​

លោក លី ធុជ បានបន្តថា ការសម្រេចបាននូវសមិទ្ធផលការងារបោសសម្អាតមីន រយៈពេល ៣០ឆ្នាំនៅកម្ពុជា គឺមិនអាចខ្វះបាននោះទេ ពីការចូលរួមគាំទ្រយ៉ាងសកម្មរបស់ជប៉ុន ដែលជាដៃគូមួយដ៏លេចធ្លោ។ គិតចាប់តាំងពីឆ្នាំ១៩៩៤ រដ្ឋាភិបាលជប៉ុន បានផ្ដល់ជំនួយលើវិស័យមីនជាង ២០០លាន​ដុល្លារអាម៉េរិក ដល់មជ្ឈមណ្ឌលសកម្មភាពកំចាត់មីនកម្ពុជា។ ក្នុងនោះរួមមាន គម្រោងសមាហរណកម្មបោសសម្អាតមីន ជួយរងគ្រោះដោយសារមីន ជំនួយសម្ភារបច្ចេកទេសបោសសម្អាតមីន កិច្ចសហប្រតិបត្តិការបច្ចេកទេស កម្មវិធីហ្វឹកហ្វឺន South-South Cooperation និងគម្រោងហ្វឹកហ្វឺនមន្រ្តីជំនាញសកម្មភាពមីននៃប្រទេសអ៊ុយក្រែនផងដែរ។

 

អនុប្រធានទី១ អាជ្ញាធរមីនរូបនេះ បានបញ្ជាក់ថា៖« ខ្ញុំនិងប្រជាជនកម្ពុជា ពិតជាមិនអាចបំភ្លេចបានទេ នូវគុណបការៈដ៏ថ្លៃថ្លារបស់រដ្ឋាភិបាលនិងប្រជាជនជប៉ុន ដែលបានជួយឧបត្ថម្ភគាំទ្រដល់កម្ពុជា រួមទាំងការពលីជីវិតរបស់កុលបុត្រជប៉ុនចំនួនពីររូប ដើម្បីបុព្វហេតុជាតិកម្ពុជា»។

 

ជាមួយគ្នានេះ លោក Ueno Atsushi បានវាយតម្លៃខ្ពស់ចំពោះទំនាក់ទំនងការទូតជាប្រវត្តិសាស្រ្តរវាងកម្ពុជា-ជប៉ុន ដែលជាទំនាក់ទំនងល្អរវាងប្រទេសទាំងពីរ។ ឯកអគ្គរាជទូតជប៉ុនរូបនេះ ក៏បានថ្លែងអំណរគុណដល់រដ្ឋាភិបាលកម្ពុជា ដែលតែងតែផ្តល់នូវកិច្ចសហប្រតិបត្តិយ៉ាងជិតស្និទ្ធ។ 

 

លោក Ueno Atsushi បានបញ្ជាក់ថា៖« រដ្ឋាភិបាលជប៉ុននៅតែបន្តគាំទ្រដល់កិច្ចប្រតិបត្តិការបោសសម្អាតមីនមនុស្សធម៌កម្ពុជា និងបន្តគាំទ្រដល់គម្រោងកម្មវិធីសហប្រតិបត្តិការត្បូង-ត្បូង (South-South Cooperation) ជាមួយអង្គភាពស៊ីម៉ាក់ តាមរយៈ JICA ជាពិសេសហ្វឹកហ្វឺនអ្នកជំនាញសកម្មភាពមីននៃប្រទេសអ៊ុយក្រែន ក៏ដូចជាបណ្តាប្រទេសដទៃទៀត»។

 

បើតាមលោក លី ធុជ កាលពីសម័យអ៊ុនតាក់ ឆ្នាំ១៩៩០-១៩៩៣ កងកម្លាំងការពារសន្តិសុខ នៃអង្គការសហប្រជាជាតិ គឺលោក Haruyuki អតីតមន្ត្រីប៉ូលីសជប៉ុន បានស្លាប់នៅខេត្តឧត្តរមានជ័យ និងលោក Atsuhito Nakata បានស្លាប់នៅខេត្តកំពង់ធំ ក្នុងពេលបំពេញបេសកកម្មនៅកម្ពុជា៕

 

ចំណងទំនាក់ទំនងការទូតជាប្រវត្តិសាស្រ្តរវាងប្រទេសទាំងពីរ រយៈពេល ៧០ឆ្នាំ ហើយជប៉ុនបានរួមចំណែកយ៉ាងសកម្ម ក្នុងដំណើរស្វែងរកសន្តិភាព និងទ្រទ្រង់ដល់ការស្តារនិងអភិវឌ្ឍន៍សេដ្ឋកិច្ចកម្ពុជា រហូតដល់មានការរីកចម្រើនដូចសព្វថ្ងៃ។ លោក លី ធុជ បានថ្លែងបែបនេះ ក្នុងជួបពិភាក្សាការងារជាមួយ លោក Ueno Atsushi ឯកអគ្គរាជទូតវិសាមញ្ញនិងពេញសមត្ថភាពជប៉ុនប្រចាំកម្ពុជា ស្តីពីភាពជាដៃគូ និងកិច្ចសហប្រតិបត្តិការសកម្មភាពមីននៅកម្ពុជា នៅថ្ងៃទី២១ ខែមិថុនា ឆ្នាំ២០២៣៕