ភ្នំពេញ៖ កុលាលភាជន៍ គំនូរសហសម័យ និងសិល្បៈភាពយន្តរបស់ខ្មែរ ត្រូវបានដាក់តាំងពិព័រណ៍ ក៏ដូចជាចាក់បញ្ចាំងនៅ The Peak ដើម្បីបង្ហាញពីភាពប្រណីត និងគំនិតដ៏ស៊ីជម្រៅនៃវប្បធម៌ខ្មែរ ទៅកាន់សាធារណជនជាតិ និងអន្តរជាតិទស្សនា។ ស្នាដៃសិល្បៈទាំងនោះ ត្រូវបានសិល្បករ និងវិចិត្រករខ្មែរ រចនាឡើង ដោយបង្កប់នូវការអំណត់ព្យាយាម និងរំលេចគុណតម្លៃមរតកដូនតាខ្មែរ។
លោក សុន សីហាក់ ជាម្ចាស់សិប្បកម្មមរតកកុលាលភាជន៍ ដែលមានទីតាំងនៅខេត្តសៀមរាប បាននាំយកកុលាលភាជន៍របស់ខ្លួនមកតាំងពិព័រណ៍នៅ The Peak។ បុរសដែលចេះធ្វើកុលាលភាជន៍តាំងពីឆ្នាំ២០០៣រូបនេះ ថាសិប្បកម្មរបស់លោក ធ្វើដោយដៃហើយផ្ដោតសំខាន់លើគុណភាពនិងភាពប្រណីត។ ជាកូនអ្នកធ្វើក្អមឆ្នាំងត៣ជំនាន់ពីដូនតា លោក សីហាក់ ថាហាងរបស់លោកមានលក់កុលាលភាជន៍រង្វង់១០០ម៉ូត ដែលមានម៉ូតបុរាណខ្មែរ សហសម័យ និងបែបបរទេស។
លោក សុន សីហាក់ ម្ចាស់សិប្បកម្មមរតកកុលាលភាជន៍
បង្កើតអាជីវកម្មតាំងពីឆ្នាំ២០១៥ ផលិតផលកុលាលភាជន៍របស់លោក មានតម្លៃចាប់ពី២ពាន់រៀល រហូតដល់ តម្លៃ២លានរៀល។ បុរសសម្បុរស្រអែមរូបនេះ ថាបច្ចុប្បន្នផលិតផលរបស់លោក មានការគាំទ្រទាំងភ្ញៀវជាតិនិងអន្តរជាតិ ដោយសារតែគុណភាព។ មូលហេតុដែលលោក ប្រឹងប្រែងរក្សាគុណភាពខ្ពស់ នៃការផលិតកុលាលភាជន៍ខ្មែរ ក៏ដោយសារលោកមានកម្លាំងចិត្តពីពាក្យថា ជាកេរដំណែលដូនតា។
«នេះគឺជាកេរដំណែលដូនតា ដូច្នេះដូនតាយើងគាត់ចាំមើលថា តើពួកយើងធ្វើអ្វីបានខ្លះបន្តពីគាត់? ហើយយើងមានអ្វីចែករំលែក ទៅក្មេងជំនាន់ក្រោយបន្តទៀត។ ខ្ញុំចង់ផ្សាយទៅប្រជាជនខ្មែរយើងគ្រប់រូប ថានេះគឺជាកុលាលភាជន៍របស់ខ្មែរយើង»។ នេះជាការពន្យល់របស់ ម្ចាស់សិប្បកម្មមរតកកុលាលភាជន៍។
យ៉ាងណាក៏ដោយ ការនាំយកកុលាលភាជន៍របស់ខ្លួន មកដាក់តាំងពិព័រណ៍នៅ The Peak លោក សុន សីហាក់ ថានេះជាចំណុចមួយ ដែលធ្វើឱ្យសិប្បកម្មរបស់លោក ឈានជើងទៅកាន់ពិភពលោក កាន់តែលឿនជាងមុន។ ក៏មានន័យថា ពិភពលោកនឹងបានស្គាល់ កុលាលភាជន៍របស់ខ្មែរ កាន់តែច្បាស់ជាងមុនមួយកម្រិតទៀត។
កុលាលភាជន៍
ចំណែកលោក ហ៊ឹម សុភី ជាសាស្រ្តាចារ្យតន្ត្រី បានប្រាប់សារព័ត៌មានថ្មីៗថា ការផ្សារភ្ជាប់សិល្បៈជាមួយនឹងអាជីវកម្ម ពិតជាមានសារសំខាន់ណាស់ ព្រោះថាការអភិវឌ្ឍប្រទេសទាំងបច្ចុប្បន្ននិងអនាគត មានទំនាក់ទំនងយ៉ាងជិនស្និទ្ធិនិងវិស័យសិល្បៈវប្បធម៌។ លោកសង្កត់ធ្ងន់ថា បើគ្មានសិល្បៈ ការអភិវឌ្ឍសេដ្ឋកិច្ចក៏ពិបាកដែរ។ លោក សុភី បន្ថែមទៀតថា The Peak មានភាពឆ្លាតវ័យ ដែលខ្លួនជាផ្សារលក់ទំនិញ ប៉ុន្តែយកសិល្បៈមកផ្សព្វផ្សាយ ព្រោះសិល្បៈគឺជាផ្នែកមួយនៃការបណ្ដុះឱ្យមនុស្សធ្វើអ្វីដែលថ្មី។
លោក ហ៊ឹម សុភី ពន្យល់៖«សិល្បៈតែងតែដើរមុនគំនិតមនុស្សធម្មតា។ The Peak មានភាពវ័យឆ្លាត សូម្បីតែចំណងជើងក៏គេគិតដែរ “វប្បធម៌ពនេចរ” បានន័យថាវប្បធម៌មិននៅមួយកន្លែងទេ។ វប្បធម៌គឺជាកម្មសិទ្ធិរបស់មនុស្សទូទាំងពិភពលោក។ ដូចជាប្រាសាទអង្គរវត្ត សាងដោយខ្មែរយើងទេ ប៉ុន្តែអ្នកណាក៏ស្រឡាញ់ អ្នកណាក៏ពេញចិត្ត គឺវាមានន័យអ៊ីចឹង។ ការតាំងបង្ហាញនេះ អាចនិយាយបានថា គឺជាការផ្សារភ្ជាប់គ្នានៃវិស័យវប្បធម៌ និងសេដ្ឋកិច្ច។ ដូចជា Kpopនៅកូរ៉េ គាត់ស្លៀកពាក់ខោអាចថ្មីៗ កាត់សក់ប្លែកៗ មួយពិភពលោកទិញសម្លៀកបំពាក់តាម Kpop លាន់។ ខ្ញុំឧទាហរណ៍តូចតាចទេ ប៉ុន្តែវាមានច្រើនជាងនេះទៀត»។
លោក ហ៊ឹម សុភី សាស្ត្រាចារ្យភ្លេង
ទោះជាយ៉ាងណាក៏ដោយ សាស្រ្តាចារ្យតន្រ្តីរូបនេះ អះអាងថាប្រសិនមិនផ្សារភ្ជាប់វិស័យវប្បធម៌ ជាមួយនឹងជំនួញទេ សិល្បៈរបស់ខ្មែរក៏មិនអាចអភិវឌ្ឍន៍បានដែរ។ និយាយដោយទំនុកចិត្ត លោក សុភី ថាសិល្បៈមានទ្រឹស្ដីពីរ គឺអភិរក្ស និងអភិវឌ្ឍន៍។ អភិវឌ្ឍន៍ដើម្បីអភិរក្ស ប៉ុន្តែប្រសិនគិតតែអភិរក្ស មិនអភិវឌ្ឍន៍ នោះសិល្បៈនឹងរុះរោយ។ ហើយប្រសិនគិតតែអភិវឌ្ឍន៍ ដោយមិនគិតពីអ្វីដែលមានពីមុនមក nនិងមិនព្រមថែរក្សា ក៏មិនល្អដែរ។ ទោះជាយ៉ាងណា លោកទទូចឱ្យមានតុល្យភាព រវាងសិល្បៈកម្សាន្ត(សិល្បៈដើម្បីលម្ហែអារម្មណ៍) និងសិល្បៈអប់រំ។
«អ្នកខ្លះគិតថាអភិវឌ្ឍន៍ទៅ នឹងធ្វើឱ្យបាត់របស់ពីដើម។ មិនមែនបាត់ទេ សូម្បីតែយើងរៀនពីប្រវត្តិសិល្បៈខ្មែរ តាំងពីរចនាបថដំបូង រហូតដល់សម័យអង្គរ មានការសាងសង់ប្រាសាទខុសៗគ្នា។ ប្រសិនសិល្បៈកម្សាន្តលើសលុបជាងសិល្បៈអប់រំ ក៏មិនកើតដែរ។ ដូច្នេះយើងត្រូវគិតពីរឿងនេះដែរ។ សិល្បៈអប់រំផ្ដល់ពុទ្ធិដល់សង្គម និងអត្តសញ្ញាណជាតិ»។ នេះជាអ្វីដែលលោក សុភី ពន្យល់។
លោក Pierre Balsan នាយកប្រតិបត្តិក្រុមហ៊ុន Blue Bell Cambodia បានលើកឡើងថា The Peak នឹងផ្ដល់បទពិសោធវប្បធម៌លំដាប់ពិភពលោក ដើម្បីទាក់ទាញអ្នកទស្សនា និងវិនិយោគគិនដែលមានការចំណាយខ្ពស់។ លោកថាសកម្មភាពវប្បធម៌ ដែលមានរយៈពេល៥ថ្ងៃ បានបង្ហាញពីសិល្បៈសហសម័យខ្មែរល្អបំផុត កុលាលភាជន៍ និងភាពយន្ត ដែលជាស្នាដៃរបស់វិចិត្រខ្មែរដ៏ល្បីល្បាញជាច្រើនរូប។ លោកថាម្ចាស់ស្នាដៃសិល្បៈ ដែលបានដាក់តាំងបង្ហាញទាំងនោះ បានបង្កើតស្នាដៃរបស់ខ្លួន ដោយមានជំនឿយ៉ាងមុតមាំ។
លោក Pierre Balsan នាយក ប្រតិបត្តិ ក្រុមហ៊ុន Blue Bell Cambodia(រូបស្ដាំដៃ)
ក៏មានដែរការចាក់បញ្ចាំងរឿង “ទេពសត្ថា” នៅ The Peak ដែលលោក Pierre Balsan បានស្ញើចសរសើរថា ភាពយន្តនេះមិនត្រឹមតែបង្ហាញពី បេតិកភណ្ឌវប្បធម៌ដ៏សម្បូរបែប របស់ប្រទេសកម្ពុជាតាមរយៈការវិវត្តិ នៃរបាំព្រះរាជទ្រព្យប៉ុណ្ណោះទេ ប៉ុន្តែភាពយន្តនេះ បានបង្ហាញពីរបៀបដែល ប្រពៃណីដ៏ចំណាស់មួយ អាចមានភាពទំនើប និងពាក់ព័ន្ធនៅក្នុងពិភពលោកសព្វថ្ងៃ។
សូមបញ្ជាក់ថា ផ្សារទំនើប The Peak នឹងបើកដំណើរការនៅឆ្នាំ២០២៤ខាងមុខ។ The Peak នឹងផ្លាស់ប្ដូរវិស័យលក់រាយរបស់ប្រទេសកម្ពុជា ដោយផ្ដោតលើភាពប្រណីត តំណាងឱ្យភាពខ្លាំង នៃការអភិវឌ្ឍន៍សេដ្ឋកិច្ចរបស់កម្ពុជា៕