សង្គមអន្តរជាតិ
អន្តរជាតិ
ជនជាតិវៀតណាម បរិភោគមីញឹកញាប់ជាងគេនៅលើពិភពលោក អ្នកប្រើប្រាស់ជ្រើសរើសផលិតផលមីកញ្ចប់នៅផ្សារទំនើបវៀតណាម។ រូបភាព ៖ Người Lao Động ។
× បើតាមសមាគមមីកញ្ចប់ពិភពលោក (WINA) ប្រជាជនវៀតណាមម្នាក់ៗបរិភោគមីចំនួន ៨៥ដងក្នុងមួយឆ្នាំ ដែលជាប់ចំណាត់ថ្នាក់លេខមួយ លើពិភពលោកទាក់ទងនឹងការប្រើប្រាស់អាហារនេះច្រើនេះជាងគេ ។
ក្នុងរយៈពេល ៣ឆ្នាំចុងក្រោយ វៀតណាមតែងតែជាប់ចំណាត់ថ្នាក់ក្នុងប្រទេសកំពូលទាំងបី ដែលមានការប្រើប្រាស់មីកញ្ចប់ច្រើនជាងគេលើពិភពលោក។
នៅក្នុងរបាយការណ៍វាយតម្លៃថ្មីៗនេះ WINA បានលើកឡើងថា ទោះបីជាវាជាប់ចំណាត់ថ្នាក់ទីបីទាក់ទងនឹងការប្រើប្រាស់បន្ទាប់ពីចិន និងឥណ្ឌូណេស៊ីក៏ពិតមែន តែបើគិតពីចំនួនដងដែលប្រជាជនវៀតណាមម្នាក់ៗបរិភោគក្នុងមួយឆ្នាំ នៅតែនាំមុខគេនៅលើពិភពលោក។
កាលពីឆ្នាំមុន វៀតណាមបានប្រើប្រាស់កញ្ចប់ជិត៨,៥ពាន់លានកញ្ចប់ ដែលកើនឡើងច្រើនជាងមួយដងកន្លះធៀបនឹងឆ្នាំ២០១៩ កើន៥៧ភាគរយ ។ ជាមធ្យមជនជាតិវៀតណាមបរិភោគមី៨៥ដងក្នុងមួយឆ្នាំ ដែលមានន័យថាពួកគេញ៉ាំមីកញ្ចប់រៀងរាល់៤ថ្ងៃម្តង។ តាមពីក្រោយដោយកូរ៉េខាងត្បូង និងថៃជាមធ្យមមួយសប្តាហ៍ពួកគេញ៉ាំមីកញ្ចប់ម្តង។
បើតាម WINA ការបង្កើនការបរិភោគមីកញ្ចប់របស់ជនជាតិវៀតណាម ដោយសារតែផលប៉ះពាល់នៃកូវីដ-១៩ ដោយសារតែវាមានភាពងាយស្រួល។ លើសពីនេះ ចំនួនផលិតផលមីកញ្ចប់មានភាពចម្រុះកាន់តែខ្លាំងឡើង បានជួយឱ្យអ្នកប្រើប្រាស់មានជម្រើសកាន់តែច្រើន។
នៅវៀតណាម សហគ្រាសផលិតមីកញ្ចប់កំពុងទទួលបានសមិទ្ធិផលកាន់តែច្រើនឡើង នៅពេលដែលបរិមាណនៃការប្រើប្រាស់ផលិតផលនេះមានការកើនឡើងក្នុងរយៈពេល ៣ ឆ្នាំជាប់ៗគ្នានេះ។ បើនិយាយពីចំណែកទីផ្សារ Acecook និង Masan គឺជាអាជីវកម្មឈានមុខគេពីរនៅក្នុងទីផ្សារមីកញ្ចប់ដែលមានចំនួនសរុប ៣៣ភាគរយ។ នេះបើយោងតាម Euromonitor ក្រុមហ៊ុនស្រាវជ្រាវទីផ្សារឈានមុខគេមួយរបស់ពិភពលោកដែលមានមូលដ្ឋាននៅអង់គ្លេស។
លោក Kaneda Hiroki អគ្គនាយកក្រុមហ៊ុន Acecook Vietnam បាននិយាយថា ទីផ្សារមីវៀតណាមនៅតែមានការទាក់ទាញខ្លាំង។ វៀតណាមគឺជាប្រទេសពិសេសមួយទាក់ទងនឹងការប្រើប្រាស់មីកញ្ចប់។ ៦ខែឆ្នាំនេះ ការប្រើប្រាស់មីកញ្ចប់របស់ក្រុមហ៊ុនបានកើនឡើង ១០ភាគរយក្នុងគ្រាដូចគ្នា។
លោកបន្តថា ៖ « ឆ្នាំនេះ យើងបានកំណត់គោលដៅថាទីផ្សារវៀតណាមនឹងប្រើប្រាស់មីកញ្ចប់ចំនួន ៣,៥ពាន់លានកញ្ចប់ ដែលកើន ៦ភាគរយបើធៀបឆ្នាំ ២០២២» ។ នេះបើតាមសារព័ត៌មានវៀតណាម VnExpress ៕
© រក្សាសិទ្ធិដោយ thmeythmey.com