​ម្ចាស់ជើងឯកលីគកំពូលកម្ពុជារដូវកាល២០២២ ត្រូវប្រកួតជាមួយ Young Elephant FC ជើងឯកលីគកំពូលឡាវ ក្នុងវគ្គប្រកួតជម្រុះបឋម ក្នុងព្រឹត្តិការណ៍ AFC Cup។ ដោយឡែក កាលពីឆ្នាំ២០២២ ភ្នំពេញក្រោន ធ្លាប់ឈ្នះ ក្រុមនេះ ម្ដងរួចមកហើយក្នុងលទ្ធផល ៤-២ នៃពានរង្វាន់ AFC Cup វគ្គសន្សំពិន្ទុក្នុងពូល។ 

លោក Oleg Starynskyi គ្រូបង្វឹកក្លិបបាល់ទាត់ភ្នំពេញក្រោន រូបពី Cambodian Premier League
 

លោក Oleg Starynskyi បានប្រាប់សារព័ត៌មានថ្មីៗ តាមតេលេក្រាមថា ក្លិបភ្នំពេញក្រោន ត្រូវត្រៀមលក្ខណៈឲ្យបានល្អបំផុត ព្រោះមិនអាចមើលស្រាលដៃគូបានទេ បើទោះជាមានប្រវត្តិធ្លាប់ឈ្នះ ក្រុមឡាវនេះកាលពីឆ្នាំ២០២២ ក៏ដោយ។ គ្រូបង្វឹករូបនេះ បាននិយាយប្រាប់ដូច្នេះថា៖«ការប្រកួត ច្បាស់ណាស់មិនដូចគ្នាទាំងស្រុងទៅនិងការប្រកួតឆ្នាំមុនទេ ព្រោះ ក្រុមរបស់ពួកគេផ្លាស់ប្ដូគ្រូបង្វឹក និងផ្លាស់ប្ដូសមាសភាពកីឡាការមួយចំនួន។ 
 

ចំពោះការត្រៀមខ្លួននោះ គ្រូបង្វឹកភ្នំពេញក្រោន បាននិយាយថា ក្រុមរបស់លោក បានរៀបចំការប្រកួត មិត្តភាពជាមួយក្រុមខ្លាំងៗ ក្នុងតំបន់មួយចំនួន ដូចជាក្រុមនៅឥណ្ឌូណេស៊ី និងក្រុមនៅថៃ គោលដៅ គឺដើម្បី តែត្រៀមលក្ខណៈឲ្យបានគ្រប់គ្រាន់ក្នុងការប្រកួតមួយនេះ។
 

«យើងមានការប្រកួតមិត្តភាពផ្សេងៗ មុនបើករដូវកាលជាមួយក្រុមនៅឥណ្ឌូណេស៊ី និងក្រុមនៅប្រទេសថៃ ដើម្បីប្រកួតប្រជែងជាមួយនិងខ្លួនយើងផ្ទាល់ ដែលត្រូវប្រកួតប្រជែងជាមួយក្រុម ដែលមានកម្រិតខ្លាំងៗ ដើម្បីត្រៀមសម្រាប់ AFC Cup។»។ លោក Oleg Starynskyi បានប្រាប់ដូច្នេះ។ 
 

ដោយឡែក នៅដើមរដូវកាលពី២០២៣-២០២៤ នេះ ក្លិបបាល់ទាត់ភ្នំពេញក្រោន ម្ចាស់ជើងឯកលីគកំពូលកម្ពុជា ទើបតែបានឈ្នះពាន Cambodian League Cup ដែលជាពានរង្វាន់ មុនបើករដូវកាល បន្ទាប់ពីយកឈ្នះ លើក្រុមណាហ្គាវើលដ៍ នៅវគ្គផ្ដាច់ព្រ័ត្រ៕