ផ្អែកលើស្ថានភាពចំណូលពន្ធដារដែលប្រមូលបានក្នុងរយៈពេល៥ខែមកនេះ លោក គង់ វិបុល អគ្គនាយកនៃអគ្គនាយកដ្ឋានពន្ធដារ រំពឹងថា ការអនុវត្តការងារគ្រប់គ្រងប្រមូលចំណូលពន្ធសម្រាប់ឆ្នាំ២០២៣ នឹងសម្រេចបានគ្រប់តាមផែនការ ដែលមានទំហំប្រមាណ ៣ ៥៧១.៦៩ លានដុល្លារ។

 

បើតាមលោកអគ្គនាយកពន្ធដារ កាលពីខែមីនា ចំណូលពន្ធបានហក់ខ្ពស់ដែលសម្រេចបានដល់ ៨០៤.៤៥ លានដុល្លារ ធៀបនឹងខែមីនា ឆ្នាំ២០២២ សម្រេចបាន៧៥០.៧១ លានដុល្លារ ប៉ុណ្ណោះ។

 

ដើម្បីសម្រេចបាននូវផែនការចំណូលជាតិនេះលោក គង់ វិបុល បានលើកទឹកចិត្ត និងជំរុញថ្នាក់ដឹកនាំ និងមន្ត្រីពន្ធដារគ្រប់លំដាប់ថ្នាក់ ឱ្យបន្តចុះត្រួតពិនិត្យជាក់ស្តែងតាមរោងចក្រ ដើម្បីតាមដាន និងថែទាំបណ្តាញ និងឧបករណ៍វាស់ចំណុះស្រាបៀរ និងភេសជ្ជៈគ្មានជាតិអាល់កុលរបស់សហគ្រាសផលិតក្នុងស្រុក (Flowmeter)។ លោក បានបញ្ជាក់ថា ករណីរកឃើញភាពមិនប្រក្រតីណាមួយ ហើយមានការគេចវេះ និងការបំពានការអនុវត្តកាតព្វកិច្ចបំពាក់ឧបករណ៍វាស់ចំណុះស្រាបៀរនេះ អគ្គនាយកដ្ឋានពន្ធដារ នឹងចាត់វិធានការពន្ធដារយ៉ាងម៉ឺងម៉ាត់ ដើម្បីធានាបាននូវតម្លាភាពនិងការប្រកួតប្រជែងស្មើភាពសម្រាប់វិស័យនេះ។

 

ជាមួយគ្នានេះ អគ្គនាយកដ្ឋានពន្ធដារបន្តអនុវត្តវិធានការទារបំណុលពន្ធតាមនីតិវិធីជាធរមាន ចំពោះសហគ្រាសដែលជំពាក់បំណុល ហើយមិនព្រមបានចូលខ្លួនមកទូទាត់ ឬដោះស្រាយឱ្យបានត្រឹមត្រូវ។ ពន្ធដារ ក៏ពង្រឹងការងារពាក់ព័ន្ធនឹងពន្ធអចលនទ្រព្យ និងយកចិត្តទុកដាក់ចំពោះការស្នើសុំបិទរោងសហគ្រាសជាស្ថាពរ និងពង្រឹងលើការងារសវនកម្មសម្រាប់សហគ្រាសស្នើសុំបិទ ផងដែរ៕