ជាតិ
បទយកការណ៍ / បទសម្ភាសន៍
បទសម្ភាសន៍
វីដេអូ
លោក ហ៊ុយ យ៉ាឡេង ត្រឡប់មកផលិតរឿងខ្មោចឡើងវិញ
× ភ្នំពេញ៖ លោក ហ៊ុយ យ៉ាឡេង បានត្រឡប់ទៅផលិតរឿងខ្មោចឡើងវិញ ក្រោយពីផលិតរឿងបែបជីវិតមិនជោគជ័យ។ ទោះជាយ៉ាងណា លោកនៅតែរក្សាក្ដីស្រមៃផលិតរឿងបែបជីវិត និងប្រភេទផ្សេងៗទៀត នៅពេលលោកមានប្រាក់។
“ខ្មោចចូល” គឺជារឿងថ្មីដែលលោក ហ៊ុយ យ៉ាឡេង និពន្ធ ដឹកនាំ និងធ្វើជាតួសម្ដែង។ ទោះជាយ៉ាងណា លោក យ៉ាឡេង ដឹងរឿងនេះសម្រាប់ផលិតកម្មមួយផ្សេងទៀត ដោយពុំមែនក្នុងនាមផលិតកម្មរបស់លោកឡើយ។ រឿងនេះ នឹងត្រូវចាក់បញ្ចាំងនៅថ្ងៃទី២៧ ខែកក្កដា ឆ្នាំ២០២៣ ខាងមុខនៅគ្រប់រោងភាពយន្ត។ លោក ហ៊ុយ យ៉ាឡេង អះអាងថារឿងនេះ នឹងក្លាយជាចំណីអារម្មណ៍ថ្មីប្លែក សម្រាប់អ្នកទស្សនា។ លោក ហ៊ុយ យ៉ាឡេង បន្ថែម៖«រឿងនេះខ្ញុំស៊ីឈ្នួលដឹកឱ្យផលិតកម្ម LD ដូច្នេះបើចំណេញ ទើបគេឱ្យភាគរយមកខ្ញុំ។ ប៉ុន្តែបើមិនចំណេញទេ ខ្ញុំក៏មិនទទួលបានភាគរយដែរ។ រឿងនេះបង្ហាញពីមន្តអាគមគាថា ហើយក្នុងសង្គមយើង នៅតែជឿលើរឿងនេះ។ អ្វីដែលប្លែកពីរឿងខ្មោចមុនៗ គឺសាច់រឿង និងប្លង់»។
រូបផ្ដល់ឲ្យ
រឿង”ខ្មោចចូល" បង្ហាញអំពីសាច់រឿងមួយ ដែលកើតឡើងក្នុងអំឡុងឆ្នាំ១៩៩១។ រឿងនោះនិយាយពីមេទាហានម្នាក់ ដែលបានបាត់ខ្លួនក្នុងព្រៃអស់កាលជាយូរ។ ថ្ងៃមួយគាត់បានប្រឡប់មករកប្រពន្ធនិងគ្រួសារវិញ ព្រមជាមួយនឹងសក់ ដែលវែងដូចមនុស្សស្រី។ រឿងរ៉ាវមិនមានអ្វីចម្លែកឡើយ ប៉ុន្តែក្រោយពីមេទាហាននោះ កាត់សក់ដើម្បីឡើងស័ក្ដិ អ្វីៗបានប្រែជាអាក្រក់។
សូមបញ្ជាក់ថារឿង “ខ្មោចចូល” នេះ ក៏បានបោះពុម្ពជាសៀវភៅកុនរួចហើយដែរ។ លោក ហ៊ុយ យ៉ាឡេង ស្នើដល់ទស្សនិកជន ត្រឡប់ទៅគាំទ្រភាពយន្តបែបភ័យរន្ធត់ ដែលជាស្នាដៃរបស់លោកនិពន្ធ ដឹកនាំ និងសម្ដែងជាថ្មី។
សូមអស់លោក លោកស្រី អញ្ជើញទស្សនាវីដេអូបទសម្ភាស រវាងកញ្ញា ប៉ូ សាគុន ជាមួយលោក ហ៊ុយ យ៉ាឡេង ដើម្បីបានដឹងពីមូលហេតុ ដែលអ្នកដឹកនាំរូបនេះ ត្រឡប់ទៅផលិតរឿងខ្មោតវិញ ដោយក្ដីរីយរាយ៖
រូបផ្ដល់ឲ្យ
Tag:
ភាពយន្ត
កុន
រឿង
ខ្មោច
ហ៊ុយ យ៉ាឡេង
© រក្សាសិទ្ធិដោយ thmeythmey.com