ជាតិ
មកលេង «ខ្នងផ្សារ» «ខ្នងសំពៅ» ទេសចរ មិនបាច់បារម្ភពីបន្ទប់ទឹកឡើយ!
× កំពង់ស្ពឺ,កោះកុង៖ តំបន់ទេសចរណ៍ «ខ្នងផ្សារ» ជាទីទេសចរណ៍ធម្មជាតិឡើងភ្នំមួយ ដែលស្ថិតនៅជាប់ព្រំដែនរវាងខេត្តកំពង់ស្ពឺ និងកោះកុង។ «ខ្នងសំពៅ»ជាភ្នំមួយ ក្នុងចំណោមភ្នំដទៃទៀតនៅទីនេះ ហើយទេសចរក៏និយមបោះតង់សម្រាក នៅភ្នំនេះ។ ដោយទេសចរច្រើនទៅលេង អាជ្ញាធរក៏បានរៀបចំជាបន្ទប់ទឹកអនាម័យ ដើម្បីអាចឱ្យទេសចរអាចងូតទឹក និងបន្ទោរបង់បាន។
ដើម្បីជ្រាបច្បាស់សូមលោកអ្នកនាងទស្សនាបទសម្ភាសន៍រវាង លោក ស៊ុល រ៉វី ជាមួយលោក លោក ជា យុទ្ធា អនុប្រធានការិយាល័យឧទ្យានជាតិជួរភ្នំក្រវាញដូចតទៅ៖
បង្គន់អនាម័យចំនួន១០បន្ទប់ ត្រូវបានផ្ដួចផ្ដើមធ្វើឡើងដោយ អាជ្ញាធរខេត្តកំពង់ស្ពឺ កោះកុង និងក្រសួងបរិស្ថាន កាលពីចុងឆ្នាំ២០២១។ ការកសាងបន្ទប់ទឹកអនាម័យនេះ ក៏ដោយសារតំបន់ទេសចរណ៍ «ខ្នងផ្សារ» បានក្លាយជាគោលដៅទេសចរណ៍ពេញនិយមមួយ ក្នុងខេត្តកំពង់ស្ពឺនេះ។
លោក ជា យុទ្ធា អនុប្រធានការិយាល័យឧទ្យានជាតិជួរភ្នំក្រវាញថា ជារៀងរាល់សប្ដាហ៍ «ខ្នងផ្សារ» មានទេសចរចន្លោះពី៣០០ ទៅ៤០០នាក់ មកកម្សាន្ត ជាពិសេសគឺថ្ងៃចុងសប្ដាហ៍ និងថ្ងៃបុណ្យជាតិ។
ទេសចរច្រើនបាននាំគ្នាមកឡើងភ្នំ បោះតង់ នៅទីនេះ។ ដូច្នេះបង្គន់ ជារឿងដែលចំបាច់មួយសម្រាប់ទេសចរ ជាពិសេសទេសចរជានារី។ បន្ទប់ទឹកនេះ អនុញ្ញាតឱ្យទេសចរ ងូតទឹកផង និងបន្ទោរបង់ផង។
បើតាមលោក ជា យុទ្ធា បច្ចុប្បន្នការប្រើប្រាស់បន្ទប់ទឹកនេះ ទេសចរមិនតម្រូវឱ្យបង់កម្រៃនោះទេ ពោលគឺទេសចរ អាចបរិច្ចាគថវិកាបានតាមលទ្ធភាព។ លោកបន្តទៀតថា បច្ចុបន្នអាជ្ញាធរកំពុងគិតគូរដែរ អំពីការបង់ថ្លៃសេវាបន្ទប់ទឹកនេះ ដើម្បីយកមកប្រើប្រាស់លើការសម្អាត និងប្រតិបត្តិការនានា លើបន្ទប់ទឹកនេះ៕
Tag:
ThmeyThmey
ខ្នងផ្សារ
បន្ទប់ទឹកខ្នងផ្សារ
កំពង់ស្ពឺ
ឡើងភ្នំ
© រក្សាសិទ្ធិដោយ thmeythmey.com