ថ្លែងក្នុងបទសម្ភាសតាមសារអេឡិចត្រូនិក នៅថ្ងៃទី២២ ខែមិថុនា ម្ចាស់មេដាយមាសកីឡាឃីកបុកស៊ីង ឈឿង ល្វៃ ប្រាប់សារព័ត៌មានថ្មីៗថា សាមី បេនឆាមេក ជាកីឡាករល្អដែលកម្លាំងហ្ស៊ូសធន់ និងក្បាច់ស្នៀតល្អទាំងព្រម ប៉ុន្តែខ្លួនក៏បានត្រៀមសម្រាប់ទប់ទល់ទៅវិញផងដែរ។

 

កីឡាករ ឈឿង ល្វៃ និយាយថា៖«សម្រាប់ជំនួនសងសឹកនេះ ខ្ញុំសង្ឃឹម ៥០ភាគរយ ព្រោះជាក់ស្តែងគឺនៅលើសង្វៀន ដរាបណាការប្រកួតមិនទាន់មកដល់យើងមិនអាចថាមុនបានទេ»។ ល្វៃ បន្តថាខ្លួនបានហ្វឹកហាត់ច្រើនដូចរាល់ដងដែរទាំងការចូលស៊ីប រត់ចម្ងាយ គឺបុកហាត់បានគ្រប់គ្រាន់ ធានាចំពោះការប្រយុទ្ធនៅលើសង្វៀនទល់សាមី។

 

កីឡាករគុនខ្មែរមានដើមកំណើតមកពីស្រុកប្រាសាទសំបូរ ខេត្តកំពង់ធំ បន្ថែមថា៖«ចំពោះការប្រើគុនវុធជាក់ស្តែងនៅពេលការប្រកួតអាចប្រើអាវុធណាបានផល គឺប្រើអាវុធហ្នឹងឱ្យបានច្រើន»។ កីឡាករមកពីក្លិបប្រដាល់នាគរាជចតុមុខ ដដែលក៏មិនហ៊ានដាក់ក្តីសង្ឃឹមខ្ពស់ព្រោះកីឡាករថៃ​សាមី មកពីក្លិប បេនឆាមេក នេះគឺល្អគ្រប់ស្នៀត។ 

 

គួបញ្ជាក់ថា កីឡាករគុនខ្មែរ ឈឿង ល្វៃ នឹងត្រូវសងសឹកកីឡាករ សាមី បេនឆាមេក មកពីប្រទេសថៃ នៅថ្ងៃទី២៥ ខែមិថុនា នៅសង្វៀន ទទក លើប្រភេទទម្ងន់ ៧១គីឡូក្រាមបន្ទាប់ពីរងបរាជ័យនាប្រកួតទីមួយរបស់ខ្លួនចាញ់ សាមី នៅទឹកទី៤ ដោយបញ្ហារបួសជើង៕