ជាតិ
ក្រសួងអប់រំ ជំរុញការផ្សព្វផ្សាយពីសេវាគាំទ្រសុខភាពផ្លូវចិត្តដល់បុគ្គលិកអប់រំវ័យចាស់
×
ដោយ៖ សុង សុធាវី
ភ្នំពេញ ៖ ក្រសួងអប់រំ យុវជន និងកីឡា បានសិក្ខាសាលាផ្សព្វផ្សាយស្តីពី វិធានការស្វែងរកសេវាគាំទ្រសុខភាពផ្លូវចិត្ត ដល់បុគ្គិលិកអប់រំវ័យចាស់ ដើម្បីផ្តល់ចំណេះដឹងស្តីពីវិធានការ បង្ការ ជំងឺឆ្លងនិងមិនឆ្លង និងការស្វែងរកសេវាគាំទ្រសុខភាពផ្លូវចិត្តដល់បុគ្គលិកអប់រំវ័យចាស់ ក្នុងវិស័យអប់រំផ្លូវចិត្ត នៅថ្នាក់កណ្តាល។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងក្នុងពិធីបើកសិក្ខាសាលានេះ កាលពីថ្ងៃទី ២៧ ខែមិថុនាថា ការលើកកម្ពស់គុណភាពជីវិតរបស់មនុស្សវ័យចាស់ ក្នុងវិស័យអប់រំ គឺជារួមចំណែករក្សាសុខភាពផ្លូវចិត្តរបស់បុគ្គលិក ព្រមទាំងធានាថា ស្ថាប័នអប់រំនៅកម្ពុជា បន្តរក្សាបាននូវបទដ្ឋានសុខភាពកាន់តែខ្ពស់។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងក្នុងពិធីបើកសិក្ខាសាលាផ្សព្វផ្សាយស្តីពី វិធានការស្វែងរកសេវាគាំទ្រសុខភាពផ្លូវចិត្ត ដល់បុគ្គិលិកអប់រំវ័យចាស់ កាលពីថ្ងៃទី ២៧ ខែមិថុនា។ រូបភាព៖ ហ្វេសបុក
បើតាម លោក ហង់ជួន ណារ៉ុន ក្នុងនាមជាស្ថាប័ននាំមុខ ក្នុងការអភិវឌ្ឍធនធានមនុស្ស ក្រសួងអប់រំ បានដាក់ចេញនូវគោលនយោបាយផែនការចង្អុលផ្លូវអប់រំ ឆ្នាំ២០៣០ ផែនការមេស្តីពីការលើកកម្ពស់សុខភាពសិក្សា និងផែនការយុទ្ធសាស្រ្ត និងបានអភិវឌ្ឍសៀវភៅគោលប្រតិបត្តិ ស្តីពីការសង្គ្រោះផ្លូវចិត្តបឋម សម្រាប់បុគ្គលិកអប់រំដែលគ្របដណ្តប់ទាំងការគាំទ្រផ្នែកចិត្តសាស្រ្ត និងសង្គមជាកិច្ចអន្តរាគមន៍ ឆ្លើយតបដំបូង ដែលបង្កើតឡើង ដោយអង្គការសុខភាពពិភពលោក ដើម្បីជាការគាំទ្រចំពោះមនុស្សជាតិ ដែលកំពុងទទួលរងនូវវិបត្តិធ្ងន់ធ្ងរ។
លោករដ្ឋមន្ត្រី សង្ឃឹមថាសិក្ខាសាលានេះ នឹងផ្តល់នូវចំណេះដឹង និងបទពិសោធន៍ថ្មីៗបន្ថែមទៀតដល់អ្នកចូលរួម ដើម្បីផ្សព្វផ្សាយបន្តដល់អ្នកពាក់ព័ន្ធ ដើម្បីលើកកម្ពស់ផ្លូវចិត្តដល់បុគ្គលិកអប់រំ៕
© រក្សាសិទ្ធិដោយ thmeythmey.com