសក់ខ្លីត្រឹមករូបនេះ អះអាងថាការគិតរបស់សង្គម ទៅកាន់អ្នកស្រឡាញភេទដូចគ្នា មានការកែប្រែច្រើន។ អ្នកនាងស្នើឱ្យសង្គមបន្តគាំទ្រ ដើម្បីបន្លឺសំឡេងក្រុមអ្នកស្រឡាញ់ភេទដូចគ្នា ក្នុងដំណើរការអភិវឌ្ឍន៍សង្គមជាតិ។
អ្នកនាងក៏បានសំណូមពរ ដល់អ្នកស្រឡាញ់ភេទដូចគ្នា រស់នៅជាខ្លួនឯង ហ៊ានបង្ហាញថាខ្លួនឯងជានរណា។ ប៉ុន្តែមិនមែនមានន័យថា ត្រូវតែបង្ខំខ្លួនឯងឱ្យទៅប្រាប់អ្នកដទៃឡើង។ ផ្ទុយទៅវិញអ្នកនាងមានន័យថា នៅពេលដែលពួកគេត្រៀមខ្លួនរួចរាល់ហើយ ជឿជាក់ និងស្រឡាញ់ខ្លួនឯង ហើយគិតថាការបង្ហាញភាពជាខ្លួនឯងជាសាធារណៈ គឺជាសុភមង្គល ចាំពួកគេបង្ហាញ៕