ពិព័រណ៍ “ព្រះរាជទស្សនកិច្ចទៅប្រទេសបារាំងរបស់ព្រះបាទ ស៊ីសុវត្ថិ ឆ្នាំ១៩០៦” បន្តដល់ចុងខែកក្កដានេះ

ជាតិ

ពិព័រណ៍ “ព្រះរាជទស្សនកិច្ចទៅប្រទេសបារាំងរបស់ព្រះបាទ ស៊ីសុវត្ថិ ឆ្នាំ១៩០៦” បន្តដល់ចុងខែកក្កដានេះ

08, Jul 2023 , 2:29 pm

រូបភាព

រូបផ្ដល់ឱ្យ

ដោយ: ប៉ូ សាគុន

ភ្នំពេញ៖ នេះគឺជាឱកាសចុងក្រោយ ដើម្បីទស្សនាពិព័រណ៍ស្ដីអំពីដំណើរផ្សងព្រេង ជាប្រវត្តិសាស្ត្រនៃ “ព្រះរាជទស្សនកិច្ចទៅកាន់ប្រទេសបារាំង របស់ព្រះបាទ ស៊ីសុវត្ថិ នាឆ្នាំ១៩០៦ គ្រាដំបូងនៃការស្វែងយល់ចិត្តគ្នារវាងខ្មែរ និងបារាំង»។

ពិព័រណ៍ដ៏គួរឱ្យចាប់អារម្មណ៍បំផុត ដែលរៀបរាប់ពី “ព្រះរាជទស្សនកិច្ច ទៅកាន់ប្រទេសបារាំងរបស់ព្រះបាទ ស៊ីសុវត្ថិ នាឆ្នាំ១៩០៦ គឺគ្រាដំបូងនៃការស្វែងយល់ចិត្តគ្នារវាងខ្មែរនិងបារាំង។ ពិព័រណ៍នេះ នឹងតាំងបង្ហាញរហូតដល់ចុងខែកក្កដា ឆ្នាំ២០២៣នេះ។ ទស្សនាដោយឥតគិតថ្លៃ។

ពិព័រណ៍នេះមានការដាក់តាំងបង្ហាញខ្សែភាពយន្តឯកសារចំនួន៥ និងវត្ថុតាំងចំនួន៦៩ រួមមានប័ណ្ណប្រៃសនីយ៍ច្បាប់ដើម រូបថត អត្ថបទព័ត៌មាន និងកាសអនុស្សាវរីយ៍ជាច្រើន។ របស់ទាំងអស់នោះ បានបង្ហាញពីឥទ្ធិពលការទូត និងវប្បធម៌ដ៏អស្ចារ្យរបស់ព្រះអង្គ រួមជាមួយនឹងភាពទាក់ទាញ សែលបង្កើតឡើងដោយ ព្រះមហាក្សត្រខ្មែរ ក្នុងចំណោមសាធារណជន និងឥស្សរជនបារាំង។

រូបផ្ដល់ឱ្យ

ចាប់តាំងពីការដាក់តាំងបង្ហាញកាលពីខែតុលា ឆ្នាំ២០២២មក ពិព័រណ៍នេះ បានទាក់ទាញអ្នកទស្សនារាប់ពាន់នាក់ និងត្រូវបានពន្យាពេល នៃការបិទបញ្ចប់ពិព័រណ៍ម្ដងរួចមកហើយ ដើម្បីទទួលបានភ្ញៀវឱ្យកាន់តែច្រើន។ ថ្ងៃទី៣១ខែកក្កដា ខាងមុខនេះ គឺជាថ្ងៃចុងក្រោយ នៃការតាំងពិព័រណ៍នេះ។

រូបផ្ដល់ឱ្យ

សូមរំលឹកថា សារមន្ទីរ ស.ស.រ គឺជាសារមន្ទីរដែលអន្តរកម្មបំផុត នៅក្នុងរាជធានីភ្នំពេញ។ សាធារណជនទាំងអស់ អាចទៅទស្សនាសារមន្ទីរ ស.ស.រ ដើម្បីស្វែងយល់ពីប្រវត្តិសាស្ត្រ ដ៏គួរឱ្យចាប់អារម្មណ៍របស់ប្រទេសកម្ពុជា ក្នុងរយៈកាល ២ ០០០ឆ្នាំ តាមរយៈការលាយបញ្ចូលគ្នា រវាងការតាំងបង្ហាញ ជាលក្ខណៈឌីជីថល និងវត្ថុបុរាណចាស់ៗ ដែលស្របទៅនឹងសារមន្ទីរបែបទំនើបបំផុត៕