ជាតិ
លោក កៅ ថាច ប្រាប់ឱ្យកសិករគួរផ្លាស់ប្តូរផ្នត់គំនិតពីការធ្វើកសិកម្មចិញ្ចឹមឆ្នាំងបាយ មកជាកសិកម្មទំនើប នាយករដ្ឋមន្ត្រីវៀតណាមទៅចិន ដើម្បីជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្ម
× ភ្នំពេញ៖ លោក កៅ ថាច បានណែនាំឱ្យកសិករគួរផ្លាស់ប្តូរផ្នត់គំនិតពីការធ្វើកសិកម្មចិញ្ចឹមឆ្នាំងបាយ មកជាការធ្វើកសិកម្មបែបទំនើប។ ការលើកឡើងនេះ ធ្វើឡើងក្នុងពេលលោកជួបសំណេះសំណាល និងផ្សព្វផ្សាយគោលការណ៍ឥណទានគាំទ្រដល់ខ្សែច្រវាក់ផលិតកម្មស្វាយចន្ទីដល់កសិករនៅខេត្តសៀមរាប និងខេត្តឧត្តរមានជ័យ កាលពីថ្ងៃទី២៥ មិថុនា។
ក្នុងពិធីសំណេះសំណាលជាមួយកសិករ លោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម បានលើកទឹកចិត្តដល់កសិករដាំដុះស្វាយចន្ទី គួររៀបចំពិនិត្យ សិក្សាលម្អិតពីផែនការដាំដុះ បច្ចេកទេស ក្នុងការថែទាំ និងប្រមូលផល។ លោក បន្តថា កសិករគួរសិក្សាស្វែងយល់ពីបញ្ហាប្រឈមមួយចំនួននៃការដាំដុះស្វាយចន្ទីផងដែរ។
រូបភាពពីARDB
អគ្គនាយកនៃធនាគារអភិវឌ្ឍន៍ជនបទ និងកសិកម្មរូបនេះ ណែនាំដល់កសិករដូច្នេះ៖«បងប្អូនគួរផ្លាស់ប្តូរផ្នត់គំនិតកែប្រែពីការធ្វើកសិកម្មចិញ្ចឹមឆ្នាំងបាយ ឱ្យក្លាយជាការធ្វើកសិកម្មបែបទំនើបវិញ ដោយត្រូវចេះតាមដានតម្លៃកសិផលនៅលើទីផ្សារ និងត្រូវចេះតាមដានព័ត៍មានព្យាករណ៍អាកាសធាតុ។ កែប្រែទម្លាប់ ពីការដាំដុះដំណាំតែមួយមុខ និងឆ្លៀតចញ្ចឹមសត្វបន្ថែម ចេះកែប្រែដីសម្រាប់ដាំដុះឱ្យទទួលបានទិន្នផលខ្ពស់»។
បើតាមហ្វេសប៊ុក ARDB លោក កៅ ថាច បន្តជំរុញឱ្យកសិករ ត្រូវចេះជ្រើសរើសដំណាំដាំតាមរដូវកាល និងរៀនសូត្របន្ថែម តាមបណ្ដាញសង្គម និងយូធូប ដើម្បីទទួលបានចំណេះដឹង។ ជាមួយគ្នានេះ ដើម្បីទទួលបានជោគជ័យ លោក កៅ ថាច ស្នើឱ្យកសិករគួរចងក្រងគ្នាជាសហគមន៍កសិកម្ម ឬបណ្តុំផលិតស្វាយចន្ទី។
ទន្ទឹមនឹងនេះ លោក កៅ ថាច បន្តជំរុញឱ្យកសិករ ត្រូវចេះរៀបចំផែនការដាំដុះ, ការថែទាំ, ការប្រមូលផល, ការកែច្នៃ និងការផ្សារភ្ជាប់ជាមួយទីផ្សារ តាមរយៈកិច្ចសន្យាកសិកម្ម ដើម្បីធានាស្ថេរភាពតម្លៃលើទីផ្សារ និងជៀសវាងការទម្លាក់តម្លៃពីឈ្មួញកណ្តាល។ លើសពីនេះ លោក ក៏លើកទឹកចិត្តដល់កសិករដែលចង់បានឥណទាន ដើម្បីពង្រីកការដាំដុះ ឬពង្រីកខ្សែច្រវាក់ផលិតកម្មស្វាយចន្ទី ឬដំណាំផ្សេងទៀតផងដែរ៕
រូបភាពពីARDB
Tag:
កសិកម្ម
កសិករ
ស្វាយចន្ទី
© រក្សាសិទ្ធិដោយ thmeythmey.com