លោក ហ៊ុន សារ៉ាត់ បានបញ្ជាក់ថា សត្វរស់និងសាច់បង្កកទាំងនោះរួមមាន​ មាន់រស់ចំនួន ៣៧០ក្បាល សត្វទន្សាយ ១៥០ក្បាល។ ចំណែក សាច់បង្កកមាន ជើងជ្រូកចំនួន ១៦៨កេះ ស្មើនឹង៣,៣៦០គីឡូក្រាម, ពោះវៀនជ្រូកចំនួន ១,១៤០គីឡូក្រាម និងស្លាបមាន់ ៥០០គីឡូក្រាម ដោយសាច់បង្កកមានចំនួន ៥តោន ត្រូវបាននាំចូលពីប្រទេសវៀតណាម តាមច្រកកំណប់កែវ ស្រុកគិរីវង់ ខេត្តតាកែវ  ដើម្បីចែកចាយបន្តនៅភ្នំពេញ។ ក្រុមការងារ បានស្ទាក់ចាប់ម្ចាស់ឡានដឹក សត្វនិងសាច់ខុសច្បាប់ នៅលើផ្លូវលំ ភូមិត្រពាំងវែង ឃុំព្រៃរំដេង ស្រុកគិរីវង់ ខេត្តតាកែវ កាលពីថ្ងៃទី២៣ ខែមិថុនា។
 

អនុប្រធាននាយកដ្ឋានសុខភាពសត្វរូបនេះ បានបន្ថែមថា ផលិតផលទាំងនេះ ពុំមានលិខិតអនុញ្ញាតឡើយ ហើយបច្ចុប្បន្នអាជ្ញាធរ បាននាំយកវត្ថុតាងបទល្មើសខាងលើនេះ ទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់។
 

សូមបញ្ជាក់ថា កាលពីថ្ងៃទី២១ ខែមិថុនា កន្លងទៅ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ  និងផលិតកម្មសត្វ បានរឹបអូសសត្វគោក្របីរស់ចំនួន ៤០ក្បាល ដែលនាំចូលពីប្រទេសថៃ ដោយគ្មានការអនុញ្ញាតផងដែរ៕