«បម្រែបម្រួលអាកាសធាតុ ជាការគំរាមកំហែងដែលគួរតែត្រូវដោះស្រាយដោយឡែកពីបញ្ហាការទូត»។ បេសកជនអាម៉េរិកទទួលបន្ទុកកិច្ចការបម្រែបម្រួលអាការធាតុលោក ចន ឃែរី បានថ្លែងបែបនេះទៅកាន់លោក ហាន​ ចឹង អនុប្រធានាធិបតីចិននៅថ្ងៃទី១៩ ខែកក្កដាដែលជាថ្ងៃទី៣ នៃទស្សនកិច្ចរបស់លោកដើម្បីជជែកដោះស្រាយបញ្ហអាកាសធាតុរវាងចិននឹងអាម៉េរិក។

 

លោក ឃែរី ក៏បានបន្ថែមទៀតថា ប្រសិនប្រទេសទាំងពីរអាចរួមគ្នាក្នុងរយៈពេលប៉ុន្មានខែខាងមុខមុនពេលឈានទៅដល់កិច្ចពិភាក្សាស្តីពីអាកាសធាតុពិភពលោក COP28 នឹងមានឱកាសមួយដើម្បីការផ្លាស់ប្តូរយ៉ាងជ្រាលជ្រៅលើបញ្ហានេះ។ 

 

លោក ហាន វិញក៏ទទួលស្គាល់ថា ចិននិងអាម៉េរិកបានរក្សាទំនាក់ទំនងយ៉ាងជិតស្និទ្ធ និងកិច្ចសន្ទនាស្តីពីអាកាសធាតុចាប់តាំងពីការតែងតាំងរបស់លោក ឃែរី ជាបេសកជនមក។ លោកបន្ថែមថា សេចក្តីថ្លែងការណ៍រួមដែលចេញដោយភាគីទាំងពីរបានបញ្ជូនសញ្ញាវិជ្ជមានដល់ពិភពលោកថែមទៀត។

 

ទោះបីជាទំនាក់ទំនងរវាងប្រទេសទាំងពីរមានភាពប្រសើរឡើងវិញបន្តិចដោយសារមានទស្សនកិច្ចមន្រ្តីជាន់ខ្ពស់អាម៉េរិកជាបន្តបន្ទាប់ លោក ឃែរី ក៏បានទទួលស្គាល់ការលំបាកផ្នែកការទូតរវាងភាគីទាំងពីរក្នុងប៉ុន្មានឆ្នាំចុងក្រោយនេះ។ លោកបានបញ្ជាក់ទៀតថា អាកាសធាតុគួរតែត្រូវបានចាត់ទុកជាបញ្ហាប្រឈមឯករាជ្យដែលទាមទារឱ្យមានកិច្ចខិតខំប្រឹងប្រែងរួមគ្នាពីសំណាក់បណ្តាប្រទេសដែលមានសេដ្ឋកិច្ចខ្លាំងជាងគេលើពិភពលោកដើម្បីដោះស្រាយ។ 

 

អំឡុងការជជែកជាមួយមន្ត្រីចិនក្នុងទស្សនកិច្ចនេះ លោក ឃែរី បានលើកឡើងពីភាពស្ថាបនា ប៉ុន្តែវាក៏មានភាពស្មុគស្មាញផងដែរ ដោយហេតុថា ភាគីទាំងពីរនៅតែដោះស្រាយជាមួយនឹងបញ្ហានយោបាយរួមទាំងតៃវ៉ាន់ផងដែរ។ 

 

គួរកត់សម្គាល់ផងដែរថា ទំនាក់ទំនងផ្នែកអាកាសធាតុរវាងប្រទេសមហាអំណាចទាំងពីរត្រូវបានផ្អាកកាលពីខែសីហាឆ្នាំមុន បន្ទាប់ពីដំណើរទស្សនកិច្ចរបស់ប្រធានសភាតំណាងរាស្រ្តអាម៉េរិក លោកស្រី ណាន់ស៊ី ផេឡូស៊ី ទៅកាន់តៃវ៉ាន់៕