ជាតិ
សង្គមជាតិ
UNDP ចង់ដឹងទស្សនៈយុវជនអំពីរូបភាពកម្ពុជានៅ៥ឆ្នាំបន្ទាប់? រូបភាពពី UNDP
× ភ្នំពេញ៖ តើអ្នកចង់ឃើញប្រទេសកម្ពុជាក្នុងរូបភាពបែបណា ក្នុងរយៈពេលប្រាំឆ្នាំបន្ទាប់? តើយើងទាំងអស់គ្នាគួរធ្វើអ្វីខ្លះ ដើម្បីឱ្យរូបភាពនោះក្លាយជាការពិត ហើយអ្វីខ្លះជាបញ្ហាប្រឈមដែលយើងទាំងអស់គ្នាត្រូវយកចិត្តទុកដាក់? នេះគឺជាសំណួររបស់កម្មវិធីអភិវឌ្ឍន៍សហប្រជាជាតិ (UNDP) ចោទសួរ យុវជនកម្ពុជា។
ដើម្បីប្រមូលមតិ និងទស្សនៈយុវជន UNDP បានរៀបចំកម្មវិធីប្រកួតប្រជែងសំណេរអត្ថបទយុវជន «អនាគតក្នុងសំណេរ» ដើម្បីបង្ហាញពីភាពច្នៃប្រឌិត ការស្រមើស្រមៃ និងក្តីប្រាថ្នារបស់យុវជន សម្រាប់ការអភិវឌ្ឍន៍ប្រកបដោយចីរភាព និងបរិយាប័ន្ន ដោយមានសំណួរទាំង៣ខាងលើ គឺជាប្រធានបទ។
បើតាម UNDP Cambodia កម្មវិធីប្រកួតនេះ មានគោលបំណងប្រមូលផ្តុំនូវដំណោះស្រាយ និងចក្ខុវិស័យសម្រាប់អនាគត ដែលយុវជនចង់ឃើញ និងជាផ្នែកមួយជួយជំរុញយុវជនឱ្យចូលរួមគិត និងរៀបចំអនាគតប្រទេសរបស់ពួកគេកាន់តែសកម្ម។ កម្មវិធីនេះ ក៏ជាផ្នែកមួយផ្ដល់ចំណេះដឹង ផ្នែកគោលដៅអភិវឌ្ឍន៍ប្រកបដោយចីរភាពដល់យុវជន និងផ្តល់សិទ្ធិអំណាចដល់យុវជនកម្ពុជា តាមរយៈការផ្តល់ឱកាសឱ្យពួកគេចែករំលែកការគំនិត សម្រាប់ជាការរួមចំណែក ដល់កិច្ចខិតខំប្រឹងប្រែងអភិវឌ្ឍន៍ប្រទេសកម្ពុជា។
អ្នកចូលរួមប្រកួតអាចលើកពីទិដ្ឋភាពណាមួយនៃសង្គម ដែលអ្នកចាប់អារម្មណ៍ដូចជាសេដ្ឋកិច្ច អាជីវកម្ម ការអប់រំ សុខភាព បរិស្ថាន វប្បធម៌ ការវិត្តន៍ឌីជីថល នវានុវត្ត សហគ្រិនភាព អភិបាលកិច្ចដើម លើកលែងតែទិដ្ឋភាពនយោបាយតែប៉ុណ្ណោះ។ ចំពោះការសរសេរ ត្រូវមានភាពស៊ីគ្នា ជាមួយនឹងគោលដៅអភិវឌ្ឍន៍ប្រកបដោយចីរភាព (Sustainable Development Goals) ដែលជាសំណុំនៃគោលដៅសកលចំនួន ១៧ ដែលមានបំណងបញ្ចប់ភាពក្រីក្រ ការពារភពផែនដី និងធានាសន្តិភាព និងវិបុលភាពសម្រាប់ទាំងអស់គ្នា នៅឆ្នាំ២០៣០។ នេះជាការណែនាំរបស់ UNDP ដែលបានបន្ថែមថា ដើម្បីឱ្យអត្ថបទកាន់តែស៊ីជម្រៅ គឺត្រូវផ្ដល់ជាគិតសកម្មភាព និងយុទ្ធសាស្រ្ត ដោយអបជាមួយនឹងឧទាហរណ៍ដែលចាំបាច់ ដើម្បីសម្រេចបាននូវរូបភាពនៃប្រទេសកម្ពុជានាពេលអនាគត។ ភាគីពាក់ព័ន្ធដែលមានតួនាទីក្នុងការរៀបចំ និងអនុវត្តសកម្មភាព និងយុទ្ធសាស្រ្តទាំងនោះ ក៏។ ហើយយុវជនផ្ទាល់ គួរមានសកម្មភាពបែបណា។ UNDP បញ្ជាក់បែបនេះ។
កម្មវិធីប្រកួតប្រជែងសំណេរអត្ថបទយុវជននេះ បើកទទួលសម្រាប់ប្រជាពលរដ្ឋកម្ពុជាដែលមានអាយុពី ១៥ ដល់ ៣០ឆ្នាំ។ ថ្ងៃផុតកំណត់ទទួលសំណេរអត្ថបទ គឺថ្ងៃទី ១២ ខែ សីហា ឆ្នាំ២០២៣៕
© រក្សាសិទ្ធិដោយ thmeythmey.com