ក្រសួងការបរទេសកម្ពុជា អះអាងក្នុងសេចក្តីប្រកាសព័ត៌មានថា នាអំឡុងនៃការបំពេញទស្សនកិច្ចរបស់ខ្លួននៅកម្ពុជា លោកនាយករដ្ឋមន្រ្តីហ្គីណេប៊ីស្ស៊ូ នឹងឆ្លៀតចូលរួមសង្កេតមើលការបោះឆ្នោតដោយផ្ទាល់ ដែលនឹងប្រព្រឹត្តទៅនៅថ្ងៃទី២៣កក្កដា។ 
 

បើតាមក្រសួងការបរទេស លោកនាយករដ្ឋមន្រ្តីពីទ្វីបអាហ្វ្រិករូបនេះ នឹងមានជំនួបជាមួយថ្នាក់ដឹកនាំកម្ពុជា រួមមានសម្តេចនាយករដ្ឋមន្រ្តី ហ៊ុន សែន និងសម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ។ ក្រសួងការបរទេស​ លើកឡើងថា នាយករដ្ឋមន្រ្តីទាំង២ នឹងផ្លាស់ប្តូរទស្សនៈគ្នា អំពីបញ្ហាតំបន់ និងបញ្ហាអន្តរជាតិ ដើម្បីជាប្រយោជន៍រួម។ 
 

ក្រសួងការបរទេស ចាត់ទុកទស្សនកិច្ចលើកដំបូងរបស់នាយករដ្ឋមន្រ្តីហ្គីណេប៊ីស្ស៊ូ ថាជាព្រឹត្តិការណ៍ដ៏មានសារសំខាន់ ក្នុងទំនាក់ទំនង ព្រមទាំងរួមចំណែកដល់ការពង្រឹងមិត្តភាពជាមួយគ្នា៕