ជាតិ
វីដេអូ
នាយករដ្ឋមន្ត្រីរំលឹកមន្ត្រី៖ មុនចេញទៅផ្ទះ បិទភ្លើង បិទម៉ាស៊ីនត្រជាក់សិន កុំឱ្យការចំណាយវាធំពេក សម្ដេច ហ៊ុន សែន នាពិធីសម្ពោធដាក់ឱ្យប្រើប្រាស់ផ្លូវការ «អគារសាលាយុត្តិធម្ម» របស់ក្រសួងយុត្តិធម៌។ រូបភាព SPM
× ភ្នំពេញ៖ ក្នុងពិធីសម្ពោធដាក់ឱ្យប្រើប្រាស់ផ្លូវការ «អគារសាលាយុត្តិធម្ម» របស់ក្រសួងយុត្តិធម៌ ដែលមានទីតាំងនៅសង្កាត់ព្រែកលៀប ខណ្ឌជ្រោយចង្វារ សម្ដេច ហ៊ុន សែន បានអំពាវនាវឱ្យមន្ត្រីរាជការគ្រប់ក្រសួងស្ថាប័ន ត្រូវចេះសន្សំសំចៃភ្លើង និងបិទភ្លើង ឬម៉ាស៊ីនត្រជាក់មុនចេញទៅផ្ទះ។ សម្ដេច លើកឡើងបែបនេះ ទំនងមានមន្រ្តីរាជការមួយចំនួន ភ្លេចបិទភ្លើង ឬម៉ាស៊ីនត្រជាក់ពេលចេញទៅផ្ទះ។
សម្ដេចនាយករដ្ឋមន្ត្រី ហ៊ុន សែន មានប្រសាសន៍ថា កន្លែងធ្វើការកាន់តែល្អ ការចំណាយសម្រាប់ដំណើរការក៏កាន់តែច្រើន។ ក្នុងន័យនេះ សម្ដេចនាយករដ្ឋមន្រ្តី ចង់ឱ្យមន្រ្តីរាជការនានា ចេះសន្សំសំចៃភ្លើង។
«បន្ទប់មួយៗ បើកម៉ាស៊ីនត្រជាក់លេងធ្លាក់ដល់ ២០ ឬ១៦អង្សាអី អាហ្នឹងស៊ីភ្លើងកាន់តែច្រើន។ អាហ្នឹងថាអ៊ីចឹងទៅចុះ ប៉ុន្តែពេលចេញទៅផ្ទះ អាណិតបិទភ្លើងសិន បិទម៉ាស៊ីនត្រជាក់សិន ដើម្បីសន្សំសំចៃភ្លើង កុំឱ្យការចំណាយវាធំពេក»។ នេះជាការលើកឡើងរបស់សម្ដេច ហ៊ុន សែន ជុំវិញការសន្សំសំចៃភ្លើងនៅតាមក្រសួងស្ថាប័នមួយចំនួន។
សូមបញ្ជាក់ថា «អគារសាលាយុត្តិធម្ម» របស់ក្រសួងយុត្តិធម៌ ត្រូវបានសម្ពោធដាក់ឱ្យប្រើប្រាស់ផ្លូវការក្រោមអធិបតីភាពរបស់សម្ដេចនាយករដ្ឋមន្ត្រី ហ៊ុន សែន នាព្រឹកថ្ងៃចន្ទ ទី២៦ ខែមិថុនានេះ។ អគារសាលាយុត្តិធម្មថ្មីនេះ បែងចែកជាពីរផ្នែក ដោយមួយផ្នែកជាទីតាំងបម្រើការងារថ្មីរបស់សាលាដំបូង រាជធានីភ្នំពេញ និងមួយផ្នែកទៀតជាទីតាំងបម្រើការងារថ្មីរបស់សាលាឧទ្ធរណ៍ភ្នំពេញ។ ការរៀបចំទីកន្លែង បំពេញការងារនៅកន្លែងតែមួយនេះ គឺ យកលំនាំតាមការរៀបចំតុលាការដូចនៅប្រទេសបារាំង ហៅថា “វិមាន យុត្តិធម៌" (Palais de Justice)៕
សូមអញ្ជើញទស្សនាវីដេអូខាងក្រោម៖
Tag:
សន្សំសំចៃភ្លើង
មន្រ្តីរាជការ
© រក្សាសិទ្ធិដោយ thmeythmey.com