លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានវាយតម្លៃពីដំណើរការយ៉ាងល្អប្រសើរក្នុងយុទ្ធនាការឃោសនាបោះឆ្នោតជ្រើសរើសអ្នកតំណាងរាស្ត្រអណត្តិទី៧ រយៈពេល២១ថ្ងៃកន្លងមក។

 

ថ្លែងប្រាប់អ្នកសារព័ត៌មានក្រោយពិនិត្យមើលការឃោសនាចុងក្រោយរបស់គណបក្សប្រជាជនកម្ពុជា ដែលដឹកនាំតំណាងដោយលោក ហ៊ុន ម៉ាណែត និងគណបក្សហ៊្វុនស៊ិនប៉ិច ដែលដឹកនាំដោយសម្តេច នរោត្តម ចក្រាវុធ នាព្រឹកថ្ងៃទី២១ ខែកក្កដា នេះ លោក ប្រាជ្ញ ចន្ទ បានលើកឡើងថា បរិយាកាសឃោសនា ជាទូទៅល្អ មានសន្តិសុខ សណ្តាប់ធ្នាប់ ដោយសារតែកិច្ចសហប្រតិបត្តិការល្អរវាងមន្ត្រីរៀបចំការបោះឆ្នោត អាជ្ញាធរដែនដី និងមានសមត្ថកិច្ច។

 

 

ប្រធាន គ.ជ.ប មើលឃើញថា គណបក្សនយោបាយកាន់តែចាស់ទុំ មានក្រមសីលធម៌ ដោយមានការគោរពត្រឹមត្រូវតាមច្បាប់ និងចែកវេនគ្នាធ្វើសកម្មភាព ខណៈពាក្យបណ្តឹងមានត្រឹមតែប្រមាណ៣០បណ្តឹងប៉ុណ្ណោះ ហើយភាគច្រើនជាបណ្តឹងពាក់ព័ន្ធនឹងការឃោសនាតាមអនឡាញ។

 

លោកបានបន្ថែមថា អ្នកសង្កេតការអន្តរជាតិ ដែលមកពី៦០ស្ថាប័ន ក្នុងនោះមានអតីតមេដឹកនាំស្ថាប័នរដ្ឋ និងសភា ពីបណ្តាប្រទេសនានា គឺដោយសារតែពួកគាត់ចាប់អារម្មណ៍អំពីការបោះឆ្នោតនៅកម្ពុជា ដែលដំណើរការតាមប្រជាធិបតេយ្យ និងផ្អែកតាមនីតិរដ្ឋត្រឹមត្រូវ៕