ព្រឹទ្ធាចារ្យ ព្រឿង ឈៀង និងភរិយា ជួបគ្រោះថ្នាក់ចរាចរណ៍ ដោយរបួសដៃនិងទ្រូង

ជាតិ

ព្រឹទ្ធាចារ្យ ព្រឿង ឈៀង និងភរិយា ជួបគ្រោះថ្នាក់ចរាចរណ៍ ដោយរបួសដៃនិងទ្រូង

04, Jul 2023 , 5:00 pm

រូបភាព

រូបពីហ្វេសប៊ុក Sabayna Sok

ដោយ: ប៉ូ សាគុន

ភ្នំពេញ៖ ព្រឹទ្ធាចារ្យ ព្រឿង ឈៀង និងភរិយា បានជួបគ្រោះថ្នាក់ចរាចរណ៍ កាលពីយប់ថ្ងៃទី៣ ខែកក្កដា ឆ្នាំ២០២៣ វេលាម៉ោងប្រមាណ៩យប់ នៅម្ដុំរោងចក្រស្រាបៀថៃហ្គ័រ។ ព្រឹទ្ធាចារ្យ ព្រឿង ឈៀង រងរបួសស្រាល ចំដើមទ្រូង ដោយប៉ះជាមួយចង្កូតឡាន។ ចំណែកព្រឹទ្ធាចារ្យ រស់ យ៉ារ៉ាន់ ដែលត្រូវជាភរិយា រងរបួសហើមសួត និងបាក់កដៃស្ដាំ។

ព្រឹទ្ធាចារ្យ រស់ យ៉ារ៉ាន់ បានប្រាប់សារព័ត៌មានថ្មីៗតាមទូរសព្ទថា ព្រឹទ្ធាចារ្យជួបគ្រោះថ្នាក់ចរាចរណ៍ ក្រោយពីត្រឡប់មកពីពិធីមង្គលការ កូនរបស់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅម្ដុំព្រែកហូរ។

ព្រឹទ្ធាចារ្យបានរៀបរាប់ថា ឡានរបស់ព្រឹទ្ធាចារ្យ បើកបរបញ្ច្រាសទិសគ្នាជាមួយឡានបង្កហេតុ ដោយឡានព្រឹទ្ធាចារ្យបើកតម្រង់ទៅផ្លូវជាតិលេខ១។ ព្រឹទ្ធាចារ្យរៀបរាប់ថា ឡានដែលបើកបញ្ច្រាសទិសគ្នានោះ បើកបរលើគន្លងកណ្ដាលទ្រូងផ្លូវ។ ឡាននោះបើកគេចទឹក ដែលដក់នៅលើផ្លូវ ទើបបណ្ដាលឱ្យមកប៉ះនឹងឡានព្រឹទ្ធាចារ្យតែម្ដង។

ព្រឹទ្ធាចារ្យ រស់ យ៉ារ៉ាន់ ពន្យល់បន្ថែម៖«យើងបើកខាងស្ដាំ គេបើកខាងឆ្វេង។ គេបើកកណ្ដាលផ្លូវ ហើយគេបើកគេចទឹកដក់លើផ្លូវ ក៏មកប៉ះយើង។ គេប្រាប់ថាខាងគេរបួសបាក់ដៃដូចខ្ញុំដែរ ប៉ុន្តែឡានគេមានពោងសុវត្ថិភាព តែឡានខ្ញុំចាស់ មិនមានពោងសុវត្ថិភាពទេ។ សុំឱ្យអ្នកបើកបរឡាន មានការប្រុងប្រយ័ត្នខ្ពស់។»។

ព្រឹទ្ធាចារ្យ រស់ យ៉ារ៉ាន់ រួមទាំងព្រឹទ្ធាចារ្យ ព្រឿង ឈៀង ត្រូវនៅសម្រាកព្យាបាលក្នុងពន្ទីរពេទ្យ៣ថ្ងៃ ដើម្បីតាមដានអាការៈ។ ប្រសិនស្ថានភាពល្អប្រសើរ ទើបគ្រូពេទ្យ អនុញ្ញាតឱ្យចេញពីពេទ្យ។

សូមបញ្ជាក់ថា គ្រោះថ្នាក់ចរាចរនេះ ព្រឹទ្ធាចារ្យ ព្រឿង ឈៀង បានសុំឱ្យភាគីម្ខាងទៀត សងថ្លៃខូចខាតចំនួន១,៥០០ដុល្លារ សម្រាប់ការខូចខាត។ ប៉ុន្តែជាក់ស្ដែង ឡានរបស់ព្រឹទ្ធាចារ្យ ជួសជុលអស់ប្រាក់ ៣,០០០ដុល្លារ ដោយពុំទាន់គិតថ្លៃព្យាបាលខ្លួន របស់ព្រឹទ្ធាចារ្យទាំងពីរឡើយ។

ព្រឹទ្ធាចារ្យ រស់ យ៉ារ៉ាន់ បញ្ជាក់ថា សព្វដងកូនប្រុសរបស់ព្រឹទ្ធាចារ្យ គឺជាអ្នកបើកបរឡាន។ ក៏ប៉ុន្តែលើកនេះ កូនរបស់ព្រឹទ្ធាចារ្យ មិនបានទៅជាមួយ ទើបតម្រូវឱ្យព្រឹទ្ធាចារ្យ ព្រឿង ឈៀង បើកឡានដោយខ្លួនឯង៕