ដោយ៖ សែម ប្រាក់ដាវ
ភ្នំពេញ៖ ទឹកធ្លាក់ «ឆាយកី» លាក់ខ្លួនកណ្ដាលព្រៃនៅកោះកុង កំពុងទន្ទឹងចាំទេសចរ ទៅផ្ដិតយកទេសភាពដ៏ប្រណីតរបស់ខ្លួន។ ទឹកធ្លាក់នេះ ត្រូវបានទេសចរមើលរំលង ដែលជារមណីយដ្ឋានទេសចរណ៍ដ៏គួរឱ្យទាក់ទាញ និងមានធម្មជាតិស្រស់បំព្រង អមព្រៃឈើតូចធំ លាយឡំជាមួយនឹងផ្ទាំងថ្ម តូច-ធំ។ ទេសចរទៅកម្សាន្តនៅទឹកធ្លាក់ ឆាយកី អាចងូតទឹកយ៉ាងត្រជាក់ ក្រោមម្លប់ ដើមឈើ និងកំពុងរង់ចាំស្វាគមន៍ភ្ញៀវទេសចរមកទស្សនានៅទីនោះ។
សម្រស់ទឹកធ្លាក់ឆាយកី ក្នុងខេត្តកោះកុង។ រូបភាពពី ក្រសួងទេសចរណ៍
ទឹកធ្លាក់ឆាយកី មានទីតាំងស្ថិតនៅតំបន់ភូមិពោធិ៍បឹង ឃុំដងពែង ស្រុកស្រែអំបិល ខេត្តកោះកុង។ លោក សុីម ខ្មៅ ប្រធានសហគមន៍ឆាយកី លើកឡើងថា ទឹកធ្លាក់ឆាយកី បានលាក់ខ្លួនក្នុងជ្រលងភ្នំនៃ ជួរភ្នំក្រវាញខាងត្បូង មានទឹកត្រជាក់ដូចទឹកកក ជាមួយដើមឈើដ៏ខៀវស្រងាត់ ជាពិសេសអាចស្តាប់សំឡេងសត្វបក្សាបក្សីយំឮអឺងកងពេញព្រៃ។
ទេសចរដែលបានទៅកម្សាន្តនៅទឹកធ្លាក់ឆាយកី គឺច្បាស់ជាមិនចង់ត្រលប់មកផ្ទះវិញឡើយ។ ដ្បិតមានទេសភាពទាក់ទាញ ប៉ុន្តែមិនសូវមានទេសចរច្រើននោះទេ ដែលស្គាល់ទឹកធ្លាក់ឆាយកីនេះ។
លោក ស៊ីម ខ្មៅ ប្រធានសហគមន៍ឆាយកី។ រូបភាពពី៖ លោក ស៊ីម ខ្មៅ
ប្រធានសហគមន៍ឆាយកី ប្រាប់សារព័ត៌មាន Thmey Thmey 25ថា កាលពីមុនទឹកធ្លាក់នេះ មានតែភ្ញៀវទេសចរក្នុងតំបន់ខេត្តកោះកុងប៉ុណ្ណោះ ដែលមកទស្សនានៅថ្ងៃបុណ្យទានធំៗ ព្រោះមិនសូវមានអ្នកស្គាល់ទឹកធ្លាក់មួយនេះ។ រាល់ឆ្នាំទឹកធ្លាក់នេះ មិនទេសចរទៅកម្សាន្តនោះទេ ដោយសារតែនៅក្នុងព្រៃជ្រៅនៃខេត្តកោះកុង។
ទឹកធ្លាក់ឆាយកីនេះ ទេសចរអាចទស្សនាសម្រស់ធម្មជាតិ និងសម្រស់ទឹកធ្លាក់ជាដំណាក់ៗលើថ្ម និងពិសាអាហារដ៏ឈ្ងុយឆ្ងាញ់ដែលចម្អិន ដោយប្រជាជននៅទីនោះទៀតផង។ ជាងនេះទៅទៀតទេសចរក៏អាចបោះតង់ សម្រាកកម្សាន្តនៅទឹកធ្លាក់ឆាយកីផងដែរ។
លោក ស៊ីម ខ្មៅ បានថ្លែងដូច្នេះថា៖ « នៅទឹកធ្លាក់ឆាយកីនេះ មិនទាន់មានទេសចរស្គាល់នោះទេ ប៉ុន្តែយើងនឹងព្យាយាមផ្សព្វផ្សាយពីតំបន់ទេសចរណ៍មួយនេះដល់សាធារណជន ដើម្បីឱ្យមានទេសចរទៅកម្សាន្តនៅ ទឹកធ្លាក់ឆាយកី ព្រោះទីនេះជាតំបន់ធម្មជាតិ ហើយមានការកែច្នៃបន្ថែម»។
រូបភាពពី៖ ក្រសួងទេសចរណ៍
ក្រៅពីនេះ ទឹកធ្លាក់មួយនេះ ជាទីតាំងសក្ដិសមបំផុតសម្រាប់អ្នកចូលចិត្តផ្សងព្រេង។ លើសពីនេះ សម្រស់ទឹកធ្លាក់ឆាយកី ដែលលាក់ខ្លួនសម្ងំក្នុងព្រៃនេះ អាចឱ្យភ្ញៀវទេសចរមកកម្សាន្តនារដូវវស្សា រីករាយជាមួយទឹកធ្លាក់យ៉ាងស្រស់ស្អាត។
សូមជម្រាបថា រយៈពេល៦ខែនៃឆ្នាំ២០២៣នេះ ទឹកធ្លាក់នេះ មានទេសចរទៅកម្សាន្តប្រមាណ៣ក្រុមតែប៉ុណ្ណោះ។ លោក ស៊ីម ខ្មៅ អំពាវនាវដល់ទេសចរឱ្យមកកម្សាន្ត ដើម្បីជួយថែរក្សាការពារ និងអភិរក្សធនធានធម្មជាតិ ពិសេសបង្កើតមុខរបរថ្មីដល់ប្រជាជនក្នុងតំបន់ និងបញ្ចៀសការកាប់ទន្ទ្រានព្រៃឈើផងដែរ៕