លោក Liang Shi ដែលជាសេដ្ឋីចិនអាយុ ៥៦ឆ្នាំ បានបរាជ័យក្នុងការប្រឡងចូលមហាវិទ្យាល័យដ៏ល្បីរបស់ចិនជាលើកទី ២៧។ នេះបើតាមទីភ្នាក់ងារសារព័ត៌មានបារាំង AFP ។
អតីតកម្មកររោងចក្រ ដែលបច្ចុប្បន្នមានមុខរបរលក់គ្រឿងសំណង់ ហើយបានក្លាយជាសេដ្ឋីម្នាក់ មានក្តីសុបិនចង់ទៅរៀននៅមហាវិទ្យាល័យ។ ប៉ុន្តែលោក Liang Shi បានបរាជ័យជាថ្មី។
« វាជាគំនិតមួយដែលមិនស្រួល សម្រាប់ខ្ញុំមិនបានទទួលបានការអប់រំនៅមហាវិទ្យាល័យ» លោក Liang បានប្រាប់ AFP កាលពីដើមខែនេះដោយបន្តថា ៖«ខ្ញុំពិតជាចង់ចូលរៀននៅសាកលវិទ្យាល័យ ដើម្បីក្លាយជាបញ្ញវន្តម្នាក់»។
ដើម្បីអាចចូលរៀននៅមហាវិទ្យាល័យបាន លោក Liang ត្រូវតែឆ្លងកាត់ការធ្វើតេស្តមួយឆ្នាំម្តង Gaokao ។ ការធ្វើតេស្តនេះ មានសភាពតានតឹងខ្លាំងដោយសារមានប៉ូលិសត្រូវបានដាក់ពង្រាយ ដើម្បីរក្សាសណ្តាប់ធ្នាប់នៅតាមដងផ្លូវ និងតាមសាលារៀននាថ្ងៃប្រឡង។
លោក Liang បានចាប់ផ្តើមប្រឡងនៅឆ្នាំ ១៩៨៣ នៅពេលគាត់មានអាយុ ១៦ឆ្នាំ។ ប៉ុន្តែលោកបានបោះបង់ចោលប្រហែលមួយទសវត្សរ៍រហូតដល់ឆ្នាំ ១៩៩២ ទើបបានប្រឡងម្តងទៀត ដែលពេលនោះមានលក្ខខណ្ឌសម្រាប់តែអ្នកនៅលីវមានអាយុក្រោម ២៥ឆ្នាំប៉ុណ្ណោះ ។ គាត់បានធ្វើតេស្តម្តងទៀតក្នុងឆ្នាំ ២០០១ នៅពេលលក្ខខណ្ឌទាំងនោះត្រូវបានដកចេញ។
លោក Liang បានលើកឡើងថា បានរស់នៅជាជីវិតព្រះសង្ឃ អស់រយៈពេលពីរបីខែមុនពេលប្រលង ដោយបានចំណាយពេល ១២ម៉ោងក្នុងមួយថ្ងៃដើម្បីសិក្សា។
ទោះជាយ៉ាងណាក៏ដោយលោក Liang បានធ្លាក់ការធ្វើតេស្តម្តងទៀត ក្នុងការប្រឡងចូលមហាវិទ្យាល័យនៅខេត្ត Sichuan ដោយបានពិន្ទុត្រឹមតែ ៤២៤ លើ ៧៥០ ពិន្ទុគឺទាបជាងកម្រិតទាមទាររបស់សកលវិទ្យាល័យ។
លោកបន្តប្រាប់អ្នកសារព័ត៌មានថា ៖ « មុនពេលខ្ញុំប្រកាសលទ្ធផល ខ្ញុំមានអារម្មណ៍ថាមិនអាចទទួលបានពិន្ទុខ្ពស់គ្រប់គ្រាន់ ដើម្បីចូលសាកលវិទ្យាល័យលំដាប់ៗនោះទេ ប៉ុន្តែខ្ញុំមិនបានរំពឹងអ្វី ក្រៅពីធ្វើវាទៅជារឿងធម្មតានោះទេ»។
Gaokao ជាកម្មវិធីប្រឡងដ៏លំបាកមួយក្នុងការធ្វើតេស្តសិស្សវិទ្យាល័យលើភាសាចិន គណិតវិទ្យា និងភាសាអង់គ្លេសរបស់ពួកគេ ជាមួយមុខវិជ្ជាវិទ្យាសាស្ត្រ ឬមនុស្សសាស្ត្រផ្សេងទៀតដែលពួកគេជ្រើសរើស។ ទិន្នន័យរបស់រដ្ឋាភិបាលចិនបង្ហាញតែ ៤១,៦ភាគរយនៃបេក្ខជនប្រឡង ត្រូវបានទទួលយកចូលសាកលវិទ្យាល័យ ឬមហាវិទ្យាល័យក្នុងឆ្នាំ២០២១៕