រដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ (អាស៊ាន) និងចិន គ្រោងនឹងជួបប្រជុំគ្នានៅថ្ងៃទី១៣ ខែកក្កដា មុនពេលកិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាននៅថ្ងៃទី១៤ ខែកក្កដា។

 

យ៉ាងណាមិញ រដ្ឋមន្រ្តីការបរទេសចិន ឈីន កាង នឹងអវត្តមានពីកិច្ចប្រជុំនេះ។ អ្នកនាំពាក្យក្រសួងការបរទេសចិនលោក Wang Wenbin បាននិយាយថា ទីប្រឹក្សារដ្ឋ និងជារដ្ឋមន្ត្រីការបរទេស ឈីន កាង មិនអាចចូលរួមកិច្ចប្រជុំថ្នាក់រដ្ឋមន្ត្រីអាស៊ាននេះបានទេ ដោយសារហេតុផលសុខភាព។ លោក​មិន​បាន​បញ្ជាក់ពីបញ្ហា​លម្អិតជុំវិញរឿងនេះ​ទេ។

 

លោក វ៉ាង យី ដែលជាប្រធានគោលនយោបាយការបរទេសរបស់បក្សកុម្មុយនិស្តចិន មានឋានៈខ្ពស់ជាងលោក ឈីន កាង នឹងចូលរួមកិច្ចប្រជុំថ្នាក់រដ្ឋមន្រ្តីការទេសអាស៊ានជំនួសវិញ។ 

 

លោក ឈីន កាង មានអាយុ ៥៧ឆ្នាំបានចូលកាន់តំណែងជារដ្ឋមន្ត្រីការបរទេសបន្ទាប់ពីលោក វ៉ាង យី  នៅខែធ្នូ ឆ្នាំ២០២២ ហើយបង្ហាញមុខចុងក្រោយជាសាធារណៈនៅថ្ងៃទី២៥ ខែមិថុនានៅទីក្រុងប៉េកាំង បន្ទាប់ពីបានជួបជាមួយមន្ត្រីស្រីលង្កា រុស្ស៊ី និងវៀតណាម។

 

លោក ឈីន កាង ក៏លុបចោលជំនួបជាមួយប្រធានគោលនយោបាយការបរទេសរបស់សហភាពអឺរ៉ុបលោក Josep Borrell កាលពីសប្តាហ៍មុននៅទីក្រុងប៉េកាំង។ ការបាត់មុខយូរបែបនេះ ក៏នាំឱ្យការសង្ស័យចំពោះសុខភាពរបស់លោក ឈីន ដែលគេជឿថា ទំនងជាឆ្លងជំងឺកូវីដ-១៩។

 

រដ្ឋធានីហ្សាការតា កំពុងរៀបចំកិច្ចប្រជុំរដ្ឋមន្រ្តីការបរទេសអាស៊ានលើកទី៥៦ និងកិច្ចប្រជុំពាក់ព័ន្ធចាប់ពីថ្ងៃទី១១ ដល់ទី ១៤ ខែកក្កដា ឆ្នាំ២០២៣៕