ចិន និងកោះសូឡូម៉ុន នាថ្ងៃទី ១០ ខែកក្កដា បានចុះហត្ថលេខាលើកិច្ចព្រមព្រៀងស្តីពីកិច្ច សហប្រតិបត្តិការវិស័យប៉ូលិសដែលជាផ្នែកមួយនៃការធ្វើឱ្យប្រសើរឡើងចំពោះទំនាក់ទំនងទ្វេភាគីដែលត្រូវបានដំឡើងទៅជាភាពជាដៃគូយុទ្ធសាស្រ្តទូលំទូលាយ។
កិច្ចព្រមព្រៀងសហប្រតិបត្តិការប៉ូលិស ស្ថិតក្នុងចំណោមកិច្ចព្រមព្រៀងចំនួនប្រាំបួនដែលត្រូវបានចុះហត្ថលេខាបន្ទាប់ពីនាយករដ្ឋមន្ត្រីកោះសូឡូម៉ុន Manasseh Sogavare បានជួបជាមួយនាយករដ្ឋមន្ត្រីចិន លី ឈាំង នៅទីក្រុងប៉េកាំង។
លោក Sogavare បានទៅដល់ចិនកាលពីថ្ងៃទី៩ ខែកក្កដាសម្រាប់ដំណើរទស្សនកិច្ចលើកដំបូងរបស់លោកចាប់តាំងពីប្រទេសទាំងពីរបានចុះហត្ថលេខាលើកិច្ចព្រមព្រៀងសន្តិសុខកាលពីឆ្នាំមុនដែលធ្វើឱ្យមានភាពល្អក់កករជាមួយអាម៉េរិកនិងប្រទេសជិតខាងមួយចំនួនរួមទាំងអូស្ត្រាលីផងដែរ។
«ក្នុងរយៈពេលត្រឹមតែបួនឆ្នាំប៉ុណ្ណោះ ទំនាក់ទំនងរវាងចិន និងកោះសូឡូម៉ុនបានរីកចម្រើន យ៉ាងឆាប់រហ័ស ហើយយើងអាចនិយាយបានថាវាមានផ្លែផ្កាខ្លាំងណាស់»។ នាយករដ្ឋមន្ត្រីចិនប្រាប់សមភាគីកោះសូឡូម៉ុនបែបនេះ។ ទន្ទឹមនេះ លោក Sogavare បានថ្លែងអំណរគុណដល់ចិនចំពោះតួនាទីរបស់ខ្លួនក្នុងការដោះស្រាយបញ្ហាប្រឈមជាសកលរួមទាំងសន្តិភាព និងការអភិវឌ្ឍដោយចីរភាព។ លោកបន្ថែមថា ប្រទេសរបស់លោកមានការរៀនច្រើនពីបទពិសោធរបស់ចិន។
បើយោងតាមទូរទស្សន៍រដ្ឋចិន ក្នុងការពិភាក្សាជាមួយប្រធានាធិបតីចិនលោក ស៊ី ជិនភីង វិញ មេដឹកនាំទាំង២ បានព្រមព្រៀងដើម្បីបង្កើតភាពជាដៃគូយុទ្ធសាស្ត្រដ៏ទូលំទូលាយមួយ។ លោក ស៊ី និយាយនៅក្នុងជំនួបនៅវិមានប្រជាជនថា ចិន និងបណ្តាប្រទេសកោះប៉ាស៊ីហ្វិក ជាប្រទេសកំពុងអភិវឌ្ឍដូចគ្នា ហើយគួរតែពង្រឹងជំនួយទៅវិញទៅមកក្នុងក្របខ័ណ្ឌនៃកិច្ចសហប្រតិបត្តិការត្បូង-ត្បូង។
លើសពីនេះ លោក ស៊ី ក៏បានសន្យាគាំទ្រយុទ្ធសាស្ត្រឆ្នាំ២០៥០សម្រាប់ទ្វីបប៉ាស៊ីហ្វិកខៀវ ដែល ផែនការដ៏ធំមួយរបស់ប្រជាជាតិប៉ាស៊ីហ្វិកលើការ ជំរុញគោលដៅយុទ្ធសាស្ត្រក្នុងតំបន់ក្នុងរយៈពេល៣ទសវត្សរ៍ខាងមុខ។
ក្នុងសេចក្តីថ្លែងការណ៍មួយដោយឡែក ការិយាល័យលោក Sogavare បញ្ជាក់ពីហេដ្ឋារចនាសម្ព័ន្ធប្រកបដោយគុណភាពដែលប្រទេសនេះត្រូវការសម្រាប់ការពង្រឹងសេដ្ឋកិច្ចដើម្បីលុបបំបាត់ភាពក្រីក្រ។ អំឡុងទស្សនកិច្ចនេះ ប្រទេសទាំងពីរក៏បានឈានដល់កិច្ចព្រមព្រៀងលើវិស័យនានារួមមាន អាកាសចរណ៍ស៊ីវិល ពាណិជ្ជកម្ម សេដ្ឋកិច្ច បច្ចេកវិទ្យា និងកីឡា។
លោក Sogavare ដែលឡើងកាន់អំណាចក្នុងឆ្នាំ ២០១៩ បានផ្លាស់ប្ដូរគោលនយោបាយការបរទេសដោយងាកចេញពីទំនាក់ទំនងការទូតជាមួយតៃវ៉ាន់។ កាលពីខែមុន លោក Sogavare បានអំពាវនាវឱ្យ ពិនិត្យឡើងវិញសន្ធិសញ្ញាសន្តិសុខឆ្នាំ២០១៧ ជាមួយអូស្ត្រាលីនៅក្នុងកិច្ចប្រជុំជាមួយរដ្ឋមន្ត្រីការពារជាតិអូស្ត្រាលីដែមទៀត។ កោះសូឡូម៉ុនក៏បានបើកស្ថានទូតជាផ្លូវការនៅទីក្រុងប៉េកាំងក្នុងទស្សនកិច្ចរបស់លោក Sogavare៕