ជាតិ
លោក ជា ចាន់តូ ត្រូវបានតែងតាំងជាអគ្គទេសាភិបាលកិត្តិយស នៃធនាគារជាតិ លោក ជា ចាន់តូ ដែលត្រូវបានព្រះមហាក្សត្រ ត្រាស់បង្គាប់តែងតាំងជាអគ្គទេសាភិបាលកិត្តិយស នៃធនាគារជាតិកម្ពុជា។ រូបពីហ្វេសប៊ុកធនាគារជាតិ។
× លោក ជា ចាន់តូ ត្រូវបានតែងតាំងលោក ជា ចាន់តូ ជាអគ្គទេសាភិបាលកិត្តិយសធនាគារជាតិនៃកម្ពុជា មានឋានៈស្មើទេសរដ្ឋមន្ត្រី។ នេះបើតាមព្រះរាជក្រឹត្យ របសព្រះករុណា ព្រះបាទ សម្ដេចព្រះ បរមនាថ នរោត្តម សីហមុនី កាលពីថ្ងៃទី២៩ កក្កដា ដែលទើបចេញផ្សាយនាពេលនេះ។
លោក ជា ចាន់តូ បានកាន់តំណែងអគ្គទេសាភិបាលធនាគារជាតិកម្ពុជា ចាប់តាំងពីឆ្នាំ១៩៩៨មក ដែលពេលនោះ កម្ពុជាប្រឈមនឹងវិបត្តិហិរញ្ញវត្ថុអាស៊ី។ លោក ចាន់តូ បានកំណែទម្រង់ និងពង្រឹងប្រព័ន្ធធនាគាររបស់កម្ពុជា។ ជាពិសេសធ្វើទំនើបកម្ម និងធ្វើសមាហរណកម្មនៅក្នុងប្រព័ន្ធហិរញ្ញវត្ថុក្នុងតំបន់ និងអន្តរជាតិ។
មុនទទួលបានតួនាទីជាអគ្គទេសាភិបាលនេះ លោក ជា ចាន់តូ ធ្លាប់ទទួលខុសត្រូវធំនៅធនាគារកណ្តាល ក្នុងតួនាទីជានាយកធនាគារជាតិនៃកម្ពុជា ពីឆ្នាំ ១៩៧៩ ដល់ ១៩៨១ ។ បន្ទាប់មកលោកត្រូវបានតែងតាំងជាទេសាភិបាលរងនៃធនាគារជាតិនៃកម្ពុជាពីឆ្នាំ ១៩៨១ ដល់ឆ្នាំ ១៩៨៦ ។
នៅក្នុងឆ្នាំ ១៩៨៦ លោក ជា ចាន់តូ ក៏បានបម្រើការជាអនុរដ្ឋមន្ត្រីទីមួយ នៅក្រសួងផែនការ។ មិនតែប៉ុណ្ណោះលោក ក៏ធ្លាប់ជាសមាជិកសភា ចន្លោះឆ្នាំ១៩៩៣ ដល់១៩៩៨ផងដែរ។
លោក ជា ចាន់តូ ក៏បានទទួលពានរង្វាន់ជាអ្នកគ្រប់គ្រងបានល្អបំផុត ក្នុងការជំរុញកំណើន និងស្ថិរភាពសេដ្ឋកិច្ច ក្នុងអំឡុងពេលជំងឺរាតត្បាត Covid-19 ពីធនាគារកណ្ដាលប្រចាំតំបន់អាស៊ីប៉ាស៊ីហ្វិក កាលពីឆ្នាំ ២០២១ ។
កាលពីថ្ងៃទី២៩ កក្កដា ព្រះករុណាព្រះបាទសម្តេចព្រះបរមនាថ នរោត្តម សីហមុនី ទ្រង់បានត្រាស់បង្គាប់តែងតាំងអ្នកស្រី ជា សិរី ជាអគ្គទេសាភិបាលធនាគារជាតិកម្ពុជា ដែលមានឋានៈស្មើទេសរដ្ឋមន្រ្តី។ អ្នកស្រី ឡើងកាន់តំណែងនេះ ជំនួសលោក ជា ចាន់តូ ជាឪពុក។ ជាមួយគ្នានោះ ព្រះមហាក្សត្រ ក៏បានបង្គាប់តែងតាំងទេសាភិបាលរងថ្មី៣រូបផងដែរ រួមមាន លោក រ័ត្ន សុវណ្ណនរៈ លោក យឹម លាត និងអ្នកស្រី សាយ សំអាត៕
Tag:
ព្រះមហាក្សត្រ
ជា ចាន់តូ
ធនាគារជាតិ
© រក្សាសិទ្ធិដោយ thmeythmey.com