ការប្រកួតបាល់ទះមិត្តភាពជាតិរវាងម្ចាស់ពានរង្វាន់បាល់ទះ សម្តេច ស ខេង វិសាខា និងម្ចាស់ពានរង្វាន់បាល់ទះកីឡាជាតិលើក៣ ក្រសួងមហាផ្ទៃ នឹងត្រូវជួបប្រកួតគ្នានៅថ្ងៃទី១៦ ខែមិថុនា ឆ្នាំ២០២៣ នៅទីលានបាល់ទះក្នុងសាល នាបរិវេណពហុកីឡដ្ឋានជាតិអូឡាំពិក វេលាម៉ោង ៦ល្ងាចតទៅ។ ក្នុងការប្រកួតរវាងក្រុមខ្លាំងទាំងពីរនេះដែរមន្រ្តីសហព័ន្ធថាជាការកម្តៅសាច់ដុំមុនក្លិបបាល់ទះវិសាខា ចេញប្រឡោកពានអន្តរជាតិក្រៅស្រុក។

 

លោក អាំង សិរីពិសិដ្ឋ និយាយថា៖«ការប្រកួតនេះធ្វើឡើង គឺដោយមើលឃើញគុណផលរបស់ក្លិបវិសាខា គាត់នឹងត្រូវចេញទៅប្រកួតពានរង្វាន់ Championship នៅម៉ាឡេស៊ី»។ ចំពោះឈ្មោះពេញនៃពានរង្វាន់ក្លិបនោះដែរលោកអគ្គលេខាធិការបញ្ជាក់ថា ខាងម៉ាឡេស៊ីមិនទាន់បានកំណត់ជាក់លាក់នោះទេ។
 

សម្រាប់ក្លិបយក្សក្នុងប្រទេសកម្ពុជាបច្ចុប្បន្នគឺ វិសាខា និងក្រសួងមហាផ្ទៃ សុទ្ធសឹងតែជាក្រុមខ្លាំងដែលនឹងត្រូវតតាំងគ្នា។ ការប្រកួតចុងក្រោយក្រសួងមហាផ្ទៃ បានត្រឹមជើងឯករងពានរង្វាន់បាល់ទះ សម្តេច ស ខេង ខណៈវិសាខា ជាម្ចាស់ជើងឯក ដែលបញ្ចប់ទាំងបីសិត វិសាខា ឈ្នះក្រសួងមហាផ្ទៃ ៣-០សិត(២៥-២១,២៥-២៣,២៥-២៣)៕