អន្តរជាតិ
ចិន ចុះហត្ថលេខាលើកិច្ចព្រមព្រៀងសហប្រតិបត្តិការជាមួយនូវែលសេឡង់ដើម្បីពង្រឹងពាណិជ្ជកម្ម
× ចិន បានចុះហត្ថលេខាលើកិច្ចព្រមព្រៀងសហប្រតិបត្តិការជាមួយនូវែលសេឡង់នៅថ្ងៃទី២៨ ខែមិថុនា អំឡុងដំណើរទស្សនកិច្ចរបស់នាយករដ្ឋមន្រ្តីនូវែលសេឡង់ Chris Hipkins ។ កិច្ចព្រមព្រៀងនេះ នឹងបើកចំហទីផ្សារកាន់តែប្រសើរឡើង។
ទស្សនកិច្ចរបស់នាយករដ្ឋមន្រ្តីនូវែលសេងឡង់ Chris Hopkins ផ្តោតសំខាន់លើការបង្កើនការនាំចេញរបស់នូវែលសេឡង់ទៅទីផ្សារចិន ទោះបីជាមានការព្រមានក្នុងប្រទេសអំពីការពឹងផ្អែកខ្លាំងជ្រុលលើចិនចំពេលមានភាពតានតឹងផ្នែកភូមិសាស្ត្រនយោបាយក៏ដោយ។
នៅរដ្ឋធានីប៉េកាំង លោក Hipkins ជួបជាមួយប្រធានាធិបតី ស៊ី ជិនភីង រួចបន្តជួបសមភាគី លី ឈាំង។ បើតាមប្រព័ន្ធផ្សព្វផ្សាយរដ្ឋចិន ភាគីទាំងពីរបានព្រមព្រៀងពង្រឹងពាណិជ្ជកម្ម និងពង្រីកកិច្ចសហប្រតិបត្តិការក្នុងវិស័យពាណិជ្ជកម្មអេឡិចត្រូនិក សេដ្ឋកិច្ចបៃតង និងបង្កើតយន្តការសន្ទនាស្តីពីយានជំនិះថាមពលថ្មី។ ប្រទេសទាំង២ ក៏យល់ព្រមពង្រឹងកិច្ចសហប្រតិបត្តិការលើសន្តិសុខស្បៀង និងកសិកម្មផងដែរ។
លោក ស៊ី បានប្រាប់លោក Hipkins នៅក្នុងជំនួបកាលពីថ្ងៃទី២៧ ខែមិថុនាថា ចិនតែងតែចាត់ទុកនូវែលសេឡង់ជាមិត្ត និងដៃគូ ហើយបានត្រៀមខ្លួនរួចជាស្រេចក្នុងការលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយប្រកបដោយស្ថិរភាព និងនិរន្តរភាព។ ជំហរនេះមិនបានរារាំងលោក Hipkins និយាយរឿងរសើបដូចជាសិទ្ធិមនុស្ស និងសកម្មភាពយោធានៅប៉ាស៊ីហ្វិកឡើយ។
«វាមានសារសំខាន់ផងដែរក្នុងការទទួលស្គាល់ផ្នែកនៃភាពខុសគ្នាដូចជាបញ្ហាសិទ្ធិមនុស្ស»។ លោក Hipkins សង្កត់ធ្ងន់បែបនេះនៅក្នុងសេចក្តីថ្លែងការណ៍មួយដែលបង្ហោះលើវេបសាយរបស់រដ្ឋាភិបាលដោយបញ្ជាក់ថា នូវែលសេឡង់បន្តជជែកពីបញ្ហាទាំងនេះ ប៉ុន្តែក៏ត្រូវស្របនឹងផលប្រយោជន៍ និងតម្លៃឯករាជ្យរបស់ប្រទេសដែរ៕
គួរបញ្ជាក់ថា ស្របពេលទំនាក់ទំនងរបស់ចិនជាមួយអាម៉េរិកមានភាពតានតឹងខ្លាំងក្នុងប៉ុន្មានឆ្នាំថ្មីៗនេះដូចគ្នាបណ្តាប្រទេសលោកខាងលិចផ្សេងទៀតដូចជាអូស្ត្រាលីនិងកាណាដា នូវែលសេឡង់នៅតែអាចរក្សាទំនាក់ទំនងល្អប្រសើរជាមួយចិនដដែល។ ប៉ុន្តែទីក្រុងវែលីងតោន ក៏រងការព្រមានពីការពឹងផ្អែកខ្លាំងលើប៉េកាំងដែរ៕
© រក្សាសិទ្ធិដោយ thmeythmey.com