អន្តរជាតិ
លោក វ៉ាង យី ជំរុញកិច្ចសហប្រតិបត្តិការកាន់តែខ្លាំងជាមួយជប៉ុននិងកូរ៉េខាងត្បូងដែលស្និទ្ធអាម៉េរិក
× អ្នកការទូតកំពូលរបស់ចិន វ៉ាង យី នាថ្ងៃទី៣ ខែកក្កដា បានលើកឡើងពីសារសំខាន់នៃកិច្ចសហប្រតិបត្តិការត្រីភាគីរវាង ចិន ជប៉ុន និងកូរ៉េខាងត្បូង។ បើតាមលោក វ៉ាង ប្រទេសទាំង៣ ត្រូវបញ្ជូនសញ្ញាច្បាស់លាស់នៃកិច្ចសហប្រតិបត្តិការ និងការទប់ទល់នឹងការបង្ខិតបង្ខំ ការសម្លុត និងការត្រួតត្រារបស់អាម៉េរិក។
ខណៈអាម៉េរិករឹតចំណងទំនាក់ទំនងកាន់តែជិតស្និទ្ធជាមួយសម្ព័ន្ធមិត្តជប៉ុននិងកូរ៉េខាងត្បូងដើម្បីរុញប្រឆាំងនឹងឥទ្ធិពលចិនក្នុងតំបន់ដែលកំពុងកើនឡើង អ្នកការទូតចិន លោក វ៉ាង យី បានជំរុញការពង្រឹងទំនាក់ទំនងជាមួយជប៉ុន និងកូរ៉េខាងត្បូងផងដែរ ។
«លោក វ៉ាង បានអំពាវនាវឱ្យប្រទេសទាំង៣ ពង្រឹងស្វ័យភាពជាយុទ្ធសាស្ត្រ រក្សាឯកភាព និងស្ថិរភាពក្នុងតំបន់ទប់ទល់នឹងការវិលត្រឡប់មកវិញនៃចិត្តគំនិតនៃសង្រ្គាមត្រជាក់ និងរួចផុតពីការបង្ខិតបង្ខំ ការគំរាមកំហែង និងការត្រួតត្រា»។ សេចក្ដីថ្លែងការណ៍ក្រសួងការបរទេសចិនស្រង់សម្ដីលោក វ៉ាង ដែលថ្លែងក្នុងវេទិកាមួយរៀបចំដោយលេខាធិការដ្ឋានកិច្ចសហប្រតិបត្តិការត្រីភាគីដែលជាស្ថាប័នមួយដែលត្រូវបានបង្កើតដោយក្រុងប៉េកាំង សេអ៊ូល និងតូក្យូ។
រដ្ឋមន្ត្រីការបរទេសកូរ៉េខាងត្បូង ផាក ជីន និងរដ្ឋមន្ត្រីការបរទេសជប៉ុន Hayashi Yoshimasa ចូលរួមព្រឹត្តិការណ៍នេះតាមរយៈប្រព័ន្ធអនឡាញ។
លោក វ៉ាង ដែលជានាយកការិយាល័យគណៈកម្មការកិច្ចការបរទេសមជ្ឈិមបក្សកុម្មុយនីស្តចិន បានព្រមានថា ប្រសិនបើនិន្នាការរបស់អាម៉េរិកនេះត្រូវបានអនុញ្ញាតឱ្យអភិវឌ្ឍទៅមុខនោះ នឹងមិនត្រឹមតែមានការជ្រៀតជ្រែកយ៉ាងធ្ងន់ធ្ងរដល់ដំណើរការរលូននៃកិច្ចសហប្រតិបត្តិការត្រីភាគីប៉ុណ្ណោះទេ ប៉ុន្តែថែមទាំងបង្កើនភាពតានតឹង និងការប្រឈមមុខដាក់គ្នានៅក្នុងតំបន់។ លោកបានសង្កត់ធ្ងន់លើតម្រូវការក្នុងការដោះស្រាយជម្លោះតាមរយៈការសន្ទនា និងការពិគ្រោះយោបល់ ហើយប្រឆាំងនឹងពាក្យសម្ដី ឬទង្វើដែលអាចធ្វើឱ្យតំបន់ធ្លាក់ចូលទៅក្នុងសង្គ្រាម។
នៅក្នុងព្រឹត្តិការណ៍នៅទីក្រុង Qingdao លោក វ៉ាង ក៏បានអំពាវនាវឱ្យមានការពន្លឿនកិច្ចពិភាក្សាស្តីពីតំបន់ពាណិជ្ជកម្មសេរីក្នុងចំណោមប្រទេសជិតខាង។ ឆ្លៀតពេលនេះ មន្ត្រីជាន់ខ្ពស់ចិនរូបនេះ បានរំលឹកឡើងវិញពីការប្រឆាំងរបស់ទីក្រុងប៉េកាំងចំពោះផែនការរបស់ជប៉ុនក្នុងការបញ្ចេញទឹកទៅក្នុងសមុទ្រពីរោងចក្រថាមពលនុយក្លេអ៊ែរ Tokyo Electric Power ដោយលើកឡើងពីផលប៉ះពាល់ដល់ប្រព័ន្ធអេកូឡូស៊ីសមុទ្រ និងសុវត្ថិភាពរបស់មនុស្ស៕
Tag:
(ចិន
កូរ៉េខាងត្បូង
ជប៉ុន)
© រក្សាសិទ្ធិដោយ thmeythmey.com