ជាតិ
នយោបាយជាតិ
សិក្ខាកាមយោធាឥណ្ឌូណេស៊ី មកទស្សនកិច្ចនៅកម្ពុជា ដើម្បីឈ្វេងយល់ពីនយោបាយឈ្នះឈ្នះ ជំនួបរវាងមន្រ្តីយោធាកម្ពុជា (ជួរឆ្វេងដៃ) និងសិក្ខាកាមយោធាឥណ្ឌូណេស៊ី កាលពីថ្ងៃទី២០ ខែមិថុនា ឆ្នាំ២០២៣ នៅទីស្តីការក្រសួងការពារជាតិកម្ពុជា។ រូបពីក្រសួងការពារជាតិ
× គណៈប្រតិភូដែលជាសិក្ខាកាមប្រមាណ៣០នាក់ មកបំពេញទស្សនកិច្ចសិក្សានៅកម្ពុជាលើកនេះ គឺដើម្បីចង់ដឹងថា កម្ពុជា អនុវត្តនយោបាយឈ្នះឈ្នះ តាមរបៀបណា។ នេះជាការលើកឡើងរបស់លោក រ៉ូប៊ី ស៊ូហ្វារីយ៉ាឌី (Rudy Sufahriadi) មន្រ្តីយោធានជាន់ខ្ពស់របស់ឥណ្ឌូណេស៊ី និងជាប្រធានគណៈប្រតិភូ ក្នុងជំនួបជាមួយលោកនាយឧត្តមសេនីយ៍ នាង ផាត រដ្ឋលេខាធិការក្រសួងការពាតិកម្ពុជា កាលពីថ្ងៃទី២០ ខែមិថុនា ឆ្នាំ២០២៣។
លោក នាង ផាត បានឆ្លើយតបទៅកាន់គណៈប្រតិភូជាសិក្ខាកាមនៃវិទ្យាស្ថានយុទ្ធសាស្ត្រការពារជាតិឥណ្ឌូណេស៊ី អំពីយុទ្ធសាស្ត្រនយោបាយឈ្នះឈ្នះ ដែលមានសម្តេចនាយករដ្ឋមន្រ្តី ហ៊ុន សែន ជាមគ្គុទ្ទេសក៏ក្នុងការបង្រួបបង្រួមជាតិ ដោយមិនប្រកាន់និន្នាការនយោបាយ។
លោក រ៊ូប៊ី ស៊ូហ្វារីយ៉ាឌី ដែលជាអគ្គលេខាធិការនៃវិទ្យាស្ថានយុទ្ធសាស្ត្រការពារជាតិឥណ្ឌូណេស៊ី បង្ហាញវត្ថុបំណងទៀតថា ការបំពេញទស្សនកិច្ចនៅកម្ពុជា និងការចូលជួបលោក នាង ផាត ក៏ដើម្បីទទួលបទពិសោធលើកិច្ចការមួយចំនួន ដែលកម្ពុជាសម្រេចបានកន្លងមកផងដែរ។ បន្ទាប់ពីបានដឹកនាំសិក្ខាកាមទៅទស្សនកិច្ចនៅសារមន្ទីរគុកទួលស្លែង លោក លោក រ៊ូប៊ី ស៊ូហ្វារីយ៉ាឌី បង្ហាញការយល់ឃើញនៅចំពោះមុខលោក នាង ផាត ថា របបប្រល័យពូជសាសន៏ ពុំអាចអត់ឱនឲ្យបានឡើយ។
ក្រៅពីនេះ សិក្ខាកាមឥណ្ឌូណេស៊ី ចង់ដឹងពីទស្សនៈកម្ពុជា ទៅលើបញ្ហាអន្តរជាតិមួយចំនួន ដូចជា ជម្លោះនៅសមុទ្រចិនខាងត្បូង ជម្លោះចិន-អាម៉េរិក បញ្ហាសន្តិសុខ ការរៀបចំកិច្ចប្រជុំកំពូលអាស៊ាន ការរៀបចំកីឡាស៊ីហ្គេម បូករួមទាំងទំនាក់ទំនងកម្ពុជា-ឥណ្ឌូណេស៊ី។
លោក នាង ផាត អធិប្បាយថា អំឡុងកាន់តំណែងប្រធានអាស៊ានឆ្នាំ២០២២ កម្ពុជា ប្រឈមនឹងដំណោះស្រាយលើបញ្ហាធំៗជាច្រើន រួមមាន ជម្លោះសមុទ្រចិនខាងត្បូង ជម្លោះចិន-អាម៉េរិក វិបត្តិនៅមីយ៉ាម៉ា និងសង្គ្រាមរុស្សី-អ៊ុយក្រែន ជាអាទិ៍។
លោក បន្តថា បញ្ហាសមុទ្រចិនខាងត្បូង និងជម្លោះចិន-អាម៉េរិក កម្ពុជាក្នុងនាមជាប្រធានកិច្ចប្រជុំអាស៊ានកន្លងមក បានខិតខំខ្លាំងណាស់ ក្នុងការស្វែងរកដំណោះស្រាយរួម ដើម្បីបញ្ចៀសការប្រឈមមុខដាក់គ្នាដោយអាវុធ ហើយស្វែងរកដំណោះស្រាយតាមការចរចាវិញ។
ចំពោះការរៀបចំកិច្ចប្រជុំអាស៊ាន និងកីឡាស៊ីហ្គេមនៅកម្ពុជានាពេលកន្លងទៅ លោក អះអាងថា កម្ពុជា បានអនុវត្តយ៉ាងល្អនូវកិច្ចសហប្រតិបត្តិការរវាងកងកម្លាំងសមត្ថកិច្ចគ្រប់ជាន់ថ្នាក់ ដើម្បីការពារសន្តិសុខ និងរក្សាសណ្តាប់ធ្នាប់៕
Tag:
កម្ពុជា
សិក្ខាកាមឥណ្ឌូណេស៊ី
នយោបាយឈ្នះឈ្នះ
© រក្សាសិទ្ធិដោយ thmeythmey.com