ការងារអភិបាលកិច្ចទេសចរណ៍ បានដោយផ្តោតលើផ្នែកសំខាន់ៗមួយចំនួនដូចជា ការពង្រឹងយន្តការស្ថាប័ន ថ្នាក់ជាតិ តំបន់ និងថ្នាក់ក្រោមជាតិ។ ក្នុងនោះក៏មាន ការគ្រប់គ្រងតាមគោលដៅទេសចរណ៍អាទិភាព និងពង្រឹងការគ្រប់គ្រងឧស្សាហកម្មទេសចរណ៍កម្ពុជា។
  

លោក អាំង សុវណ្ណរ័ត្ន អគ្គនាយកគ្រប់គ្រងឧស្សាហកម្មទេសចរណ៍ លើកឡើងថា ការបណ្ដុះបណ្តាលមូលធនមនុស្ស​ផ្តោតលើការកសាងសាលាវិជ្ជាជីវៈទេសចរណ៍។ បន្ថែមលើនេះ ការជំរុញផែនការឌីជីថលូបនីយកម្មនៅក្នុងវិស័យទេសចរណ៍កម្ពុជា បានដើរតួយ៉ាងសំខាន់ ដូចជាការចូលរួមពីវិស័យឯកជន និងឌីជីថលភារូបនីយកម្ម​ ដោយចាប់យកបច្ចេកវិទ្យាបម្រើដល់ការផ្តល់សេវា និងការអភិវឌ្ឍផលិតផលនៅក្នុងវិស័យទេសចរណ៍ជារួម។
 

អគ្គនាយកគ្រប់គ្រងឧស្សាហកម្មទេសចរណ៍ រូបនេះបន្តថា ពាក់ព័ន្ធនឹងការពង្រឹងគុណភាពទេសចរណ៍​ ឃើញថាមានការដាក់ចេញនូវសកម្មភាពជាច្រើន ទាំងការអភិវឌ្ឍស្តង់ដាបៃតងនានា ។ នាពេលកន្លងមក ក្រសួងទេសចរណ៍​ និងដៃគូសហការ បានបើកការបណ្តុះបណ្តាលជំនាញទេសចរណ៍ ទាំងជំនាញវិជ្ជាជីវៈទេសចរណ៍ ទាំងការវិនិយោគទុន និងអក្ខរកម្មឌីជីថល។
  

លោក សុវណ្ណរ័ត្ន បញ្ជាក់ដូច្នេះ៖ ​«បច្ចុប្បន្ននេះ ក្នុងទិសដៅគឺ បុគ្គលិកម្នាក់ ជំនាញមួយ ប៉ុន្តែក្នុងទិសដៅទៅថ្ងៃមុខ យើងនឹងបន្ថែមលើសពីនេះ គឺបុគ្គលិកម្នាក់ក្រៅពីជំនាញទេសចរណ៍ បុគ្គលិកត្រូវមានជំនាញឌីជីថលបន្ថែមទៀត។»
 

សូមជម្រាបថា វិស័យទេសចរណ៍បានរងនូ​វផលប៉ះពាល់ពីវិបត្តជំងឺកូវីដ-១៩ យ៉ាងណាមិញក្នុងដំណាក់កាលទី១ រដ្ឋាភិបាលក៏បានស្តារឡើងវិញ គឺទាមទារឱ្យមានការដាក់ចេញនូវផែនការយុទ្ធសាស្ត្រមួយចំនួន ដូចជាការដាក់ចេញនូវផែនទីចង្អុលផ្លូវស្តីពីផែនការស្តា និងលើកស្ទួយវិស័យទេសចរណ៍នៅកម្ពុជា។ បច្ចុប្បន្ននេះ រដ្ឋាភិបាលបានឆ្លងដល់ដំណាក់កាលទី២ គឺការស្តារឡើងវិញនៃវិស័យទេសចរណ៍កម្ពុជា ២០២២-២០២៣ ហើយនាពេលខាងមុខនេះ នឹងដំណើរការដំណាក់កាលទី៣ បន្តទៀតស្តីពី ការរៀបចំឆ្ពោះទៅកាន់អនាគតថ្មី នៃវិស័យទេសចរណ៍កម្ពុជា ២០២៤-២០២៥ផងដែរ៕