អន្តរជាតិ
ចង់មានឈ្មោះជាបញ្ញវន្ត សេដ្ឋីចិនម្នាក់ព្យាយាមប្រឡងចូលមហាវិទ្យាល័យលើកទី២៧
× ជាមនុស្សជោគជ័យក្នុងអាជីព ដោយចាប់ផ្តើមការងារជាបុគ្គលិករោងចក្រ រហូតក្លាយជាម្ចាស់ក្រុមហ៊ុនផលិតគ្រឿងសំណង់ដ៏រីកចម្រើន លោក Liang Shi មិនសមប្រកបនឹងការរៀនសូត្រនោះឡើយ។ ដោយពឹងលើសមត្ថភាពផ្ទាល់ខ្លួន សេដ្ឋីចិនរូបនេះ មិនបោះបង់ការតស៊ូរបស់ខ្លួនក្នុងការប្រឡងចូលមហាវិទ្យាល័យចាប់តាំងពីឆ្នាំ១៩៨៣មក។ លោកបន្តព្យាយាមលើកទី២៧ ដោយរំពឹងថាសម្រេចដោយជោគជ័យ។
Gaokao ជាការប្រឡងពិសេស និងតឹងរ៉ឹងមួយដើម្បីទទួលបានលំដាប់ពិន្ទុ និងមានឱកាសចូលរៀនមហាវិទ្យាល័យល្បីៗនៅប្រទេសចិន។ វ័យ៥៦ឆ្នាំ មានឈ្មោះជានិស្សិតមហាវិទ្យាល័យ Sichuan គឺជាក្តីសុបិនរបស់លោក Liang Shi ចាប់តាំងពីការព្យាយាមលើកដំបូងនៅឆ្នាំ១៩៨៣មក។
ក្នុងបទសម្ភាសជាមួយសារព័ត៌មានរដ្ឋចិន China News កាលពីឆ្នាំ២០២២ លោក Liang Shi ដែលជាអ្នកជំនួញដ៏ជោគជ័យម្នាក់ បានអះអាងថា ពិន្ទុដែលទទួលបានកន្លងមក នៅមានកម្រិតទាប ប៉ុន្តែការតាំងចិត្តរបស់លោកខ្ពស់ ដោយបន្តការព្យាយាមរហូតទាល់តែជាប់។
លោកបានព្យាយាមប្រឡង Gaokao ជាបន្តបន្ទាប់លើកឡើងកាលពីឆ្នាំ១៩៩២ ដែលកាលណោះមានការកំណត់អាយុបេក្ខជនត្រឹមអាយុ២៥ឆ្នាំ។ ប៉ុន្តែក្រោយការលុបលក្ខខណ្ឌនេះចោល លោក Liang Shi បានបន្តព្យាយាមចាប់ពីឆ្នាំ២០០១មក ដែលមានរហូតដល់ទៅ២៧លើក។
លោកបានប្រឡងជាប់ក្នុងចំណោមបេក្ខជនសរុបប្រមាណ១៣លាននាក់។ «មិនអាចទៅរួចនោះឡើយ ដែលគិតថា ខ្ញុំមិនអាចប្រឡងជាប់បន្តទៅរៀននៅសាកលវិទ្យាល័យ។ លោកបានថ្លែងប្រាប់ AFP យ៉ាងដូច្នេះ ដោយបន្ថែមថា៖ «ខ្ញុំពិតជាចង់រៀននៅមហាវិទ្យាល័យ និងដើម្បីក្លាយជាបញ្ញវន្តមួយរូប»។
បើប្រឡងជាប់លោក Liang Shi នឹងបន្តផ្តោតលើការសិក្សា ហើយនឹងលំហែរខួរក្បាលតាមរយៈការលេងម៉ាជាំង៣យប់៣ថ្ងៃជាមួយមិត្តភក្តិរបស់ខ្លួន៕
ប្រភពរូបថត៖ AFP
© រក្សាសិទ្ធិដោយ thmeythmey.com