«គេសុំជួបខ្ញុំ ឥឡូវយើងនឹងបានជួបគ្នានៅខែតុលាខាងមុខនេះហើយ»។ កីឡាករគុនខ្មែរមានរហស្សនាមជើងកន្ត្រៃហោះ ព្រំ សំណាង ប្រាប់សារព័ត៌មានថ្មីៗតាមប្រព័ន្ធទូរសព្ទនៅថ្ងៃទី១០ ខែកក្កដា ឆ្នាំ២០២៣ដូច្នេះ ខណៈខ្លួនកំពុងបុកហ្វឹកហាត់បណ្តើរដើម្បីត្រៀមខ្លួនឱ្យបានរៀបរយល្អមុនការប្រកួតមកដល់។

 

យ៉ាងណាចំពោះជំនួបដ៏កក្រើកនេះដែរកីឡាករវាយមិនថយលើសង្វៀន រុំ សំណាង បញ្ជាក់ថាការជួបជាមួយកីឡាករ Dave Leduc ខ្លួននឹងប្រឹងប្រែងឱ្យបានខ្លាំង និងស្វែងយល់ពីស្តេចប្រដាល់មីយ៉ាន់ម៉ាឱ្យបានច្រើន។ សំណាង បន្ថែមថាការប្រកួតលក្ខណៈគុនខ្មែររូបគេមានជំនឿចិត្តខ្ពស់ក្នុងការដណ្តើមជ័យជន្នះ ម្យ៉ាងទៀតការប្រកួតនៅក្នុងស្រុកខ្លួនកាន់តែមានក្តីសង្ឃឹមពីសំឡេងគាំទ្រអ្នកទស្សនា។

 

កីឡាករមានដើមកំណើតមកពីខេត្តកំពង់ស្ពឺរូបនេះបន្តថា៖«ខ្ញុំប្រកួតនៅខ្មែរមានជំនឿចិត្ត កក់ក្តៅច្រើន។ ឥឡូវនេះខ្ញុំកំពុងហ្វឹកហាត់បន្ថែមដើម្បីសុខភាពល្អផង និងពង្រឹងសមត្ថភាពផង»។ ចំណែកការរៀបចំឱ្យបានជួបគ្នានេះដែរធ្វើឡើងបន្ទាប់ពីកីឡាករដើមកំណើតបារាំង Leduc ប្រកាសតាមគេហទំព័រហ្វេសប៊ុកផេកផ្លូវការរបស់ខ្លួនជាច្រើនលើកច្រើនសារដើម្បីសុំជួបប្រកួតជាមួយកីឡាករគុនខ្មែរ ព្រំ សំណាង៕