អ្នកស្រី មិន ចិន្តា ជាស្រ្តីខ្មែរមានពិការភាពដំបូង បានរៀនថ្នាក់បរិញ្ញាបត្រជាន់ខ្ពស់នៅអូស្រ្តាលី លើជំនាញគោលនយោបាយ និងការអភិវឌ្ឍពិការភាព ក្នុងឆ្នាំ២០២២។ អ្នកស្រី ចិន្តា ត្រូវមករស់នៅលើទឹកដីអូស្ដ្រាលី ដោយបាននាំកូនស្រីអាយុជាង១ឆ្នាំ និងមិត្តភកិ្តមករស់នៅជាមួយ ដើម្បីជួយមើលថែកូនស្រី និងរូបអ្នកស្រីដែលមានពិការភាពភ្នែកពីកំណើត។  កន្លងទៅជិតមួយឆ្នាំ លោក វ៉ាន សុខវ៉ាត ដែលជាស្វាមី អ្នកស្រី ចិន្តា ដែលមានពិការភាពភ្នែកដូចគ្នានោះ ក៏បានជាប់អាហារូបករណ៍ថ្នាក់អនុបណ្ឌិត លើជំនាញបរិយាប័ន្ន និងវិធីសាស្រ្តអប់រំ នៅសកលវិទ្យាល័យ Flinders ក្នុងឆ្នាំ២០២៣។ 
 

ក្រោយបែកគ្នាអស់រយៈពេលជាង១ឆ្នាំ ដោយភរិយា និងកូនស្រី នៅអូស្រ្តាលី និងស្វាមីនៅកម្ពុជា ពេលនេះ ក្រុមគ្រួសារប្ដីប្រពន្ធពិការភ្នែកមួយគូនេះ បានសម្រេចបំណងរស់នៅជួបជុំគ្នាវិញហើយ។ វាជាអារម្មណ៍រំភើបពិបាកពណ៌នាសម្រាប់ប្ដីប្រពន្ធមួយគូនេះ ក្រោយពេលបានរួមរស់ជាមួយគ្នាវិញលើទឹកដីដ៏សែនឆ្ងាយ។ អ្នកស្រី ចិន្តា បានបង្ហាញអារម្មណ៍ថា៖ «ពេលបានគ្រួសារមកនៅជាមួយជុំជួបគ្នា មានអារម្មណ៍សប្បាយចិត្ត ហើយមានឱកាសបានរស់នៅជុំគ្នា នៅស្រុកគេ បានរៀនពីបទពិសោធការរស់នៅ វប្បធម៌របស់គេខុសពីយើងយ៉ាងម៉េច របៀប រស់នៅយ៉ាងម៉េច។ ហើយគាត់ទៅជួយមើលកូនគ្នា ជួយទុក្ខធុរៈគ្នាទៅវិញទៅមក ។ ធម្មតាពេលនៅតែឯងអ៊ីចឹង ពេលយប់ព្រលប់អ៊ីចឹង ធ្វើការអីពិបាកអ៊ីចឹង មានគ្រួសារនៅជិតគេហុចនេះ ហុចនោះ ហើយជួយមើលការខុសគ្នាអ៊ីចឹង»។