សិស្សគុនចំនួន៤៥នាក់ ទទួលបានលិខិតបញ្ជាក់ និង៦នាក់ទទួលបានវិញ្ញាប័ណ្ណបត្រពីសហព័ន្ធកីឡាហាប់គីដូកម្ពុជា ក្រោយសិក្សារយៈពេល៦ខែ ទៅ៩ខែ ក្រោមបង្ហាត់បង្រៀនតាមក្លិប និងសមាគម។ ក្នុងពិធីប្រគល់វិញ្ញាប័ណ្ណបត្រ និងលិខិតបញ្ជាក់ការសិក្សានោះដែរមន្រ្តីសហព័ន្ធមើលឃើញពីការខិតខំប្រឹងប្រែងរបស់គ្រូបង្វឹក និងកីឡាករ-កីឡាការិនី ពិតជាធ្វើបានល្អដែលជាក្តីសង្ឃឹមឈានឆ្ពោះទៅមុខ។

 

លោក គួច ហុងជៀក មន្រ្តីសហព័ន្ធកីឡាហាប់គីដូ បញ្ជាក់ថាការទទួលវិញ្ញាប័ណ្ណបត្រ និងលិខិតបញ្ជាក់ការសិក្សានេះគឺមានសារៈសំខាន់សម្រាប់សិស្សគុនដែលបានសិក្សាមករហូត ហើយទៅថ្ងៃមុខក៏អាចយកប្រើការបានតាមជំនាញវិជ្ជាជីវៈ។ 

 

«យើងធ្វើនេះគឺបញ្ជាក់កម្រិតសិក្សារបស់គាត់ ដើម្បីឱ្យគាត់បានដឹងពីកម្រិតសមត្ថភាពរបស់គាត់។ ពេលគាត់មានការបញ្ជាក់ទទួលស្គាល់ធ្វើឱ្យគាត់មានលំនឹងក្នុងការហ្វឹកហាត់ទៅថ្ងៃមុខទៀត និងថ្ងៃអនាគតគាត់ចង់បង្ហាត់បន្តគឺគាត់មានវិជ្ជាជីវៈត្រឹមត្រូវ»។ នេះជាការបញ្ជាក់របស់លោក គួច ហុងជៀក។
 

បន្ថែមពីលើនោះលោក នឹងបន្តពង្រឹងអត្តពលិកហាប់គីដូ ឱ្យកានតែមានគុណភាពពីពេលនេះទៅ សម្រាប់ត្រៀមការប្រកួតកីឡាស៊ីហ្គេម២០២៥ នៅប្រទេសថៃ៕