ប្រធានាធិបតីកូរ៉េខាងត្បូង យូន សុកយ៉ល ទើបបានតែងតាំងលោក Kim Yung-ho ជារដ្ឋមន្ត្រីថ្មីក្រសួងបង្រួបបង្រួមកូរ៉េ។ លោក Kim Yung-ho ដែលមានជំហរជាអ្នកអភិរក្សនិយមនេះ តែងបានរិះគន់ជាហូរហែរពីការរំលោភសិទ្ធិមនុស្សនៅកូរ៉េខាងជើង។ 
 

«ក្រសួងបង្រួបបង្រួមឧបទ្វីបកូរ៉េបានធ្វើសកម្មភាពដូចជាក្រសួងផ្ដល់ជំនួយរបស់កូរ៉េខាងជើង ហើយវាមិនត្រឹមត្រូវទេ»។ ប្រធានាធិបតីកូរ៉េខាងត្បូងលោក យូន បានលើកឡើងបែបនេះក្នុងចក្តីថ្លែងការណ៍មួយចេញដោយលេខាធិការសារព័ត៌មានរបស់លោក។ លើសពីនេះ លោក យូន ក៏បានជំរុញឱ្យក្រសួងនេះ ផ្លាស់ប្ដូរវិធានការរបស់ខ្លួនផងដែរ។ 
 

យោងតាមសេចក្តីថ្លែងការណ៍ លោក យូន បានជំរុញឱ្យក្រសួងបង្រួបបង្រួមឧបទ្វីបកូរ៉េក្រោកឈរឡើងដើម្បីប្រជាធិបតេយ្យសេរី ហើយការបង្រួបបង្រួមគួរតែនាំឱ្យមានភាពកាន់តែប្រសើរសម្រាប់ទាំងប្រជាជនកូរ៉េខាងត្បូង និងកូរ៉េខាងជើង។ 
 

ទំនាក់ទំនងរវាងកូរ៉េខាងត្បូង និងកូរ៉េខាងជើងហាក់នៅមានភាពចម្រូងចម្រាស ដ្បិតកូរ៉េខាងជើងថ្មីៗនេះ បានបន្តសាកល្បងអាវុធជាហូរហែ និងបានព្យាយាមបាញ់បង្ហោះផ្កាយរណបស៊ើបការណ៍ទៅក្នុងលំហ៕