លោក ឆម ភារៈ មានទុរេនជាង១ពាន់ដើម នៅស្រុកថ្មបាំង ខេត្តកោះកុង។ ម្ចាស់ចម្ការរូបនេះ បញ្ជាក់ថា រដូវទុរេនឆ្នាំនេះហក់ឡើងខ្ពស់ទាំងទីផ្សារ និងតម្លៃល្អ។ រម្លឹកទៅដើមរដូវអំឡុងខែឧសភា និងដើមខែមិថុនា លោក ភារៈ លក់បោះដុំទុរេនម៉ាន់ថងបានតម្លៃចន្លោះពី១៨០០០រៀល ទៅដល់២ម៉ឺន ក្នុងមួយគីឡូក្រាម។ 

 

តម្លៃនេះ ឡើងបន្តិចជាងឆ្នាំមុន បើធៀបនឹងរដូវទុរេននាឆ្នាំកន្លងៗទៅ ដោយសារ​តម្រូវការទីផ្សារខ្ពស់ ហើយទិន្នផលនៅតិចនៅឡើយ។ ឆ្នាំ២០២១ លោក ភារៈ លក់ទុរេនបានតម្លៃត្រឹម១២០០០-១៤០០០រៀលប៉ុណ្ណោះក្នុងមួយគីឡូក្រាមនាដើមរដូវ។ ចំណែកឯចុងរដូវចាប់ពីចុងខែមិថុនា ដល់ខែកក្កដា លោកលក់បានតម្លៃ១៤០០០រៀល ឬ១៥០០០រៀលក្នុងមួយគីឡូក្រាម ខណៈឆ្នាំមុន លោកលក់ទុរេនបានតម្លៃ១ម៉ឺនរៀលប៉ុណ្ណោះ។

 

«ឆ្នាំនេះយើងចាត់ទុកថាតម្លៃល្អជាង ព្រោះឆ្នាំកន្លងទៅគេមកទិញដុំធំៗតម្លៃធ្លាក់ដល់១ម៉ឺនរៀលក្នុងមួយគីឡូក្រាមក្នុងខែនេះ (ចុងរដូវ)»។ នេះជាការលើកឡើងរបស់លោក ភារៈ ដែលបន្តថា ទុរេនរបស់លោក លក់បោះដុំឱ្យឈ្មួញលក់បន្តក្នុងស្រុកចាប់ពី៥០-១០០គីឡូក្រាម។ 

 

មិនមែនតែលោក ភារៈ ឡើយ ដែលលក់ទុរេនបានតម្លៃថ្លៃ។ ទុរេនកំពតរបស់លោក ស៊ឹម សុជាតិ ក៏លក់បានក្នុងខ្ពស់ផងដែរ។ នាដើមរដូវទុរេន លោក សុជាតិ លក់បានតម្លៃ ៣៥០០ដុល្លារក្នុងមួយតោន។ លោក ភារៈ បានលក់ចេញប្រមាណ២០តោន។ ពាក់កណ្ដាល និងចុងរដូវ តម្លៃទុរេនរបស់កសិកររូបនេះនៅថេរដដែលពុំធ្លាក់ថ្លៃឡើយ។ លោកសប្បាយចិត្តដែលទុរេនមានទីផ្សារល្អ និងតម្លៃខ្ពស់យ៉ាងដូច្នេះ។ លោកបន្តបង្កើនការដាំដុះដើមទុរេនថែមទៀត។ 

 

លោក សុជាតិ លើកឡើងថា៖«ឆ្នាំនេះ ខ្ញុំលក់បានថ្លៃជាងរាល់ឆ្នាំ បើគិតរាយ១គីឡូក្រាម១៤០០០រៀលមែន ប៉ុន្តែតម្លៃប៉ុណ្ណឹងវាថេរតាំងពីដើមដល់ឥឡូវ។ ហើយណាមួយខ្ញុំលក់បានបោះដុំម្ដង២០តោន ៥០តោន។ រាល់ឆ្នាំ ខ្ញុំលក់បានមួយគីឡូក្រាម១៨០០០រៀល តែគេយកតិចៗ ម្ដង១០០-២០០គីឡូក្រាមនៅទុរេនខូចទៀត ខាតច្រើនដែរ»។ 

 

លោក សុជាតិ បញ្ជាក់ថា ទុរេនរបស់កសិករខ្មែរនៅតែមានទីផ្សារល្អ ទោះ៥-១០ឆ្នាំទៀតក៏ដោយ ព្រោះបច្ចុប្បន្នតម្រូវការទីផ្សារទុរេនកំពុងកើនឡើងខ្លាំង ហើយផលិតផលនៅខ្វះនៅឡើយ។ ដូច្នេះទម្រាំ៥-១០ឆ្នាំទៀតនឹងមានមនុស្សដាំច្រើន ផ្គត់ផ្គង់តម្រូវការទីផ្សារក្នុងស្រុកគ្រប់គ្រាន់ និងអាចឈានដល់ការនាំចេញផងដែរ។

 

ងាកមកកសិករខេត្តត្បូងឃ្មុំម្នាក់ទៀត លោក ខៀវ សុខឡេង ជាកសិករល្បីមួយរូប។ លោក សុខឡេ លក់ទុរេនបានតម្លៃ ១៨ ០០០រៀលក្នុងមួយគីឡូក្រាមនៅដើមរដូវ។ ចំណែកពាក់កណ្ដាលរដូវ និងចុងរដូវលោកលក់ទុរេនបានតម្លៃ១៤០០០-១៥០០០រៀលក្នុងមួយគីឡូក្រាម។ 

 

កសិករវ័យ៥០ប្លាយរូបនេះ បញ្ជាក់ថា ឆ្នាំនេះទុរេនមានទីផ្សារល្អ ងាយស្រួលលក់តាំងពីដើមរដូវប្រមូលផល។ តែយ៉ាងណាលោកថា តម្លៃទុរេនបោះដុំរៀងធ្លាក់បន្តិចក្នុងខេត្តត្បូងឃ្មុំ។ លោក សុខឡេង ក៏សប្បាយចិត្ត ព្រោះ ពលរដ្ឋ មានលទ្ធភាពទិញ ហើយកសិករនៅតែចំណេញ។ 

 

ម្ចាស់ចម្ការទុរេនជាង២០ហិកតារូបនេះ លើកឡើងថា៖« តម្លៃប៉ុណ្ណឹងក៏សមរម្យសម្រាប់កសិករ អ្នកហូប។ បើយើងលក់ថ្លៃហួសហេតុពេក ក៏គេមិនទិញហូបដែរ»។ ទោះ៥-១០ឆ្នាំមានកសិករដាំទុរេនពេញប្រទេស ក៏លោក មិនបារម្ភថាទុរេនអាចធ្លាក់ថ្លៃ និងទីផ្សារដូចដំណាំមួយចំនួននោះដែរ ព្រោះបច្ចុប្បន្នពុំទាន់អាចផ្គត់ផ្គង់គ្រប់តាមតម្រូវការឡើយ។ កសិករ អាចនាំទុរេ ចេញថែមទៀតផង។ លោក ខៀវ សុខឡេង អះអាងថា ទុរេនប្រភេទម៉ាន់ថងរបស់កសិករខ្មែរ មានរសជាតិឆ្ងាញ់ជាងទុរេនដែលនាំចូលពីប្រទេសជិតខាង៕