សហព័ន្ធខ្មែរកីឡាហែលទឹក បានបញ្ជូនប្រតិភូកីឡា ៤រូប ចូលរួមប្រកួត World Aquatics Championship នៅប្រទេសជប៉ុន។ ប្រតិភូទាំងនោះ ត្រូវបានដឹកនាំ ដោយលោក ហែម គិរី អគ្គលេខាធិការសហព័ន្ធខ្មែរកីឡាហែលទឹក រួមជាមួយលោក ហែមថុន ពន្លឺ គ្រូបង្វឹក, កីឡាការិនី ឃឺន ចន្ទចរិយា និងកីឡាករ មនត្រស ផានសុវណ្ណអារុន។ 
  

ដោយឡែក លោក ហែម គិរី ប្រតិភូដឹកនាំ ត្រូវចូលរួមប្រជុំក្នុងមហាសន្និបាតរបស់សហព័ន្ធកីឡាហែលទឹកពិភពលោក (World Aquatics General Congress)។ សហព័ន្ធខ្មែរកីឡាហែលទឹក នឹងត្រូវធ្វើបទបង្ហាញអំពីវឌ្ឍនភាព និងការជួយជម្រុញគាំទ្រ ដល់ការអភិវឌ្ឍបន្ដ។ យោងទៅលើការផ្សាយរបស់សហព័ន្ធ នេះ គឺជាលើកទី១ ហើយដែលសហព័ន្ធ ត្រូវបានជ្រើសរើសឲ្យធ្វើបទបង្ហាញ ឲ្យសហព័ន្ធពីបណ្ដាលប្រទេសផ្សេងៗ បានដឹងពីវឌ្ឍនភាពកីឡាហែលទឹកក្នុងប្រទេសកម្ពុជា។
 

គួរបញ្ជាក់ផងដែរថា កម្មវិធីប្រកួតខាងលើនេះ នឹងប្រព្រឹត្តទៅពីថ្ងៃទី២០ ដល់ថ្ងៃទី៣១ ខែកក្កដា ឆ្នាំ២០២៣ ខាងមុខនេះ នៅក្នុងទីក្រុង Fukuoka ប្រទេសជប៉ុន៕