បើតាមក្រសួងសាធារណការ និងដឹកជញ្ជូន ផ្លូវនេះ នឹងដើរតួយ៉ាងសំខាន់ក្នុងការជួយកាត់បន្ថយការកកស្ទះ និងជួយសម្រួលចរាចរនៅរាជធានីភ្នំពេញ។ លើសពីនេះ ផ្លូវនេះនឹងតភ្ជាប់ផ្ទៃក្នុង និងសមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ រួមនឹងផ្លូវរបៀងសេដ្ឋកិច្ចសំខាន់នានារបស់មហាអនុតំបន់មេគង្គដែលរួមចំណែកសម្រួលការដឹកជញ្ជូនឆ្លងកាត់ព្រំដែន ដើម្បីជំរុញពាណិជ្ជកម្មអន្តរជាតិ។ ក្រសួងបានបញ្ជាក់ថា ផ្លូវក្រវាត់ក្រុងទី៣ តម្លៃ២៧៣លានដុល្លារនេះ នឹងជួយធ្វើឱ្យទឹកដីនៅជុំវិញផ្លូវនេះក្លាយជាតំបន់អភិវឌ្ឍថែមទៀត។​

 

ផ្លូវដែលមានប្រវែងជាង៥០គីឡូម៉ែត្រនេះ គឺមានការចែកចេញជា២ប្រភេទ ដោយក្នុងនោះមាន៤៨គីឡូម៉ែត្រត្រូវបានចាត់បេតុងសរសៃដែកដែលមានកម្រាស២២សង់ទីម៉ែត្រ ​និងទំហំទទឹងផ្លូវមានរហូតដល់ទៅ២៧ម៉ែត្រសម្រាប់ទីប្រជុំជន​ និង២៥ម៉ែត្រសម្រាប់ក្រៅទីប្រជុំជន។ ចំពោះសម្រាប់ផ្លូវខ្នែងដែលមានប្រវែង៥គីឡូម៉ែត្រ ត្រូវបានចាក់បេតុងកៅស៊ូ កម្រាស់៩សង់ទីម៉ែត្រ។

 

សូមជម្រាបថា ផ្លូវនេះ​ត្រូវបានបើកការដ្ឋានសាងសង់នៅក្នុងខែមករា ឆ្នាំ២០១៩ ក្រោមវត្តមានសម្តេច ហ៊ុន សែន និងលោកវ៉ាង វិនធាន (Wang Wentian) ឯកអគ្គរដ្ឋទូតចិន ប្រចាំកម្ពុជា៕