លោក ឡុង គន្ធា ធ្លាប់ជាពលករនៅជប៉ុនអស់រយៈពេល៧ឆ្នាំ។ ក្រោយត្រឡប់មកមាតុភូមិកំណើតក្នុងឆ្នាំ២០១៩ លោក គន្ធា ចាប់ផ្ដើមសាកល្បងដាំ និងបង្កាត់ពូជមើមឈូកដោយខ្លួនឯង តាមជំនាញ និងបច្ចេកទេសពីជប៉ុន។ បច្ចុប្បន្នកសិករវ័យ២៨ឆ្នាំរូបនេះ កំពុងជោគជ័យក្នុងការដាំមើមឈូក ហើយបន្តពង្រីកផ្ទៃដីដាំដុះបានប្រមាណ២ហិកតា នៅភូមិព្រៃចំការ ឃុំស្មោងខាងត្បូង ខេត្តព្រៃវែង។
  

កសិករវ័យក្មេងរូបនេះ ពន្យល់ថា ដំណាំមើមឈូកងាយស្រួលដាំ បើធៀបនឹងដំណាំកសិកម្មមួយចំនួនទៀត ប៉ុន្តែទាមទារឱ្យកសិករមានបច្ចេកទេសច្បាស់លាស់ ទើបអាចទទួលបានទិន្នផលល្អ។ មើមឈូក ជាដំណាំមិនរើសអាកាសធាតុឡើយ ហើយប្រើប្រាស់ជីកំប៉ុសធម្មជាតិ និងលាមកសត្វស្រោចស្រពប៉ុណ្ណោះ។ ចំពោះការប្រមូលផល ចន្លោះពី៣-៤ខែទើបអាចប្រមូលផលម្ដង។
 

ទោះបីកំពុងជោគជ័យលើការដាំដុះ តែលោក គន្ធា មិនសម្រុកផលិតមើមឈូកច្រើនឡើយ ដោយសារតម្រូវការទីផ្សារមានកម្រិតនៅឡើយ។ កសិកររូបនេះថា ប្រមូលទិន្នផលដំណាំមើមឈូកបណ្ដាក់ៗគ្នារាល់ថ្ងៃស្របតាមតម្រូវការរបស់អតិថិជនប្រមាណជាង១០០-២០០គីឡូក្រាម ក្នុងរយៈពេល២-៣ថ្ងៃ។ បច្ចុប្បន្នលោក គន្ធា លក់មើមឈូកតាមអនឡាញ (ហ្វេសប៊ុក) តម្លៃមួយម៉ឺនរៀលក្នុងមួយគីឡូក្រាម។ 
  

លោក ឡុង គន្ធា លើកឡើងថា៖«ដំណាំមើមឈូកនេះ មិនទាន់មានគេដាំច្រើនទេ អ្នកតាមភូមិអីក៏អត់ស្គាល់ច្រើនដែរ ភាគច្រើនគេដាំឈូកធម្មតា។ អ៊ីចឹងឥឡូវមិនទាន់មានទីផ្សារច្រើនទេ ខ្ញុំលក់តាមអនឡាញខ្លះ​និងបោះឱ្យម៉ូយ២-៣ថ្ងៃ បានជាង១៥០គីឡូក្រាម»។ លោក គន្ធា គ្រោងពង្រីកការដាំមើមឈូកបន្ថែម និងបង្រៀនកសិករពីបច្ចេកទេសដាំដំណាំមើមឈូក បើសិនជាមានតម្រូវការទីផ្សារខ្ពស់ជាងនេះ។ 
 

កសិករវ័យ២៨ឆ្នាំរូបនេះ មានបំណងចង់ចូលរួមចំណែកលើកស្ទួយវិស័យកសិកម្មក្នុងស្រុកបន្ថែម តាមរយៈដំណាំមើមឈូក ដែលជាដំណាំមានទីផ្សារនៅបរទេស ហើយអាចដាំនៅកម្ពុជាបានដូចដំណាំដទៃដែរ៕